بحر اوقیانوس
![](http://upload.wikimedia.org/wikipedia/commons/thumb/0/06/Atlantic_Ocean.png/250px-Atlantic_Ocean.png)
اٹلانٹک ساگر دنیا دا دوجا وڈا سمندر یا ساگر اے تے ایہنے زمینی پدھر دے پنجویں حصے نوں گھیریا ہویا اے۔ ایہدا انگریزی ناں 'اٹلانٹک' یونانی لوک کہاݨیاں توں لیا گیا اے تے اٹلانٹک دا مطلب اطلس دا پتر اے ۔
ایہ سمندر دا ٹوبھا انگریزی حرف "ایس" دی شکل وچ اُبھے توں لمے ول پھیلیا ہویا اے ۔ ایہدے لہندے پاسے اتلا امریکہ تے دکھنی امریکا تے چڑھدے پاسے یورپ تے افریقا نیں ۔ ایہہ آرکٹک ساگر، پیسفک ساگر، اِنڈک ساگر تے دکھنی وڈا سمندر نال ملیا ہویا اے ۔ پیسفک ساگر تے اٹلانٹک ساگر نوں پاناما نہر وی آپس وچ جوڑدی اے ۔
اٹلانٹک ساگر نے زمین دے تقریبن ٪20 حصے نوں گھیریا ہویا اے تے ایہ رقبے وچ ایہ پیسفک ساگر توں چھوٹا اے ۔ اپݨے رَلدے سمندراں نوں رلا کے ایہدا رقباہ 10 کروڑ 64 لَکھ مربع کلومیٹر اے تے ایہناں توں بغیر 8 کروڑ 24 لَکھ مربع کلومیٹر اے ۔ اٹلانٹک ساگر دی ڈونگھ 3926 میٹر اے تے چوڑائی کدھرے گھٹ تے کدھرے ودھ اے ۔ ایہدی گھٹ توں گھٹ چوڑائی برازیل تے لائبیریا دے وچکار 2848 کلومیٹر اے تے ودھ توں ودھ چوڑائی امریکا تے اُبھے افریقا دے وچکار 4830 کلومیٹر اے ۔ اٹلانٹک ساگر دا سمندری کنڈھا کٹیا پھٹیا ہویا اے تے بہت سارے سمندراں ،کھاڑیاں تے خلیجاں وِچ پھلیا ہویا اے ۔ ایہناں وِچ کیریبین سمندر ، خلیج میکسیکو ، خلیج سینٹ لارنس ، رومی سمندر ، کالا سمندر ، لیبراڈور سمندر اُبھاسمندر تے ناروی سمندر شامل نیں ۔ اٹلانٹک ساگر وِچ بہت سارے چزیرے نیں جیہناں وِچ گرین لینڈ ، برطانیا ، آئرلینڈ ، فاکلینڈ جزیرے تے لہندا انڈیز دے جزیرے وڈے نیں باقی بہت سارے چھوٹے جزیرے وی نیں ۔
![](http://upload.wikimedia.org/wikipedia/commons/thumb/9/97/The_Earth_seen_from_Apollo_17.jpg/25px-The_Earth_seen_from_Apollo_17.jpg)