卡爾十六世古斯塔夫
卡爾十六世·古斯塔夫 Carl XVI Gustaf | |
---|---|
瑞典國王 | |
![]() 卡爾十六世響2023年 | |
在位 | 1973年9月15號 - |
加冕 | 1973年9月15號 |
前任 | 古斯塔夫六世·阿道夫 |
私人明細 | |
配偶 | 西爾維亞王后 |
仔女 | 維多利亞王儲 卡爾·菲臘王子 馬德蓮公主 |
全名 | 卡爾·古斯塔夫·福爾克·休伯圖斯 |
皇族 | 伯納多特王朝 |
父 | 古斯塔夫·阿道夫親王 |
母 | 薩克森-高堡-哥達嘅施比拉公主 |
出世 | ![]() | 1946年4月30號
![]() |
卡爾十六世·古斯塔夫(Carl XVI Gustaf,1946年4月30號—),全名卡爾·古斯塔夫·福爾克·休伯圖斯(英文:Carl Gustaf Folke Hubertus),係當今瑞典國王,1973年上任做到依家。佢同時亦係瑞典史上做得最耐嘅國王,而響全世界就僅次於英女皇伊利沙伯二世同埋丹麥女王瑪嘉烈二世。
簡歷
[編輯]早年
[編輯]![](http://upload.wikimedia.org/wikipedia/commons/thumb/c/c9/Sibylla_med_Prins_Gustaf_Adolf_och_alla_barnen.jpg/220px-Sibylla_med_Prins_Gustaf_Adolf_och_alla_barnen.jpg)
卡爾十六世1946年響哈加宮(原本叫王后樓)出世,係西博藤公爵古斯塔夫·阿道夫親王同施比拉公主最細嘅細路(同時亦係獨仔)、古斯塔夫阿道夫(嗰時係瑞典王儲)嘅長孫,上有四個家姐。響佢出世兩個月後,就到皇家教堂受洗。
因為個時瑞典國王係傳男不傳女,所以佢一出世就係瑞典王位嘅第四繼承人。同時,佢響無耐亦授予賈姆特蘭公爵呢個銜頭。
本身預計係由佢老豆西博藤公爵古斯塔夫·阿道夫親王繼承王位,之後先傳到卡爾。點知,西博藤公爵響1947年1月死於哥本哈根機場空難。由於佢老豆本身係大仔,係預定王位繼承人;但佢早死,而卡爾又太細個,唔可以勝任呢個位,就引發一系列嘅王位繼承爭議。當時,佢兩位叔叔都因為同平民結婚而放棄王室成員身份,所以最有聲望可以成為繼承人嘅係佢三叔伯達爾親王。但隨住爺爺古斯塔夫六世一直都冇立伯達爾做王儲,即係表示一定會傳畀大個咗後嘅卡爾。
1950年,佢太爺古斯塔夫五世死咗,由佢爺爺古斯塔夫六世繼位,卡爾亦因為咁而升為王儲。
接受教育
[編輯]![](http://upload.wikimedia.org/wikipedia/commons/thumb/6/64/Vasa_Carl_Gustaf_1961.jpg/220px-Vasa_Carl_Gustaf_1961.jpg)
佢細個嘅時光一直響皇室度過,亦響王宮入面接受教育。後嚟佢先後升讀Broms school同埋Sigtuna boarding school。
1966年,當佢高中畢業後,就到瑞典陸軍、瑞典海軍同瑞典空軍接受兩年半嘅軍事訓練。1968年,佢完成咗軍事訓練,而因此升到上尉(陸軍同空軍)同中尉(海軍)。佢亦曾經到烏普薩拉大學同斯德哥爾摩大學讀歷史、社會學、政治科學、財務權益同埋經濟學。
身為王位未來繼承人,佢接受咗好多教育,主要係法律系統、社會組織、工會、協會等等;另外佢仲會認真學習議會、政府各部嘅職能同工作方式,加埋點樣處理外交事務;佢更加響瑞典常駐聯合國代表團、瑞典國際發展代辦處、倫敦一間銀行、瑞典駐英國大使館、瑞典駐法國商會同埋Alfa Laval法國分廠做過嘢。
雖然佢讀咗好多書,但佢患有讀寫障礙。呢點亦遺傳到佢嘅大女維多利亞同大仔卡爾菲臘。
國王時代
[編輯]![](http://upload.wikimedia.org/wikipedia/commons/thumb/2/2e/King_Carl_XVI_Gustaf_at_National_Day_2009.jpg/220px-King_Carl_XVI_Gustaf_at_National_Day_2009.jpg)
1973年9月,老國王古斯塔夫六世死咗,同日卡爾接任,成為瑞典國王,稱號係卡爾十六世·古斯塔夫。雖然佢上位個時國王依然有最高權力,但議會逐漸有權威。
1974年,瑞典議會正式改咗瑞典憲法,由國王係最高元首,改為係虛位元首;國王只不過係純粹係代表性同埋禮儀性,而最高權力就響首相到,並且首相原先要由國王任命,依家就要由議長提名;而議會嘅法案都唔使經國王批准。總之依家國王只不過係個象徵。
另外,國王亦會代表瑞典對外國國事訪問、主持瑞典國會每年嘅開會儀式等等;名義上仲係瑞典三軍嘅最高統帥,但冇權指揮,除咗真係屬於佢嘅皇家軍事參謀(His Majesty's Military Staff);另外佢都有權任命或廢除任何一位王室成員。
佢仲會頒發每年嘅諾貝爾獎得主。第一個接受佢頒獎嘅人係江崎玲於奈。
按照原本嘅瑞典憲法,王位係傳男唔傳女,所以佢個仔卡爾菲臘當然係王位繼承人。但卡爾十六世出於性別平等,之後唔理反對聲音,要求通過憲法修正案,令到佢家姐(卡爾十六世嘅大女)維多利亞響1980年成為瑞典史上第一位女王儲[1]。
2000年,當時有厭食症嘅維多利亞王儲響健身室識咗丹尼爾·威士特寧,之後仲拍拖。卡爾十六世知道後非常反對。但係丹尼爾肯去學嚴格嘅皇室禮儀,最終得到咗國王嘅接受。佢哋響2009年結婚,而丹尼爾亦破天荒被封為「丹尼爾親王,西約特蘭公爵」。
2019年,佢宣佈分別取消卡爾菲臘王子嗰兩個仔亞歷山大王子、加百列王子,同埋瑪德蓮公主三個仔女莉奧諾公主、尼古拉斯王子、愛卓恩公主嘅「殿下」銜頭[2]。
2020年12月,卡爾十六世批評瑞典應對武漢肺炎嘅手法失敗。一個月後,佢宣佈會打疫苗[3]。
阿仔卡爾·菲臘王子曾經響2020年11月對武漢肺炎檢測呈陽性;響2021年3月,佢大女維多利亞王儲同老公丹尼爾一齊確診肺炎[3]。
屋企
[編輯]卡爾十六世個老婆叫西爾維亞王后(婚前名:西爾維亞·索摩拉特,英文:Silvia Sommerlath),係一位德國同巴西混血兒(老豆德國人・阿媽巴西人)。響1972年奧運會上,卡爾十六世識咗當時係一位翻譯嘅西爾維亞。國王後嚟話,當時佢哋一見面就「clicked」咗。
1976年6月19號,兩個人正式結婚。婚禮響斯德哥爾摩大教堂舉行,由時任烏普薩拉大主教奧羅夫·桑比主持。響1980年,卡爾十世六為咗畀細路有個更大嘅庭院,於是就搬咗去德羅汀漢皇宮(又叫卓寧霍姆宮)。
佢同老婆西爾維亞王后有三個仔女:
- 大女:維多利亞王儲(1977年7月14號 - ),全名Victoria Ingrid Alice Désirée,嫁咗畀西約特蘭公爵丹尼爾親王,有兩個仔女
- 大仔:卡爾·菲臘王子(1979年5月13號 - ),全名Carl Philip Edmund Bertil,娶咗蘇菲亞·赫克維斯,生咗三個仔女
- 細女:馬德蓮公主(1982年6月10號 - ),全名Madeleine Thérèse Amelie Josephine,嫁咗畀基斯多福·奧紐爾,生咗三個仔女
另外,卡爾十六世同多位歐洲國家嘅現任王室成員有血緣關係:其中丹麥女王瑪嘉烈二世係佢表姐(卡爾十六世個老豆西博藤公爵,同瑪嘉烈二世個阿媽英格麗公主係兄妹關係);前任希臘王后安妮-瑪麗係卡爾十六世個表妹(瑪嘉烈二世個細妹);而薩克森-高堡-哥達王朝現任王室首領安德烈阿斯係佢表哥(阿媽施比拉公主個細佬腓特烈·約西亞斯個仔)。
個人生活
[編輯]![](http://upload.wikimedia.org/wikipedia/commons/thumb/0/0f/King_and_Queen_of_Sweden.jpg/220px-King_and_Queen_of_Sweden.jpg)
卡爾十六世嘅興趣廣泛,熱心於環保、科技、農業、貿易同埋工業等等事務;另外佢同好多瑞典王室成員一樣,都對車情有獨鍾,其中佢最鍾意嘅一架車係Porsche 911s(佢同西維爾亞王后第一次影相嘅地方就係響呢架車入面);另外佢仲鍾意Volvo PV444、 Ferrari 456M GT同埋AC Cobra 等等。
響2005年夏季,佢揸車時響北雪平發生交通意外。雖然並未有任何傷亡,但依然畀傳媒大肆炒作。
佢經常帶老婆出去外國睇夏季同冬季奧運,其中包括2014、2016同2018。
風俗店風波
[編輯]2010年11月,卡爾十六世畀人爆出佢成日去風俗店同埋通姦(即同其他女人有性行為),由《Carl XVI Gustaf – Den motvillige monarken》爆料,響瑞典引起轟動;不過無耐風波就平息咗[4]。
直到2011年5月,有人影到佢同另外兩個女人一齊裸體嘅相,有傳指同拳擊手兼性俱樂部負責人Mille Marković有關,響國內又一次引起討論。卡爾十六世發表聲明,話自己冇去過風俗店,更加話自己唔會因為咁而退位。但係佢嘅公信力因此而下跌,有人要求佢退位。響2011年嘅民望調查中,相比起醜聞之前,佢嘅支持度跌到去64%,少咗近44%[4][5]。
2011年12月,報紙Expressen指出,個張裸體相其實係卡爾十六世響1976年同王后影嘅相,後嚟畀人改成兩個裸體女人,即係呢張相係畀人P圖咗嘅[6][7]。而Mille Marković之前亦試過整啲新聞出嚟去嚇一位名人[8][9]。
值得注意嘅係,賣淫響瑞典係合法嘅,但買春就係犯法嘅,即可以賣但唔可以買[10][11]。
活動
[編輯]卡爾十六世係世界童軍組織嘅名譽主席,成日參加國內外嘅童軍活動。佢亦會定期參觀世界童軍大露營。1981年,佢畀世界童軍組織頒發銅狼獎,紀念佢對童軍事業做出嘅貢獻。
佢同埋沙特阿拉伯前國王阿卜杜拉·賓·阿卜杜-阿兹兹·阿爾-沙地都係童軍和平使者。
銜頭同徽章
[編輯]銜頭
[編輯]- 1946年4月30號ー1946年6月7號:瑞典嘅卡爾·古斯塔夫王子殿下
- 1946年6月7號ー1950年10月29號:瑞典嘅卡爾·古斯塔夫王子,賈姆特蘭公爵殿下
- 1950年10月29號ー1973年9月15號:瑞典王儲卡爾·古斯塔夫,賈姆特蘭公爵殿下
- 1973年9月15號ー:瑞典國王卡爾十六世·古斯塔夫陛下
雖然好多瑞典國王都叫「卡爾」,但其實佢地原名都唔係咁叫(就好似卡爾十四世約翰,佢原本叫尚ー巴堤斯特·伯納多特),好多時係國王自己揀嘅。
攷
[編輯]- ↑ Nyheter, Erik Rolandsen / ABC (2010-11-03). "Venter i spenning på skandalebok om kong Carl Gustaf". www.abcnyheter.no (挪威文). 喺2021-07-07搵到.
- ↑ 梁凱怡 (2019-10-09). 〈瑞典王室取消五名王孫殿下名銜 放下包袱一身輕〉. 《香港01》 (香港中文). 喺2021-08-05搵到.
- ↑ 3.0 3.1 https://www.facebook.com/ETtoday. 〈瑞典王室又染疫!王儲維多利亞公主夫婦確診新冠肺炎 | ETtoday國際新聞 | ETtoday新聞雲〉. www.ettoday.net (繁體中文). 喺2021-08-05搵到.
{{cite web}}
:|last=
has generic name (help); External link in
(help)|last=
- ↑ 4.0 4.1 "Svenskekongen anklages for ville fester og kvinneaffærer". www.vg.no (巴克摩挪威文). 喺2021-07-07搵到.
- ↑ 〈スウェーデン国王:風俗店通い疑惑…本人否定、退位論も - 毎日jp(毎日新聞)〉. web.archive.org. 2011-06-19. 歸檔時間2011-06-19. 喺2021-07-07搵到.
{{cite web}}
: CS1 maint: bot: original URL status unknown (link) - ↑ Amster, Harry (2012-03-25). "Camilla Henemark kan själv". Svenska Dagbladet (瑞典文). ISSN 1101-2412. 喺2021-07-07搵到.
- ↑ Intervju med Kungen och Silvia (1976) (Från 100 höjdare) (英文), 喺2021-07-07搵到
- ↑ Radio, Sveriges. "Kungens vänner försökte köpa dementi - Nyheter (Ekot)". sverigesradio.se (瑞典文). 喺2021-07-07搵到.
- ↑ "Mille Markovic gripen för anstiftan till mord". www.aftonbladet.se (瑞典文). 喺2021-07-07搵到.
- ↑ 〈【トレビアン】世界の変わった法律! 売春が合法の国!?〉. 《ライブドアニュース》 (日文). 喺2021-07-07搵到.
- ↑ Weng, Sid (2016-04-08). 〈法國通過禁止買春法案 成為第5個「罰嫖不罰娼」歐洲國家〉. 《The News Lens 關鍵評論網》 (中文). 喺2021-07-07搵到.