Wikipedia
Wikipedia lii neetist leijee maaŋgâkielâsâš rijjâ tiätusänikirje, mon vuáđđun lii MediaWiki-tekniik, já mon paijeentuálih já moos čäälih iävtutátuliih. Kii peri puáhtá kuás peri editistiđ tom.
Wikipedia vuáđudui uđđâivemáánu 15. peeivi 2001. Vuáđudeijeeh láin Jimmy Wales já Larry Sanger. Wikimedia Foundation išedâš Wikipedia.[1]
Kielâversioh
Kuovâmáánust 2023 Wikipediast lijjii ohtsis 318 kielâversiod. Toi lasseen láá lamaš 11 kielâversiod, moh láá tastoo kiddâdum. Vittâ artikkâlmiärálávt stuárráámuu Wikipedia oornigist láá eŋgâlâskielâlâš, cebuanokielâlâš, saksakielâlâš, ruotâkielâlâš já ranskakielâlâš Wikipedia. Ohtsis 18 Wikipediast láá paijeel miljovn artikkâlid já 71 Wikipediast paijeel 100 000 artikkâlid.[2]
Veikkâ cebuano- já ruotâkielâliih Wikipediah láá artikkâlmiärálávt vittâ stuárráámuu Wikipedia juávhust, maaŋgâid tai artikkâlijn láá ohtâ booti automaatlávt ráhtám. Ovdâmerkkân ive 2014 Lsjbot rahtij suulân peel ruotâkielâg Wikipedia artikkâlijn. Booti rähtim artikkâlij kvaliteet ij lah nuuvt pyeri já tassaažân paijeel miljovn täin láá meddâlistum ruotâkielâg Wikipediast. Cebuanokielâlâš Wikipediast láá siämmáálágán čuolmah, mut tobbeen botti lii ráhtám paijeel 99 % puoh artikkâlijn. Cebuano- já ruotákielâ lasseen Lsjbot lii ráhtám artikkâlijd waray-waraykielâlâš Wikipediast siämmáánáál já siämmáá čuolmâigijn.
Käldeeh
- ↑ Frequently asked questions - Wikimedia Foundation donate.wikimedia.org. Čujottum 27.2.2023. (eŋgâlâskielân)
- ↑ List of Wikipedias - Meta meta.wikimedia.org. Čujottum 27.2.2023. (eŋgâlâskielân)