三藩市

三藩市同埋縣 City and County of San Francisco
市旗	市徽
別名：舊金山、金門城市
國家	美國
州份	加利福尼亞州
建城日期	1850年4月15號
現任市長	Edwin M. Lee
面積 - 水面積	600.7平方公里 - 479.7平方公里，79.86%
人口 －總人口（2000年） －人口密度	776,733 6,423.2/平方公里
時區	UTC-8
位置 －經度 －緯度	122°26′W 37°46′N

 三藩市（粵拼：saam1 faan4 si5） （英文：San Francisco）係美國加利福尼亞州嘅一個城市，早年因發現金礦，有大量移民嚟到呢個地方。唐人又叫佢做金山。後來太平洋嘅另一邊，澳洲墨爾本都發現金礦，所以澳洲嘅叫新金山，三藩市就叫做舊金山。當地唐人亦叫佢做大埠，對應「二埠」沙加緬度同「三埠」士德頓。

三藩市人口喺美國排第十四同埋喺加州排第四。城市喺三藩市半島北角同埋係三藩市灣區嘅中心，西邊對住太平洋，東邊同北邊對住三藩市灣。

史

公元前3000年已經有印第安人住喺家下三藩市嘅地區，但係到1769年先有西班牙人發現呢度。1821年墨西哥從西班牙獨立之後呢度由墨西哥管。美墨戰爭期間美國海軍起個加州共和國（或者叫熊旗共和國）。

地理

三藩市喺加州主要嘅地震區。歷史上最大地震喺1906年，喺1851年、1858年、1865年、1868年同1989年都發生過大型地震。最近嘅地震喺2014年。

市區係典型嘅丘陵地帶，城內多上落斜嘅街道。市內有三個最出名嘅山坡：Nob Hill、Russian Hill同埋Telegraph Hill。

人口

三藩市人口喺2000年科技泡沫期間去到最高點，有776,733人。三藩市每平方英里16,000人嘅人口密度係全美國大城市第二高，僅次於紐約市。三藩市係三藩市灣區傳統上嘅商業文化中心，亦係「聖荷西—三藩市—奧克蘭」綜合統計區嘅構成部份之一，總人口有超過700萬人，喺2000年美國人口普查嗰時係第五大嘅統計區。

三藩市係一個以少數族裔佔多數嘅城市，因為非拉丁裔白人少過44%嘅總人口；亞裔（大部份係華裔）佔咗總人口31%；各拉丁裔族群總共佔總人口14%；非洲裔佔總人口8%，少過全美國非裔人口比例。成世都住喺三藩市嘅市民唔多，只有35%嘅市民喺加州出世，而有39%嘅市民喺外國出世。

三藩市有全美國各個縣之中最高比例嘅同性伴侶家庭，三藩市灣區亦有比美國其他都會區高嘅同性伴侶家庭比例。男同性戀多過女同性戀；據估計，五個35歲以上嘅男性人口就有一個係同性戀。

三藩市家庭喺2005年嘅每年收入中位數係$5萬7496，係全美國大城市之中排第五高。同美國其他地方趨勢一樣，中收入家庭嘅向外遷移造成三藩市唔小貧富差距，同時亦造成兒童僅佔14.5%嘅人口比例，比美國其他大城市都少。但係，三藩市得7.8%嘅家庭生活喺貧窮線之下，比全國平均少，亦係喺人口普查局統計之中最少嘅大城市之一。

流氓係三藩市自1980年代起經常面對嘅問題之一，亦係個具有爭議性嘅問題。一般相信三藩市係美國大城市之中流氓比例最高嘅城市。2003年嘅刑案同埋產物案犯罪率係每10萬人各有742和4943件，比全國平均要高。三藩市喺呢兩個犯罪案統計喺美國50大城市之中分別排第32同埋第38名。

文化

文化區域

三藩市各個區域都有唔同嘅文化風格：

唐人街（Chinatown）

華人集中地，就好似中國嘅「街市」（準確啲講係似「菜市場」），但係每日都有好多遊客光臨。

The Castro

卡斯特羅區，全球最著名嘅同性戀聚腳地，類似紐約嘅格林尼治村。

金融區

從金門大橋睇去金融區

Haight-Ashbury

二十世紀六零年代嬉皮士嘅發源地。

Hunters Point

工業區，非常暖和。

教會區（亦叫米慎區，Mission District）

三藩市市內陽光最燦爛嘅地方，原先主要係墨西哥餐館同酒吧，而家已經有唔少世界著名嘅各式餐館，重有好多嚟自南美，講西班牙話嘅墨西哥人，據聞，為數唔少係非法移民。

LGB Pride Parade

三藩市同志驕傲大遊行，每年六月第四個星期日，喺三藩市市區嘅市場街（Market St.）會舉行同志大遊行，係三藩市最熱門嘅觀光活動。

Noe Valley

啲屋大多數係維多利亞式嘅大型住宅，居民一般都好後生。

North Beach（北岸區）

意大利區同唐人街旁邊嘅區域，最著名係一家大蒜餐館（The Stinking Rose），所有菜餚都有大量嘅蒜。

Pacific Heights

同Nob Hill一樣係全市最貴嘅住宅區，可以睇到三藩市嘅全景。

Potrero Hill

工業區附近，山上可以睇到海灣橋同對岸奧克蘭嘅部分港口。

South of Market（SOMA）

市場街以南地區，酒吧，俱樂部同藝術家集中地，有好多貴嘅新建公寓。

列治文區（Richmond District）

俄羅斯，阿拉伯，而呢個區有一條華人聚居嘅街道叫克萊門街（Clement Street），所以呢個區又畀人稱為「新華埠」。同日落區分割嘅係金門公園，同佢分隔嘅係海洋海濱.

日落區

有人認為落日區係新興嘅唐人街，因為呢度商店大多係中國店，而且亦有好多華僑同埋華裔居民。呢個區係喺二次大戰左右建設，而家重有好多喺30年代或40年代就搬入嚟嘅退休人士。

田德隆區（The Tenderloin）

市內最窮亂嘅區，有好多成人商店同電影院。路上成日見到醉酒佬，道友同乞衣，同時亦係各類罪案嘅溫床。但佢位於旅遊區同商業區嘅側邊，財富差別非常明顯驚人。

• 三藩市 - San Francisco
• 
• 
• 
• 
• 
• 
• 
• 
• 
•