Jeff Sessions
Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
![](http://upload.wikimedia.org/wikipedia/commons/thumb/b/b9/Jeff_Sessions_official_portrait.jpg/220px-Jeff_Sessions_official_portrait.jpg)
Jefferson Beauregard (Jeff) Sessions III (gebore 24 Desember 1946 in Selma, Alabama) is 'n Amerikaanse politikus en regsgeleerde wat van 2017 tot 2018 as die 84ste minister van Justisie van die Verenigde State gedien het. Sessions het van 1997 tot 2017 as 'n federale senator van Alabama vir die Republikeinse Party gedien, voor hy bedank het om in die administrasie van Donald Trump te dien.
Van 1981 tot 1993 dien Sessions as hoofstaatsaanklaer vir die Suidelike Distrik van Alabama. In 1986 word hy genomineer vir regter van die distrikshof vir die Suidelike Distrik van Alabama, maar sy nominasie was nie suksesvol nie. In 1994 word hy tot minister van Justisie van Alabama verkies en in 1996 tot federale senator; hy word in 2002, 2008, en 2014 in laasgenoemde posisie herverkies. Tydens sy ampstermyn in die senaat word hy as een van die konservatiefste senators beskou.
Sessions was 'n vroeë ondersteuner van Donald Trump se presidensiële veldtog van 2016, en word deur Trump vir die pos van federale minister van justisie genomineer. Sy nominasie word op 8 Februarie 2017 in 'n stemming van 52–47 in die federale senaat bevestig, en hy word op 9 Februarie 2017 ingesweer. Tydens die bevestigingsverhore vir sy nominasie as federale minister van justisie het Sessions onder eed verklaar dat hy nie tydens die presidensiële veldtog van 2016 kontak met Russiese amptenare gehad het nie en dat hy van enige kontak tussen die Trump-veldtog en Russiese amptenare onbewus was. Nuusberigte onthul egter in Maart 2017 dat Sessions twee keer in 2016 met die Russiese ambassadeur Sergei Kisliak ontmoet het. Sessions het hom gevolglik uit enige ondersoeke na Russiese inmenging in die Amerikaanse presidentsverkiesings van 2016 onttrek, terwyl sommige Demokratiese wetmakers sy bedanking versoek het. In getuienis voor die intelligensiekomitee van die huis van afgevaardigdes in November 2017 het Carter Page verklaar dat hy Sessions van sy kontak met amptenare van die Kremlin in Julie 2016 ingelig het, wat Sessions se vroeëre ontkennings weerspreek.
As federale minister van justisie het Sessions 'n memo van een van sy voorgangers, Eric Holder, wat gepoog het om massagevangeneming te bekamp deur verpligte vonnisoplegging te vermy, ongedaan gemaak, en federale staatsaanklaers beveel om die maksimum moontlike kriminele klagte op te lê. Sessions het 'n bevel onderteken wat siviele bateverbeuring moontlik maak, wat wetstoepassers in staat stel om op die eiendom van verdagtes wat nog nie aangekla is nie, beslag te lê. Sessions was hewig gekant teen onwettige immigrasie en het 'n ongenaakbare standpunt teenoor sogenaamde heiligdom-stede ingeneem, en aan verslaggewers gesê dat stede wat versuim om aan federale immigrasiebeleid gehoor te gee, toegang tot federale fondse sal verloor. Trump het 'n uitvoerende bevel uitgereik wat befondsing van hierdie stede afsny, maar die bevel is deur San Francisco uitgedaag en is deur 'n federale regter van uitvoering verbied.
Op 7 November 2018, 'n dag na die middeltermynverkiesings, bedank Sessions uit die amp van federale hoofstaatsaanklaer op die versoek van Trump, na 'n maandelange openbare en private rusie tussen Trump en Sessions oor laasgenoemde se onttrekking uit ondersoeke na Russiese inmenging in die Amerikaanse presidentsverkiesings van 2016. In Oktober 2019 het Sessions 'n veldtog van stapel gestuur om sy ou Alabama-senaatsetel tydens die 2020 senaatsverkiesing terug te neem.
Verwysings
[wysig | wysig bron]Notas
[wysig | wysig bron]Hierdie artikel is in sy geheel of gedeeltelik vanuit die Engelse Wikipedia vertaal. |