Tar éis breis agus 3 bliana, an 5 Bealtaine 2023, dhearbhaigh an Eagraíocht Dhomhanda Sláinte nach éigeandáil sláinte dhomhanda é COVID-19 a thuilleadh.
Ba mhór an tionchar a bhí ag paindéim COVID-19 ar dhaoine, ar ár sochaí agus ar ár ngeilleagar, ach d’éirigh leis an Aontas an lámh in uachtar a fháil uirthi mar gheall ar ár gcomhar, ár ndiongbháilteacht, ár mbuanseasmhacht, ár n-eolaíocht agus ár nuálaíocht.
Bhain an tAontas leas as na hacmhainní ar fad a bhí ar fáil dó chun cuidiú leis na Ballstáit an fhreagairt ar an leibhéal náisiúnta a chomhordú, cuir i gcás eolas oibiachtúil a chur ar fáil faoi leathadh an víris, faoi na hiarrachtaí éifeachtacha a bhí á ndéanamh chun é a shrianadh agus faoi na bearta a bhí ar bun chun an damáiste eacnamaíoch agus sóisialta a bhí déanta ag an bpaindéim a dheisiú.
Ar fud an Aontais, chuidigh bearta dlúthpháirtíochta idir tíortha, réigiúin agus daoine chun an phaindéim a chomhrac agus a shárú.
Chun tacú leo siúd a ndearna an phaindéim difear dóibh ó thaobh na heacnamaíochta de, chun tús a chur le téarnamh na hEorpa agus chun poist a chosaint agus a chruthú, mhol an Coimisiún Eorpach plean téarnaimh ollmhór don Eoraip, plean a bhí bunaithe ar leas iomlán a bhaint as buiséad an Aontais.
Ón leathanach seo, is féidir teacht ar rogha acmhainní i dtaca le COVID-19 a d’fhoilsigh institiúidí an Aontais agus tíortha an Aontais le linn na paindéime.