ديب إفريقي

ديب إفريقي (سميتو لعيلمية: Canis Lupaster، كانيس لوپاسطير) كايتسمى ف لمغريب ديب (مايتغالطش ليك معا كانيس لوپوس)، كان و مازال معروف ب سمية بن آوى الدهبي ليفريقي هو نوع من لكلبيات مستوطن أصلي ف شمال إفريقيا، غرب إفريقيا، الساحل، شمال شرق إفريقيا، و لݣرن لإفريقي. كايتعتابر نوع مامهددش على حساب تصنيف الليستا لحمرا. ف جبال لأطلس لمتوسط ف لمغريب، فايت تشاف ف علو د 1800 ميطر. هو ف لأساس مفترس د اللاسلسوليات و لبزوليات لي يقدرو يكونو كبار بحال الصغار د لغزالة، وخا فرايس كبار يقدرو يكونو ف الريجيم ديالو، أغلب لماكلة ديالو من لكاركاسات د لحيوانات، الزبل د بنادم، و لفواكه. الدياب ليفريقية حيوانات كاتزوج مرة وحدة و حدوديين؛ ولادهم كايبقاو معا والديهوم باش يعاونو ف تربية الجراوا الصغار.

الديب ليفريقي كان ف السابق مكلاسيفيي كا سلالة إفريقية د بن آوى الدهبي (كانيس آوريوس). ف عام 2015، سيرية د التحاليل على لآ دي إن لميطوكوندري و لجينوم النواوي د هاد النوع، بينات بلي هاد النوع، ف لحقيقة، مفرز على بن آوى الدهبي، و قريب كتر ل الديب الرمادي و لقيوط (كانيس لاطرانس). وخا هاكداك باقي قريب من بن آوى الدهبي ب شكل كافي باش يولدو تكرويزات. ديراسات خرى بينات بلي هاد النوع هو لحفيد د تخليطة جينية د لكلبيات، ب 72 ف لمية ديب رمادي و 28 ف لمية ديب إيتيوپي كا جدود ديالو.

الطاكسونومي

الدياب ليفريقية كانو ف لأصل كايتعتابرو نفس النوع معا بن آوى الدهبي لأوراسياوي (كانيس آوريوس). غير هو، واحد الديراسة قارنات لحمض النواوي لميطوكوندري، لميكروساطيليطات، لكروموزومات د لجينس، و لجينوم كلو، بيّنات بلي الدياب ليفريقية عندهوم حوض جيني مفرز على بني آوى الدهبية، عليها، نوع مبدل. هاد الديراسة لقات عاوتاني بلي الديب ليفريقي قريب ل الديب الرمادي على بن آوى الدهبي. هاد لقرابة ل الدياب الرمادية موهيمة، يلا خدينا ف لبال بلي حتى ديب رمادي كاين ف إفريقيا، و لاكين كايتݣال بلي أغلب التنويعات د لكلبيات ف إفريقيا جاية من "شباه الدياب" لوراسيوية لي معا لوقت نقارضو. أول وصف طاكسونومي على الديب ليفريقي دارو فغيديغيك كوِڤيِيه ف عام 1820، لي عاوتاني كان أول واحد عطاه السمية لي باقية كاتخدم ل دابا(بن آوى الدهبي)، زيد، وخا كوڤييه عرف بلي الديب ليفريقي هو نوع مبدل على بني آوى الدهبي، لموجتاماع لعيلمي ماعتابرش هاد النوع كا نوع منفاصل حتى ل لورقة د لبحت د كوپفلي و آل لي تنشرات ف 2015.

لوصف

لون لفرو دهبي غادي ل الصفر لباهت، لقهوي غالق، و الرمادي، على حساب لموئل د هاد النوع. ماتالاً، أول ديب إفريقي توصف عاش ف التيرات الجبلية و كان عندو فرو رمادي، ف لوقيتة لي النواع لي عايشين ف لموايل الصحراوية كايميلو باش يكون عندهوم فرو دهبي. بلا مانشوفو لفرو كولّو، أغلب الدياب ليفريقية عندهوم يمارات ب الصفر و زغب ب لكحل، لبيض. فخادهوم، قزازبهوم، مور ودنيهوم، و ف لفوق د خيشومهوم كاملين غالقين ف اللون، و لخطوط د الضهر كايوصلو حتى ل التلت لعلوي د قزيبتهوم، لي قمقومتها كحلة. قرجوطتهوم، صدرهوم، معدتهوم، الطراف الداخلية د فخادهوم، و ف الجناب التحتانيين د لماشوار ديالهوم كايكونو ف لبيض. زغبهوم كايكون طوٍْل ف لعنق و لفخاد، و ب طول متوسط ف لباقي د لكسدة.

شي ديمورفيزمات جينسية كاتطرا عند الديب ليفريقي، خوصوصا ف لقد د لكسدة. الدكورة عندهوم نفس النمط د اللون و الزغب بحال النتوات، و لاكين كايكونو كبار ف لقد مقارنة معا النتوات: دكور عندهوم الطول د الراس و لكسدة من 75 حتى ل 89.3 سونتيميطر، و طول د لقزيبة من 20 حتى ل 34.7 سونتيميطر، و كايوزنو من 6.3 حتى ل 15 لكيلوكرام. ف لوقيتة لي النتوات، عندهوم طول د الراس و لكسدة من 68 حتى ل 82.2 سونتيميطر، و طول د لقزيبة من 20 حتى ل 29 سونتيميطر، و كايوزنو من 6.5 حتى ل 10 كيلو.

السلوك

الدياب ليفريقية حيوانات خلوية، حتى كايلقاو الشريك د لمجاوجة. غير يولي لكوپل مصايب، كايبقاو بجوج لعمر كامل. لقد د لݣروپ معا لوقت كايكبر. هادشي معول على شحال من جرو عندهوم و شحال من ولد بقى باش يعاون ف تربية التستيفة الجاية من الجراوا. تنافوس مجهد على لماكلة كايكون موجود ف لعادة ف لݣروپات لكبيرة ف لقد، وخا هاكداك، منين كاتكون لماكلة ب كترة، لݣروپات لكبيرة تقشعو و هوما كايقسمو بيناتهوم لكاركاس د الجيفة. الدياب ليفريقية ف لعادة حيوانات نهاريّة، حيتاش كايكونو آكتيڤ ف النهار، النبوري، و لغروب، و ماكايبانوش ف لعادة ف الليل. الدياب ليفريقية عاوتاني حيوانات جوالا ب شكل كبير، الدكور كايميلو باش يجولو بعد من النتوات. دكر واحد فايت تتورخ ف الجولان ل 230 كيلوميطر، ف 98 يوم. زيد على هادشي، ف شمال إفريقيا بالضبط تونس، كاين تنواع جيني عالي بينات الدياب، هادشي كايفتارض بلي لقدرات التواصولية و لنتيشارية زايدة بينات النسمات.

لمجاوجة

الدياب ليفريقية ف لعادة كايتجوجو مرة وحدة ف حياتهوم، بحال بزاف د النواع من لكلبيات، وخا هادشي يقدر يكون فيكسيبل على حساب كترة لموارد، و لخصايل د الترحال د الدياب، الرابيطة د لكوپل كاتبقى دايما، عليها ݣروپ من الدياب كايتكون من لكوپل لمجاوج، طول ولادهوم اللوالا، لي كايعاونو ف تربية لولاد اللاحقين. منين كايحاميو على الزون ديالهوم، لكوپل غايطايف معا لمدرمين على حساب لجينس؛ الدكورا كايآطاكيو الدكورا، و النتوات كايآطاكيو النتوات. الدكورا و النتوات د الديب ليفريقي ب جوج بيهوم كايبلغو ف 10 سنين حتى ل 11 لسنة ف لعمر. لموسم د لملاقية كايكون من أكتوبر ل دجنبر، و لولادة كاتكون من دجنبر ل مارس، شي مرات تقدر توصل حتى ل أبريل و ماي. السيكس كايبقى شي دقايق، كايتبعو لحميل لي كايبقى 63 يوم. لقد د الجراوا كايتفاوت من 1 ل 9 جرو، ف لمتوسط 6 د الجراوا. منين كايتولدو، الجراوا د الديب ليفريقي كايوزنو 189 ݣرام تقريباً. و كايكونو عميين و كايحتاجو من 8 ايام ل 11 ليوم باش عينهوم تتحل، السنان حتى هوما كايبداو يبانو ف ليوم ل11. الجراوا د الديب ليفريقي كايتولدو ف عرين تحت أرضي، فين كايبقاو حتى كاتولي عندهوم 3 د السيمانات. لمٌاوات كايبقاو معا ولادهوم ف لعرين أما لباوات هوما لي كايجيبو لماكلة. ف شي فاميلات، لولاد اللوالا د شي كوپل كايعاونو ف تربية لولاد الجداد، هادشي بان بلي كايزيد لحماية د الجراوا، و ف التالي النجو ديالهوم. لوالدين و لولاد اللوالا كايعاونو ف لمصايبة د حس التجماع بينات الجراوا. وخا ملي يخرجو الجراوا من لعرين، كايبقاو محتاجين على لحليب من ماواتهوم، زيد، كايتعرفو على الطعام لمرجع ف هاد لوقيتة. هاد الطعام لمرجع (تقيا) كايجيو من لم ولا شي فراد بالغين من لݣروپ. الجراوا كايبقاو حدا لعرين حتى كايفطمو ف جوايه 8 حتى ل 10 د السيمانات ف عمرهوم. كايبداو يعاونو ف التقلاب على لماكلة ف عمر 14 سيمانة. شي 70٪ من الجراوا كايبقاو معا والديهوم حتى كايكملو عامين و كايوليو كايعاونو. ف هاد لوقيتة، مغايدخلوش ف أنشيطة د لملاقية، وخا يكونو بالغين.

== لقد د لعمر

أكتر ديب أفريقي عاش تشاف، وصل ل 14 لعام؛ ف لمحميات، لماكسيموم د لعمر هو 18 لعام. غير هو، لقد د لعمر لعادي ف لبريّة كايكون من 6 ل 8. د لعوام، ف لمتوسط 7 د لعوام. بزاف ديال الدياب ليفريقية كايموتو و هوما جراوا، حيت هوما محسوسين ل لامراض و لفيضانات على لعرين.

التواصول

الصوات و التعلام ب الريحة هوما من الطرقان الرئيسية على كيفاش كايتواصلو الدياب معا بعضياتهوم. هاد الشكال من التواصول موهيمين ف تعلام لمنطاقة، لملاقية، لحماية من لمفتارسات، و لقيان لاعضاء د لفاميلة. هاد لفعايل يقدرو يتقرنو ب سينيالات خرين، بحال التعبيرات لبصرية. متلاً، منين شي ديب إفريقي كايعلم الزون ديالو، غايبول و هو هاز رجل على شي بلاصة علمها، فبلاصة مايبول و هو مقرّد، باش يوري ل الدياب لي تقدر تكون شافت هادشي، بلي هو لحاكم د ديك لمنطاقة لفلانية. الصوات د الديب ليفريقي كايتكونو من لعوعاوة، لي كاتخدم باش يلقاو لاعضاء د لفاميلة و تبيان السيطارة، و كايخدمو التݣركير و النباح، باشي يعطيو إينضار ل أعضاء د لفاميلة بلي شي مفتارس قريب. النباح كايتخدم عاوتاني باش يبقاو ف لكونطاكط معا لاعضاء د لݣروپ منين كايكونو كايصيدو شي فريسة كبيرة. لحفلات د لمباركة و التحكاك حتى هوما من لحوايج لموهيمة ف التواصول بينات الدياب ليفريقية.

لعادات د لماكلة

لكوپلات لبالغة كايصيدو معا بعضياتهوم، و لاكين جل الدياب ليفريقية كاتصيد بوحديتها. لفراد د الدياب ليفريقية ف توتقو و هوما كايجيبو ل لرض حوافر كبر منهوم ب 4 حتى ل 5 د لمرات، غير هو لموعدال د النجاح ف الصيادة زايد عند لكوپلات على لفراد لوحيدة. لكوپلات لبالغة قادرين عاوتاني يتبعو فرايس كبار بحال غزالة الطومسون و بلارج لأبديمي. يلا كانت لماكلة متوفرة ب شكل كبير، ݣروپات يقدو يوصلو حتى ل 18 لديب توتقو و هوما كاياكاو لكاركاسات، و لاكين حتى شي توتيقة تدارت ل دياب إفريقية كايصيدو ف ݣروپات كبار، بحال ولاد عمامهوم، الدياب الرمادية (كانيس لوپوس).

لمفتارسات

الضبوعة لمنقطة معروفين ب لقتيل و لماكلة د الدياب ليفريقية ف شرق إفريقيا. الضبوعة ديما كايحاولو يجيو ل لعرين د الجراوا باش ياكلوهوم، ملي الدياب كايشوفو شي ضبع قرب من لعرين، كايسيفطو غوات د لينضار، لي كايعلم ݣاع لبالغين لي قراب، باش يجرّيو على الضبع و يعضو ليه لبلايص لحساسة ديالو. غرير لعسل حتى هو تشاف حدا لعرين د الديب ليفريقي، و لاكين ديما لبالغين كايجريو عليه قبل ماتوتق لعملية د لفتيراس. بنادم حتى هو معروف ب الصيادة د الدياب ليفريقية كا رد فيعل على لفتيراس د لماشيّة.

الدور لبيئي

الريجيم

الدياب ليفريقية كاتاكل ب لأساس لحلالف لبريّة من ݣاع لعمار، وخا الدياب ليفريقية ف لغالب كاياكلو غير الجيفات ديالهوم، ب سباب الريسكات د الصيادة د حلالف بالغة. النبات حتى هو طرف موهيم ف الريجيم د الدياب ليفريقية. هادشي كايجمع بزاف د لفروي، لبدور، لوراق و لݣازو على ود لهضيم و كا مورد ل لما. لقنيات لوروپية و لماشيّة، بحال لحاولي لمربّي لي من لعوينات الشايعة، و عاد زيد الرنب الصحراوي، و لقط لبرّي ليفريقي ب شكل قل. فايت ليهوم تتورخو و هوما كياكلو الطيور (يا بريّة يا مربّية)، لقوارض، و ب شكل نادر، لخنافس. عليها، الدياب ليفريقية تقدر تتصنف كا حيوانات قارتة.

التوزيع الجغرافي

الدياب ليفريقية كايتلقاو ف شمال إفريقيا من لمغريب ل مصر، لوصولية ديالهوم من شرق ل لغرب، من الصينيݣال ل الصومال و كينيا. و عليها، الدياب الدهبية كاتعتابر حيوانات جوالا، ب سباب لمادى لعريض لي شاداه.

لموايل الطابيعية

الدياب ليفريقية كاتعيش ف علو من 0 حتى ل 5000 ميطر تقريبا. ف الطراف الشرقية ديال التوزيع ديالهوم، الدياب ليفريقية ف لأساس كايعيشو ف علو من 2,200 ل 4620 ميطر، ف الجبال لمعزولة، هادشي لي كايفتارض بلي الدياب ليفريقية لجؤو ل لعلو ب سباب التبدال د لموناخ. ب سباب السلوك دياهوم لعام و التاحمول ديالهوم ل لموايل الناشفة، الديب ليفريقي يقدر يتلقى ف قاعيدة عريضة د لموايل، منها، التيرات د لݣازو، لغابات لمعتادلة د الصنوبر، لغابات د لأوكاليپطوس، لهضبات الناشفة، لمانݣروڤ، الصاڤانا، الصحرات، و لبيئات النص قارية. وخا هاكداك، لموئل لأعز عندهوم هو التيرات د لݣازو. وخا الديب ليفريقي يقدر يكون ف بزاف ديال لموايل، لعامل لي خلا الدياب يفضلو التيرات د لݣازو هو لموارد د لما. متلا، ف تونس، لختيلافات ف التوزيع د الديب ليفريقي معولة على لوفرة د لما. و ف الصحرا لكبرى، الدياب ليفريقية تلقاو ف أغلب لوقات ف بلايص طاحت فيها الشتا ب كتر من 1,000 ميليميطر ف لعام و كانو وحدين من لكلبيات لقلال ف دوݣري قل من 10 سيلسيوس. لموئل لوحيد لي معروف مايصلاحش ليهوم هوما لبلايص لقاريٌة بشكل زايد و لاراضي د لكتبان الرملية.

الدور لبيئي د هاد النوع

لغبور لعريض ديال بزاف د اللواحم من شمال إفريقيا، خلا الدياب ليفريقية تاخد لعرش د لمفتارسات ف هاد لمنطاقة. هاد النوع عاوتاني بين بلي هو حيوان أوپورتونيست و سريع ف لاضاپطاسيو، هادشي لي خلاه ينتاشر ب شكل عريض ف بزاف د التضاريس ف أنضيمة بيئية مبدلة على بعضياتها. واحد لعاقيبة على هادشي، هي الدياب ليفريقية كاتدير واحد الضغط تنافوسي زايد على مفتارسات اخرى. بحال الزردي الشايع. الدياب ليفريقية تفتارض بلي كاتنافس ب شكل ستيغلالي معا تعالب لفينيق و التعالب لحمرا، و كايبان بلي هوما لمتنافس لي غالب، حيت كايبان بلي التعالب من هاد النواع ب جوج، كايرحلو من لموارد د لما و كايتخباو ف وقت ما الدياب ليفريقية كايبانو. ب سباب هاد التنافوس، كايعتاقدو بلي تعالب لفينيق بدات تعمر ف بلايص رملية، لي ماكتيفضلهاش الديب ليفريقي، و النواع د التعالب ب جوج بيهوم تقلبو ل الطور الليلي باش يتجنبو الديب ليفريقي. زيد الدياب ليفريقية معروفة بلي عندهوم تداخل ف الريجيم معا بن آوى كحل الضهر و بن آوى مخطط الجناب ف شرق إفريقيا. لفتيراس من الدياب ليفريقية يقدر يعاون ف لكونطرول على النسمات د لقوارض و لحلالف. هوما عاوتاني حيوانات قماما، عليها هوما موهيمين ف الروسيكلاج د الطاقة و لموغديات النضام لبيئي كولو. النواع الجوالا ب شكل زايد بحال الدياب ليفريقية موهيمين ب شكل خاص ف عطيان هاد السرڤيسات ف مادى عريض من لانضيمة.

لمحافضة على النوع

لحالة د لمحافضة على النوع

الدياب ليفريقية مصنفة كا نوع مامهددش على حساب تصنيف الليستا لحمرا و لايني غاديين و كاينقصو. زيد توتق تكماش ف لعدد د الدياب ليفريقية ف السيرينݣيتي. لسباب علاش غاديين ف النقصان يقدر يكون ب سباب لقتيلة لي فوق لقياس من لقناصا و التجار د لحيوانات، و لقتيلة لنتيقامية د مالين لفيرمات، و السراحا ب سباب لقتيلة د لكسيبة. هادشي كامل كايعاونو ب الزيادة ف الدخيرة د لاسليحة لوطوماتيك ف بلايص بحال إثيوپيا. كايتفتارض بلي بزاف د الدياب ليفريقية كايتأترو ب لپروݣرامات د لكونطرول د لمفتارسات د شي نواع اخرى، ب شكل لولاني من ستيهلاك لكاركاسات لمسمومة. زيد على هادشي، لكسايد د لڤيهيكولات كانو لمصدر د لموت د خمسين ديب إفريقي على لاقل ف الصحرا لكبرى، هادشي لي ف لموستقبال غايولي عندو نعيكاسات كبر ب سباب التاطوور لي غادي و كايزيد د لبلدان ف الطرقان.

لمحافضة على النوع ف لمغريب

أكتر خطر كايهدد الدياب ليفريقية ف لمغريب ماشي هو التاصحور ولا خسران لموايل، ولايني هو السراحا د لغنم و لقناصا ب السلاح. قالت عاليمة د لحياء من كلية أوكصفورض ليز كامبل، بلي لعدد د الدياب ليفريقية ف جبال لأطلس قليل و هادشي خطير ب سباب الدور لموهيم د هاد النوع ف التوازون لبيئي، و قال كلاوديو سليرو لي من نفس ليكيپ د ليز، بلي هو مخايفش على الدياب من الزحيف لعمراني ولا لمرض، ب كتر ملي خايف من لهجمات لنتيقامية د السراحا د لغنم ب سباب لفتيراس د لكسيبة.

ف لموتنزه لوطني د لحسيمة، نددات شي جمعيات لوكال ف لحسيمة، ب لفعايل اللامسؤولة و اللاأخلاقية، لي كايديروها رباعات د لقناصا لي كايجيو من ݣاع لقنات ف لمغريب لشي بلايص ف لحسيمة، باش يقنصو الديب ليفريقي و يستعملوه لأغراض تيجارية.