Ilja Repin
Ilja Repin | |
---|---|
![]() Selfportret, 1878 (Russiese Staatsmuseum, Sint Petersburg). | |
Geboortenaam | Ilja Jefimowitsj Repin (Илья́ Ефи́мович Ре́пин) |
Gebore | 5 Augustus [O.S. 24 Julie] 1844 Tsjoegoejef, Rusland (nou in die Oekraïne) |
Sterf | 29 September 1930 (op 86) Kuokkala, Finland (nou in Rusland) |
Nasionaliteit | Rus |
Veld | Skilderkuns |
Opleiding | Keiserlike Kunsakademie |
Beweging | Realisme |
Ilja Jefimowitsj Repin (Russies: Илья́ Ефи́мович Ре́пин; Oekraïens: Ілля Юхимович Рєпін); 5 Augustus [O.S. 24 Julie] 1844 – 29 September 1930) was ’n vooraanstaande Russiese skilder[1] en beeldhouer. ’n Groot deel van sy werk is gewy aan sy vaderland, Oekraïne.[2] Sy realistiese werke toon dikwels psigologiese diepte en spanning binne die bestaande maatskaplike orde.
Lewe en werk
[wysig | wysig bron]![](http://upload.wikimedia.org/wikipedia/commons/thumb/a/ae/Ilia_Efimovich_Repin_%281844-1930%29_-_Volga_Boatmen_%281870-1873%29.jpg/300px-Ilia_Efimovich_Repin_%281844-1930%29_-_Volga_Boatmen_%281870-1873%29.jpg)
Repin is gebore in Tsjoegoejef, Rusland (nou in Oekraïne). Sy ouers was Russiese militêre setlaars. In 1866, nadat hy ikoon- en portretskildering bestudeer het, is hy na Sint Petersburg, waar hy tot die Keiserlike Kunsakademie toegelaat is. Van 1873 tot 1876 het op sy akademiese toelae in Italië gereis en in Parys, Frankryk, gewoon waar hy aan die Franse Impressionisme blootgestel is. Dit het ’n blywende invloed gehad op sy gebruik van lig en kleur. Sy styl was egter altyd nader aan die ou Europese meesters, veral Rembrandt, en hy het nooit self ’n Impressionis geword nie.
Repin het bekend geword deur sy skildery Bootslepers op die Wolga, waarin die lot van hierdie arme mense uitgebeeld is. Hy was deur sy hele loopbaan aangetrokke tot gewone mense soos hyself, en hy het dikwels plattelandse mense geskilder, hoewel hy later ook lede van die Russiese imperialistiese adel, die intelligentsia en die aristokrasie geskilder het, onder wie tsaar Nikolaas II.
Historiese en eietydse onderwerpe
[wysig | wysig bron]Kort voor die sluipmoord op tsaar Aleksander II in 1881 het hy ’n reeks skilderye geskilder met die rewolusionêre beweging as tema. In 1885 het Repin een van sy psigologies mees intense skilderye voltooi: Iwan die Verskriklike en Sy Seun. Dit beeld ’n geskokte Iwan uit wat sy sterwende seun omhels nadat hy hom in ’n woedebui doodgeslaan het. In teenstelling met hom is sy seun kalm, amper Christus-agtig.
Een van Repin se mees komplekse skilderye, Antwoord van die Zaporozje-Kosakke, het baie jare van sy lewe in beslag geneem. Hy wou dit skilder as ’n studie in lag, maar het ook geglo dit betrek die ideale van vryheid, gelykheid en broederskap; dus Kosak-republikanisme. Hy het dit in die laat-1870's begin en in 1891 voltooi. Ironies is dit dadelik gekoop deur die tsaar, wat 35 000 roebel daarvoor betaal het – ’n buitensporige bedrag vir dié tyd.
In sy latere jare het Repin baie van sy beroemde tydgenote geskilder, soos die skrywer Leo Tolstoi, die wetenskaplike Dmitri Mendelejef en die komponis Modest Moessorgski.
Latere lewe
[wysig | wysig bron]Repin het self sy huis in Kuokkale, Finland (nou Repino in Sint Petersburg), ontwerp. Ná die Oktober-rewolusie het Finland homself onafhanklik verklaar. Repin is deur verskeie Russiese instellings genooi om na sy vaderland terug te keer, maar hy het dit van die hand gewys met die verskoning dat hy te oud was om so ver te reis. Hy het in dié tyd godsdienstige onderwerpe geskilder, hoewel sy behandeling daarvan gewoonlik innoverend eerder as tradisioneel was. Met die uitsondering van ’n portret van die hoof van die Russiese voorlopige regering, Aleksander Kerenski, het hy nooit iets beduidends geskilder wat met die Russiese Rewolusie of die Sowjetunie te doen gehad het nie.
Repin is in 1930 in Kuokkala dood. Kuokkala is later aan die Sowjetunie afgestaan en is hernoem tot Repino (Leningrad-oblast).
Galery
[wysig | wysig bron]-
Iwan die Verskriklike en Sy Seun op Vrydag, 16 November 1581, 1870–1873 (Tretjakof-galery, Moskou).
-
Sadko in die Onderwaterkoninkryk, 1876 (Russiese Staatsmuseum).
-
Appels en Blare, 1879 (Russiese Staatsmuseum).
-
Portret van Leo Tolstoi, 1887.
-
Portret van Dmitri Mendelejef.
-
Huwelik van Nikolaas II en Aleksandra Fjodorowna, 1894.
-
Die komponis Modest Moessorgski
-
Anton Rubinstein
-
Wladimir Stasof
-
Pawel Michailowitsj Tretjakof
-
Keiser Nikolaas II
Verwysings
[wysig | wysig bron]- ↑ Ilya Yefimovich Repin – Britannica Online Encyclopedia
- ↑ V Marcadé – Art d'Ukraine, edition l'Age de l'Homme, 1990 Lausanne, Switserland, pg. 151 – 163
Bronne
[wysig | wysig bron]- Илья Репин. Картины и биография
- Репин Илья Ефимович
- Шишанов В.А. К истории коллекции работ Репина в Витебском областном краеведческом музее Geargiveer 29 September 2008 op Wayback Machine
- Шишанов В.А.РЕПИН И БЕЛАРУСЬ Geargiveer 29 September 2008 op Wayback Machine
- Художественно-мемориальный музей И.Е. Репина (г.Чугуев) Geargiveer 29 September 2008 op Wayback Machine
- Валерий Шишанов ЗДРАВНЁВО: ПОСЛЕ ОКТЯБРЯ 1917 Geargiveer 11 Januarie 2009 op Wayback Machine
- Бурлаки на Волге (1870–1873) Geargiveer 2 Mei 2009 op Wayback Machine
Verdere leesstof
[wysig | wysig bron]- Parker, Fan; Parker, Stephen Jan (1980). Russia on Canvas: Ilya Repin. Pennsylvania State University Press. ISBN 0-271-00252-2. Herhaal die standaard-Sowjet-interpretasie van Repin se werk en lewe.
- Sternin, Grigory (1985). Ilya Repin: Painting Graphic Arts. Leningrad: Auroras. Standaard- Sowjet-interpretasie, maar goed geïllustreer.
- Valkenier, Elizabeth Kridl (1990). Ilya Repin and the World of Russian Art. New York: Columbia University Press. ISBN 0-231-06964-2. Kritiese nie-Sowjet-interpretasie met vars inligting, maar hoofsaaklik vir akademici.
- Marcadé, Valentine (1990). Art d'Ukraine. Lausanne: L'Age d'Homme. ISBN 978-2825100318.
- Jackson, David, The Russian Vision: The Art of Ilya Repin (Schoten, België, 2006?).
Eksterne skakels
[wysig | wysig bron]- www.IlyaRepin.org 102 werke deur Ilja Repin
- Ilja Repin by Olga's Gallery
- Repin se skilderye by die Russiese Kunsgalery
Wikimedia Commons het meer media in die kategorie Ilja Repin.
Hierdie artikel is vertaal uit die Engelse Wikipedia