Apol
Apol (par grêc Απόλλων) al è une divinitât de antighe religjon greghe, diu de medisine, de musiche e de profezie; po dopo al è stât cjapât dentri ancje inte religjon romane. A Aquilee al jere la divinitât plui venerade, par vie dal sincretisim cul cult dal precedent diu celtic Belen, ancje lui divinitât solâr e de medisine. Al jere patron de poesie, protetôr des Musis, e al ven ancje descrit tant che un arcîr in grât di fâ patî, cu la sô arme, pestilencis teribilis ai popui che lu contrastavin. Tant che protetôr de citât e dal templi di Delfi, Apol al jere ancje venerât come diu oracolâr, bon di pandi il futûr midiant de sacerdotesse clamade Pizie o Pitonesse. Par chest, al jere adorât inte antichitât tra i dius plui impuartants dal Dodekatheon. Inte tarde antichitât greghe Apol al è stât ancje identificât come diu dal Soreli, e in tancj câs al à cjapât il puest di Helios tant che puartadôr di lûs e aurighe dal cjar dal soreli. Un "passaç di consegnis" de stesse sorte al è stât li dai Romans: a partî de tarde etât Republicane, Apol al è deventât "alter ego" dal Sol Invictus, une des divinitâts romanis plui impuartantis. Come divinitât greghe, Apol al è fi ilegjitim di Zeus e di Letò e il fradi zimul di Artemide (pai Romans Diane), vergjine dee de cjace e plui tart assimilade a Selene, divinitât de Lune.
![](http://upload.wikimedia.org/wikipedia/commons/thumb/6/65/Nicolas_R%C3%A9gnier_-_Apollo.jpg/220px-Nicolas_R%C3%A9gnier_-_Apollo.jpg)
![](http://upload.wikimedia.org/wikipedia/commons/thumb/2/25/Apollo_Olympia.jpg/150px-Apollo_Olympia.jpg)