Giulio Cesare
ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
Gaio Giulio Cesare ò Çesae, (ciu antig. Çezaro, lat. C. Iulius Caesar). - Generâ roman, triunviro, dittatô (Romma 100/102 - 44 a. C.).
Nasciúo da nobile famiggia romaña, o fu bandio da Scilla; o prestò servizio inte province de l'Axia Minô tra l'81 e o 78, o fu questô into 70, edile into 65, pontefixe mascimo into 63, pretô in Spagna into 62. A Romma into 60 a. o Cesare o constituì o primmo triumvirato co-o Pompeo e o Crasso. Console into 59, o conquistò a Gallia. Invitao da-o Senato a depoñe l'imperium, o marciò contra-o Pompeo into 49. Sconfito i aversai in Spagna, o guágnò ascì a battaggia de Farsalo, in Tessaggia (48). Passao in Egitto, o debellò i pompeien in Affrica a Tapso (46) e a Munda (45). Tornao a Romma, nominao dittatô, o fu amaççao inte una congiua o 15 março do 44 a. mentr'o se açinzeiva a 'na spediçion militâ in Oriente.
Vitta e attivitæ
[modìfica | modìfica wikitèsto]I so nobili natæ son derivæ da l'apartenença a-a gens Iulia, mentre da so dæta de nascita no gh'è çerteçça. Nevo de Marrio e zenne de Cinna, do quæ o l'aiva sposao a figgia Cornelia, o fu misso a-o bando da Scilla. Se segnalò inte l'asciddio de Mitilene e o parteçipò co-o Servilio a-a campagna contra i pirati into 78. Morto Scilla, o se misse in vista con di procesci sciaatoxi contra de note personalitæ, da pœu o se recò a Rodi a studiâ retorica. O caze' prexonê di pirati, o fu liberao, e doppo aveili punii co-in'aodaxe spediçion, o parteçipò a-a terça guæra mitridatica.
O l'apoggiò o Pompeo (do quæ o vègne da pœu cugnao, into 67, sposando a Pompea) e o Crasso inta so œuvia de demoliçion da constituçion scillaña. O fu questô in Spagna into 70, edile into 65, pontefixe mascimo into 63.
Averso a l'oligarcia dominante da quæ o conosceiva ben, no sença ésine parteçipe lê mæximo, a coruçion e i dissensci e o desprexava l'incapaçitæ de governo, o no fu estranio a-i preparativi rivoluçionai do Catiliña, ma, prevedendone o fallimento, o se ne separò in tempo, pù çercando da pœu de sarvâ i conzuæ da-a peña de morte.
Into 62 fu pretô e into 61 propretô in Spagna dov'o s'inricchì a speize di sudditi no meno di atri governatoî de quello tempo e o fu coscì in grao de pagâ i debiti di quæ lê ascì o l'ea oberao.
Inandiao ormai a vegnî un tra i ciu potenti ommi politichi de Romma, o s'acordò into 60 (o coscì díto primmo triunvirato) con doi maggiorenti i quæ pe-e so riccheççe e pe-o credito aquistao co-e so vittoie aspiavan a 'na superioitæ che da di atri ciu liggi a-e tradiçioin repubblicañe a l'ea contrastâ, o Pompeo (o quæ o sposò a figgia do Cesare, Giulia) e o Crasso. I trei dominon effettivamente, sciben che illegalmente, a repubbrica. O Cesare o fu eletto console pe-o 59. O feççe aprovâ una lezze agraia ch'a l'ordenava a distribuçion de tære ancon disponibile.
Mediante un plebiscito o l'ebbe o comando militâ da Gallia Cisalpiña e de l'Illiigo, a-o quæ o Senato o l'azonse a Gallia Narbonense. Inta Gallia o l'intervegne subbito contro i Elveççi che menaççavan a provinça romaña, vinçendoli a Bibratte (58), e contro o prinçipe germanico Ariovisto, ch'o s'ea stabilio inta Gallia, costrenzendolo a ripassâ o Ren. Into 57 o vinse i Nervi e o sottomisse o paise di Belgi. Into 56 o sottomisse i Veneti de l'Armoega e mentre o so lœugotenente Publio Crasso, figgio do triunviro, o l'ocupava l'Aquitania, o sconfisse i Moin e i Menapi, portando a termine l'ocupaçion do Belgio. Into 55 o disperse i Tentei e i Uxipeti, e pe compî un'açion dimostrativa contro i so aliæ o feççe costruî un ponte in sce-o Ren, o traversò o sciumme, o devastò o paise di Scigambri e quello di Ubi. O se voze' quindi a-a Britannia organizzando doe spediçioin into 55 e into 54 ma o trovò fea rescistença. Tornao in Gallia, o dovette frontezzâ i agitaçioin organizzæ specialmente da l'Ambiorixe, cappo di Eburoin, e contro de lê o dovette condue una gueriggia sfibrante e sterile. A rebellion a razonse o so curmine into 52, sotta a guidda de Verçinzetorixe. O Cesare o preize Avaigo, o fallì davanti a Gergovia, ma doppo avei constreito o Verçinzetorixe a rifugiâse a Alexia, o ghe l'ascidiò e mediante un'açion militâ genialiscima o-o vinse e o mandò prexonê a Romma. Quindi, con di açioin risolutive contra i poppoli no ancon sozovæ, o compì l'œuvia de conquista da Gallia.
![](http://upload.wikimedia.org/wikipedia/commons/thumb/7/7a/Caesar_campaigns_gaul-en.svg/220px-Caesar_campaigns_gaul-en.svg.png)
O triunvirato co-o Pompeo e o Crasso, rinovao inte l'acordio de Lucca (56), o s'ea desfæto co-a morte do Crasso (53), e o Pompeo, aprofittando de l'assença do Cesare, o l'ea de fæto o padron de Romma. Quande-o Cesare, a-a fin da guæra gallica, o poze a candidatua a-o consolato, o Pompeo o preteize che-o Cesare o foise presente a Romma doppo avei deposto l'imperium. O Cesare, ch'o no voeiva mettise in tâ moddo a-a merçè do Pompeo, o se preparò a-o conflito armao. Deciarao nemigo pubbrico, o varcò a-o Rubicon o confin de l'Italia (zenn. 49), violando a lezze ch'a vietava a presença in Italia di magistræ investii de imperium provinciâ. In sostança, o Cesare o voeiva avei sotta man e so fedele legioin inte l'atto de fáse defei o consolato, mentre ço no poeiva êse consentio da-o Pompeo o quæ, pù voendo primezzâ int'o stato, o tegniva lontañe inta Spagna e so legioin e o l'amiava coscì a aseguáse ùna specce de prinçipato legâ che molti oligarchichi ean propensci a açettâ.
Ma aponto pe questo o se trovò in Italia dezarmao de fronte a-o Cesare. Questi co-ina legion o l'avançò con tanta rapiditæ che-o Pompeo o vidde imposcibile ogni rescistença e o se retiò in Greçia. Ocupâ Romma e l'Italia, o Cesare o conquistò l'aliâ Marseggia che, fedele a-o Senato, a gh'aveiva refiao obediença, o domò in Spagna e legioin do Pompeo comandæ da l'Afranio e o Petreio. O se vóze' quindi contra o Pompeo ch'o l'aveiva organizzao in Oriente un esercito noteive, ma no aguerio e omogeneo comme quello do Cesare; no l'è quindi maaveggia se doppo alterne vexende o Cesare o riportò in sce-o Pompeo a decixiva vittoia de Farsalo (48); o Pompeo fu da pœu assascinao in Egitto dov'o l'aveiva çercao scampo. Recaose a Lusciandria, o Cesare o pose in sce-o trono d'Egitto a Cleopatra, o vinse o Farnaxe II into gio de 5 giorni (veni vidi vici) presso Zela (47). Lasciao in Italia magister equitum o Marco Antogno, o sbarcò in Africa dove i Pompeien, aliæse a-o Giuba I de Numidia, se mostravan menaççoxi e nonostante l'infeioitæ de forçe o-i vinse a Tapso (46): o Labien, ex cesarian, e i figgi do Pompeo fuzzin in Spagna; i maggioî esponenti da façion e o Giubba perin, o Caton o se dette a morte. A Munda (45) o sconfisse o Gneo Pompeo, figgio do Grande.
Padron ormai do stato, o l'ateize con eceçionâ sagaxa e energia a riordinâ a cosa pubbrica e, sorvetutto, a consolidâ into mæximo tempo l'aotoritæ centrâ e i aotonomie locæ. Doppo a battaggia de Farsalo o l'ebbe a dittatua a tempo indeterminao, o consolato pe 5 anni, a poistæ tribuniçia a vitta, pe trei anni o tègne a praefectura morum, doppo a vittoia de Munda o riçeve' da-o Senato o tittolo de imperator: questa somma de poei çivî e militæ a configuava o so governo comme 'na monarchia. O riordinò o stato co-ina serie de lezze, o completò a so posta o Senato, o dedusse de colonie, o distribuì de tære a-i so veteren, o riformò o calendaio, o disegnò di aodaxi progetti urbanisteghi in Romma. Dexidioso de paxificâ i añimi, o l'amnistiò i nemixi; o l'adottò l'Ottavio, o futúo Aogusto. Quæ che foisan i so concetti definitivi in sce-e forme da dâ a-o so governo, çerto l'è, e a nisciun sfuzziva, ch'o l'intendeiva conservâ e transmette a 'n sucessô a pineçça de l'aotoritæ ch'a l'ea inte so moen. E questo o spiega o contrasto into quæ se trovava con lê tutti quelli, e ean tanti, che pe di motivi diversci arestavan ataccæ a-a tradiçion da libertæ repubbricaña.
Formaose 'na congiua de circa 60 senatoî, capezzæ da-o Bruto e da-o Cascio, o fu amaççao con 23 corpi de pugnâ inta Curia Pompeia davanti a-a stattoa do Pompeo a-e ide de março do 44 a. C.
Ma se tanti di disegni do Cesare perin con lê, una gran parte da so œuvia a ghe sorvevisse: ançitutto a concescion da çittadinança a-i Transpaden, pe-a quæ l'Italia into senso politico a razonse effettivamente o confin di Arpe, da pœu a conquista da Gallia e l'inandio a-a piña integraçion di Galli into mondo Roman (pres., esercito, vitta pubbrica), ch'o feççe de questo paise un centro e un baloardo da civiltæ latiña. Infin co-a rapiditæ, arditeçça, organiçitæ da so œuvia de legislaçion e de governo, o mostrò i vantaggi che poeiva aveighe Romma da l'aboliçion de l'oligarchia senatoia a-a quæ se doveiva o mágoverno do quæ sofriva a çittæ e l'Impeo, e in tâ moddo o l'axeivoò a-o so erede e sucessô Ottavian a via ch'a-o condusse a-o prinçipato.
O so retræto o n'è noto segge da-e monæe, segge da de teste marmoie (Pisa, Camposanto, Vatican, Berlin, Nappoli, Castello de Agliè), e da-a statua loricâ into Paaxo Senatoio a Romma; tutte presentan un voto magro, ossúo, con inçipiente carviççie, sbarbao. A figua do Cesare a l'ha inspiao numeroxi artisti e di œuvie d'arte d'ogni tempo, specie de tiatro.
Œuvie
[modìfica | modìfica wikitèsto]![](http://upload.wikimedia.org/wikipedia/commons/thumb/1/1e/Julii_Caesaris_quae_exstant.tif/lossy-page1-220px-Julii_Caesaris_quae_exstant.tif.jpg)
O Cesare o fu ascì eccellente scritô, libero da modelli, guidao solo da-o so genio. Se çitta do Cesare zoeno un poemetto Laudes Herculis, una tragedia Oedipus, di atre poexie legge; ciu tardi (46 a. C.), durante a marcia da Romma a Munda o compose un poemetto d'imprescioin de viægio: iter. O l'arecugette ascì di moddi de dî argui (Dicta ò Apophthegmata). De l'oratoia, tutta politica, do Cesare, ben ammirâ da-i so contemporanei e esaltâ da-o Çiçion mæximo e doppo da-o Quintilian e aatri, no resta ninte. O s'ocupò ascì de teorie lenguisteghe into trattao De analogia, do 54, dedicao a-o Çiçion, in doi libbri; o ghe mostrava che base d'ogni eloquença a l'è a çernia de paole e che bezœugna fuzzî e paole insolite; prinçipio baxilâ n'ea a ratio, l'analogia di Lusciandrin. Importante doveiva êse l'Anticato, finta oraçion giudiçiaia in risposta a-o panegiico do Çiçeron pe-o Caton morto. De lettie de Cesare gh'emmo solo di sazzi inta coleçion de lettie çiçioniañe: brevi, limpide, concise. Grave sorvetutto a l'è a perdia de relaçioin a-o Senato in sce-e operaçioin inta Gallia.
I Commentarii de bello Gallico, composti rapidamente inte l'inverno 52-51, e quelli de bello civili dovieivan êse, comme dixe a paola commentari, sencia arecugeita de materiâ pe storichi e poeti futui; ma za o Ciceron giudicandoli da-o ponto de vista lettiaio, o i dixeiva nudi, recti, venusti, azonzendo che-o Cesare o l'aveiva levao a-o futúo storico a poscibilitæ de racontâ quelli fæti megio de lê. O carattere evidentemente apologetico de quelli o rende necessaie de riserve in sce-a veitæ do contegnúo, specialmente pe-i Commentarii de bello civili. O Bellum Gallicum o dà in 7 libbri o conto di anni de guæra da-o 58 a-o 52: da-a spediçion contra i Erveççi scin a-a vittoia definitiva. O Bellum Civile in trei libbri o dà o conto di fæti da-o 49 a-o 48: da-o Rubicon a Lusciandria. Di ofiçiæ do Cesare completon l'œuvia: l'Aulo Irçio o scrisse un ottavo libbro do Bellum Gallicum comprendente i avegnimenti do 51 e do 50, sforçandose de seguî into scrive a mainea do Cesare; no lontan da lê (e segondo i ciu, aoa, da identificase con lê) l'è l'aotô do primmo di trei scriti in continoaçion do Bellum Civile contegninti i eventi de guæra di anni 47, 46, e 45: Bellum Alexandrinum, Bellum Africanum, Bellum Hispaniense (incompleto). I aotoî di atri doi, ignoti, son ben infeioî pe lengua e stile.
Conligaménti esterni
[modìfica | modìfica wikitèsto]Wikimedia Commons a contêgne di files in sce Giulio Cesare
Contròllo de outoritæ | VIAF (EN) 286265178 · ISNI (EN) 0000 0003 8247 3815 · SBN (IT) CFIV024046 · LCCN (EN) n79021400 · GND (DE) 118518275 · BNF (FR) cb11894764p (data) · BNE (ES) XX841352 (data) · ULAN (EN) 500077373 · NLA (EN) 36153573 · BAV (EN, IT) 495/42092 · CERL cnp01316739 · NDL (EN, JA) 00435043 · WorldCat Identities (EN) n79-021400 |
---|