Balilla
ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
![](http://upload.wikimedia.org/wikipedia/commons/thumb/8/86/Giuseppe_Comotto-rivolta_in_Portoria_col_Balilla.jpg/250px-Giuseppe_Comotto-rivolta_in_Portoria_col_Balilla.jpg)
«Sò ri paeixi onde voî seì nasciûi, |
(Zan'Agostin Gastadi, Ra Gerusalemme deliverâ, XX,18) |
Balilla, ò Ballilla, o l'è o nomiagio atribuîo pe tradiçion a-o garçon de Portoia che, criando "Che l'inçe?" o 5 de dexembre do 1746 o tiò a primma sasciâ ch'a l'inandiò a solevaçion popolâ contra e truppe d'ócupaçion aostro-piemonteize.
A tradiçion popolâ do sestê de Portoia a l'identiffica o figiœu con Gian Batista Perasso, figgio de Antogno Maja, tenzao de sæa e de Maja Antogna Parodi, nasciuo a Zena inta parocchia de San Steva o 26 ottobre 1735, spozao o 3 luggio 1753 con Maja Françesca Contiña, da-a quæ o l'ebbe nœuve figgi, conso de l'arte di tenzoei de sæa into 1776, morto 45enne a Zena o 30 settembre 1781[1].
I fæti storrichi
[modìfica | modìfica wikitèsto]A Repubrica de Zena a l'aiva acatao o marchezato de Finâ da l'imperatô Carlo VI into 1713 pe-a somma de 1 mion e 200 mia scui[2]. So figgia Maja Teexo, a-o cedette torna, co-o tratao de Worms into 1743, stavotta a Carlo Manoælo III de Savoia, in cangio de l'agiutto dætoghe inta goæra de sucescion aostriaca. De repicco aloa Zena, imbozzonâ, co-o trattato d'Aranjuez (7 mazzo 1745) a s'alliò con França e Spagna, nemighe de l'Aostria e do Piemonte. I Gallo-ispano-zeneixi avançon verso nord vittorioxi pe scin che, battui a Piaxença o 16 zugno 1746, fun constreiti a retiâse lasciando Zena sguernia. I Aostriachi do generâ Brown ocupon San Pê d'Æña o 4 de settembre.
O l'undeman una piña da Ponçeivia a feççe ravaxo into campo aostriaco caozando un miggiâ de morti: co-o sæximo de pœuscia, o saieiva stæto quello o momento bon pe attaccâ.
O 6 de settembre o Botta o l'assonse o comando e o Senato da Repubrica, pensando de no poei resciste a l'invazô, o firmò a reiza. I Aostriachi ocupon a porta da Lanterna e quella de San Tomaxo.
L'8 o comissaio conte Cotek o domandò pe-e speize de goæra 3 mioin de lie zeniñe, o primmo da pagâ inte 48 oe, o segondo in œutto giorni e o terço in chinze. O governo o pagò o primmo mion, pigiandolo da-o Banco de San Zorzo e dapœu ciancianin atre 900.000 lie, ma de ciu o refiò de sborsâ. O Botta alloa o preteize un quarto mion, e o se misse a prœuvo a occupâ o resto da çittæ e a portâ via i artaggiaje.
L'ea o 5 de dexembre insce-o fâ da seja quande 'na battuggia de sordatti aostriachi a l'ea aprœuv'a rebelâ o mortâ da bombe Santa Cattæña da-a battaja da Cava in Caignan pe-e stradde do sestê de Portoia: a stradda a cedette e o mortâ o cazze' da-a caretta. Alloa, segondo a tradiçion, de mentre che i sordatti çercavan de convinçe a son de baccæ i Portolien ch'ean lie a agiuttâli, un garçonetto o pigiò un sascio, o criò "Che l'inçe?", e o-o tiò contra i sordatti. Scciupò a rivoluçion e a battuggia aostriaca a dove' fuzî sott'a 'na gragnoâ de prie.
O 10 de dexembre i insorti repigion e porte da çittæ e i Aostriachi abandonon San Pê d'Æña e scapon otra a Bocchetta. L'8 de zenâ 1747 o mortâ o fu riportao in trionfo da Portoia a-a Cava in Caignan. A goæra a continuò scin a-o 18 ottobre 1748, quande fu firmao a paxe d'Aquisgraña.
L'identitæ do Balilla
[modìfica | modìfica wikitèsto]No gh'è documento ch'o digghe che o garçon ch'o lançò a pria o foise ciammao "Ballilla".
I versci do Zan'Agostin Gastadi inta "Gerusalemme deliverâ"[3] porrieivan fâ riferimento a un atro "Ballilla".
D'atro canto di documenti do 1746 reçentemente re-descoerti inti fondi do Magistrato de Goæra, conservæ inte l’Archivio de Stato, fan mençun de 'n Dria Poistæ dito Ballilla[4], e comonque Ballilla, insemme a "Ballin" e "Balletta", doveivan ese di nomiagi da figioame ciutosto cumun a l'eppoca, baste pensâ che int'a comeddia do 1697 "Il genio ligure trionfante" do Zan'Aostin Polinâ un di personaggi o l'ea o "capoâ Balilla"[5].
L'unnico documento de l'eppoca ch'o çitta o nomiagio do figgiœu ch'o tiò o sascio o l'è o Bellum Genuense, un poemetto anonnimo scrito inte'n latin macaronnego dove a-i versci 122-123 se leze: cognomine dictus Mangiamerda fuit primus certaminis autor[6] (pe "mangiamerda" s'intende un figiœu picin, un bon a ninte, che però o l'ha saciuo fâ un miaco[7]).
Sciben che a tradiçion popolâ do sestê de Portoia a n'agge tramandao che o figiœu ch'o tiò o sascio contra i Aostriachi e o l'inandiò a rivoluçion do 1746 o foise Gian Batista Perasso dito Ballilla figgio de Antogno Maja, tenzao de sæa nasciuo a Zena into gêxâ de San Steva o 26 ottobre 1735, no gh'è documento de l'eppoca ch'o-o prœuve.
Into 1851 o canonnego Gioxeppe Oivê de Montœuggio, bibliotecaio d'a Berio, o scrisse a-a dreitua into so vocabolaio zeneize-italian che o Balilla o l'ea de Montœuggio[8], questo perchè gh'ea stæto pe'n davei un Giobatta Perasso nasciuo a Praolongo de Montœuggio into 1729, e o præve Giobatta Minaggia, de Montœuggio, o l'aiva contao a-o canonnego Oivê che sto Perasso chì o gh'aiva dito che lê o l'ea quello mæximo ch'o l'aiva tiao a primma sasciâ a-i Aostriachi.
Into 1881 una comiscion muniçipâ composta da de personalitæ comme o prof. A. G. Barrî, l'avv. Cornelio De Scimon, o prof. L. T. Belgrano e o marcheize M. Stagen doppo avei sentio a testimoniança de quarche vegio do sestê de Portoia ch'o riferiva quello ch'o l'aveiva ódío da-i so messiavi ch'aivan conosciuo in persoña o Ballilla, a concruze poeise stabilî a squæxi çerteçça che o Balilla o fu o Giambattista Perasso battezzao inta gexa de San Steva[9].
Notte
[modìfica | modìfica wikitèsto]- ↑ (IT) F. Ridella, Balilla, Zena, 1934.
- ↑ (IT) Claudia Merlo, Mario Labò e Carlo Bornate, Finale Ligure, Enciclopedia Italiana, 1932.
- ↑ Zan'Agostin Gastadi - Ra Gerusalemme deliverâ - 1755, XX-18: Sò dî se l'è ro Gioppo o pù Ballilla
- ↑ 5 Dixembre 1746 - Balilla (PDF), in A Compagna, Anno XLIV, n. 1, Zenâ-Março 2012.
- ↑ (IT) Fiorenzo Toso, La letteratura in genovese: ottocento anni di storia, arte, cultura e lingua in Liguria, vol. 2, Recco-Udine, Le Mani, 1999, ISBN 88-80-12136-7.
- ↑ Archivio de Palaççio Rosso, ms. 1160
- ↑ (IT) E. Pandiani, Ancora sull'insurrezione genovese del 1746 e sul Balilla, in Giornale storico e letterario della Liguria, X, 1934.
- ↑ (IT, LIJ) Giuseppe Olivieri, Dizionario genovese-italiano, Zena, Giovanni Ferrando, 1851, p. 239.
- ↑ Pandiani op.cit.
Atri progetti
[modìfica | modìfica wikitèsto]Wikimedia Commons a contêgne di files in sce Ballilla
Contròllo de outoritæ | VIAF (EN) 57673566 · ISNI (EN) 0000 0000 2529 515X · SBN (IT) LIGV023335 · LCCN (EN) n79043722 · GND (DE) 128769785 · BAV (EN, IT) 495/351288 · CERL cnp00510706 · WorldCat Identities (EN) n79-043722 |
---|