რეკლამების შემზღუდავი – საიდუმლო იარაღი მომაბეზრებელი რეკლამების წინააღმდეგ.
იმატებს რეკლამები, მცირდება მოთმინება… დროა, დასრულდეს ეს სიგიჟე.
საშუალოდ ადამიანი დღეში 4 000 რეკლამას ნახულობს. თუ მიგაჩნიათ, რომ ეს ზედმეტად ბევრია, რეკლამების შემზღუდავი გამოგადგებათ.
რეკლამების შემზღუდავი მცირე ზომის პროგრამაა, რომლითაც ხერხდება რეკლამების აკრძალვა ორი გზით. ერთ შემთხვევაში იზღუდება მომავალი სიგნალი სარეკლამო სერვერიდან, შესაბამისად, რეკლამა ვეღარ ჩამოიტვირთება გვერდზე გამოსაჩენად. მეორე შემთხვევაში კი მოცილდება ის არეები, სადაც რეკლამები უნდა გამოჩენილიყო.
ეს რეკლამები შეიძლება იყოს ხმამაღალი ვიდეოები ან სარეკლამო საშუალებები, რომლებიც თან დაგყვებათ მთელ ინტერნეტში, თვალის მდევნელი, გარეშე საიტების ფუნთუშები და ა. შ. რეკლამების შემზღუდავის გამოსაყენებლად შეგიძლიათ მოიძიოთ შესაბამისი დამატება თქვენი ბრაუზერისთვის. მაგალითად Firefox-ს აქვს რეკლამების შემზღუდავი დამოწმებული დამატებების სია. დაწკაპეთ ამ სიაზე (ან თქვენი ბრაუზერისთვის განკუთვნილ რეკლამების შემზღუდავებზე) და შეარჩიეთ ის, რაც ყველაზე უკეთ მოერგება თქვენს საჭიროებებს.
მონახეთ რეკლამების თქვენთვის შესაფერისი შემზღუდავი
შეგიძლიათ იხილოთ AdBlocker Ultimate, რომელიც ყველანაირ რეკლამას აცილებს, მაგრამ პასუხისმგებლობით გამოყენებას მოითხოვს. ზოგიერთი თქვენი საყვარელი საგაზეთო და ახალი ამბების საიტი სწორედ რეკლამებით იღებს შემოსავალს. თუ ბევრი ადამიანი შეზღუდავს რეკლამებს, შესაძლოა, ეს მათი საქმიანობისთვის დამღუპველი აღმოჩნდეს.
ყველაზე საშინელი ამომხტომი რეკლამებია. მათ შესაზღუდად გამოიყენეთ Popup Blocker და აღარასდროს შეწუხდებით ამომხტარი სარკლმებით.
ფართოდ გავრცელებული რეკლამების შემზღუდავი ბრაუზერებისთვის Chrome, Safari და Firefox, არის AdBlock. გამოიყენეთ რეკლამების შესაზღუდად საიტებზე Facebook, YouTube და Hulu.
შექმენით მეთვალყურეებისგან თავისუფალი სივრცე შიგთავსის შეზღუდვით
Firefox-ზე შეგიძლიათ, გამოიყენოთ პირადულობის ან შიგთავსის შეზღუდვის პარამეტრები კიდევ უფრო უკეთ სამართავად იმ სარეკლამო საშუალებებისა, რომლებიც რეკლამების შემოთავაზებას ცდილობენ.
![](https://www.mozilla.org/media/img/firefox/features/adblocker/content-blocking-title.822c26e3fdfa.png)
აირჩიეთ სასურველი დაცვის დონე
დასაწყებად დაწკაპეთ მისამართების ველის მარცხნივ მდებარე ფარს ნებისმიერ ვებგვერდზე და აირჩიეთ „უსაფრთხოების პარამეტრები“. შედეგად გაიხსნება Firefox-ის პარამეტრებში პირადულობისა და უსაფრთხოების არე ახალი ჩანართით. იქვე იხილავთ ლურჯად გამოყოფილ რამდენიმე ასარჩევს.
ჩვეულებრივი დონე მსუბუქი დაცვისთვის
თუ რეკლამები არ გაღელვებთ და არ ფიქრობთ, რომ მეთვალყურეები და გარეშე ფუნთუშები თვალს გადევნებთ, ჩვეულებრივი დონე თქვენთვის მისაღები იქნება. მეთვალყურეების ასარიდებლად კი პირადი თვალიერების ფანჯრის გამოყენება შეგეძლებათ.
![](https://www.mozilla.org/media/img/firefox/features/adblocker/content-blocking.4b6239a744d0.png)
მკაცრი დონე ძლიერი დაცვისთვის
თუ ზედმეტად ბევრი რეკლამა გაღიზიანებთ, მაშინ მკაცრი დონე გამოგადგებათ. მოცემულ რეჟიმში ყველა ცნობილი გარეშე მეთვალყურე და ფუნთუშა შეიზღუდება Firefox-ის ნებისმიერ ფანჯარაში.
საკუთარი მითითებებით მორგებული
მორგებული პარამეტრები თავისუფალი არჩევანის საშუალებას გაძლევთ. თავად შეგიძლიათ, გადაწყვიტოთ, შეზღუდოთ თუ არა მეთვალყურეები, ფუნთუშები და ა. შ. თუ ნებას დართავთ ფუნთუშების რომელიმე საიტიდან მიღებას, თავისთავად გადაირთვება მორგებულ რეჟიმზე.
![](https://www.mozilla.org/media/img/firefox/features/adblocker/content-blocking-custom.62f7fe5cb242.png)
დაფარეთ კვალი მეთვალყურეებისგან
მეთვალყურეების უჯრის მონიშვნით შეძლებთ მათ შეზღუდვას ორი გზით. ერთ შემთხვევაში მხოლოდ პირად ფანჯრებში, მეორე შემთხვევაში ყველა ფანჯარაში. გაითვალისწინეთ, რომ ყველა ფანჯარაში შეზღუდვის შედეგად, ზოგიერთი საიტი შეიძლება არასათანადოდ ჩაიტვირთოს.
![](https://www.mozilla.org/media/img/firefox/features/adblocker/custom-trackers.67af71a5c851.png)
ნუ ჩაკბეჩთ ფუნთუშებს
ფუნთუშები გეგზავნებათ საიტების მონახულებისას. ისინი თავსდება თქვენს კომპიუტერში და თვალს ადევნებს, თუ რას აკეთებთ საიტზე. თუ ავიახაზები ზრდის თქვენს შეფასებას, რადგან ყოველდღე ათვალიერებთ ბილეთების ფასებს, ეს სწორედ ფუნთუშების დამსახურებაა.
Firefox-ში შეგიძლიათ შეზღუდოთ ყველა გარეშე ფუნთუშა ან მხოლოდ მეთვალყურეების მიერ დაყენებული. ყურადღება გამოიჩინეთ, ვინაიდან ყველა ფუნთუშის შეზღუდვით ზოგი საიტი ვეღარ მუშაობს გამართულად.
![](https://www.mozilla.org/media/img/firefox/features/adblocker/third-party-cookies.93b5900aff17.png)
გაგზავნეთ მოთხოვნა „არ მითვალთვალო“
თუ არ გსურთ თქვენი მოქმედებები ინტერნეტში რეკლამებისთვის გამოიყენონ, საიტებს შეგიძლიათ გაუგზავნოთ მოკრძალებული გზავნილი „გმადლობთ, არა“, Firefox-ში არ მითვალთვალო უჯრის მონიშვნით. ყველა საიტი არ იღებს ამგვარ მოთხოვნებს, მაგრამ რომლებიც იღებს, წყვეტს მომხმარებლის მონაცემების შეგროვებას.
![](https://www.mozilla.org/media/img/firefox/features/adblocker/dnt_screenshot.3bb5bc5d99ca.png)
აჩქარება რეკლამების შემზღუდავების მეშვეობით
ზოგ შემთხვევაში რეკლამების შემზღუდავი გეხმარებათ გვერდების სწრაფ მონახულებაში. რეკლამის ჩატვირთვა ანელებს ხოლმე გვერდის სრულად ჩატვირთვას. ამასთანავე, იგი ართულებს საიტზე სასურველი ინფორმაციის მონახვას, მით უფრო, თუ გიწევთ ბანერის დახურვა შიგთავსის სანახავად.
თუ გსურთ უკეთ გაეცნოთ რეკლამის შეზღუდვის შესაძლებლობებს, ასობით გაფართოება არსებობს Firefox-ისა და სხვა ბრაუზერებისთვის. თუ გსურთ გამოცადოთ სარეკლამო შემზღუდავები, რომელთაც Firefox იყენებს, დაწკაპეთ აქ და ჩამოტვირთეთ ბრაუზერი, რომლისთვისაც თქვენი პირადულობა უწინარესია.