Romagna
D Romagna isch e historischi Landschaft in Norditalie zwüsche de Apennine und dr Adria, dr Republik San Marino und Ravenna, wo - mit ere chliine Usnahm - nie e politischi Eiheit gsi isch. Bedütendi Stedt si näbe Ravenna Imola, Faenza, Cervia, Forlì, Cesena und dr Badort Rimini.
Dr Name Romagna isch as Romania in dr langobardische Ziit entstande. Eso hai die s Gebiet bezeichnet, wo under dr byzantinische Hoheit bliibe isch (Exarchat vo Ravenna), im Gegesatz zu de eigene Bsitz, dr Langobardia oder Lombardei.
Mit dr Urkunde, wo as Pippinischi Schänkig bezeichnet wird (754/756) isch dr Chillestaat Bsitzer vo dr Romagna worde. Währed Johrhunderte het er sich aber kuum gege d Asprüch vo de Kaiser uf dr einte Siite und die vo de oberitaliänische Stedt uf dr andere chönne duresetze. D Lag isch erst im Johr 1278 klar worde, wo dr Rudolf vo Habsburg uf d Romagna verzichdet het.
Dr Cesare Borgia, dr Sohn vom Papst Alexander VI., het brobiert, sich mit dr Romagna en eiges Herrschaftsgebiet z schaffe, s Herzogdum Romagna. Das isch em im Johr 1499 au glunge; wo aber si Vater 1503 gstorben isch, isch s scho wider z Änd gsi.
1509 isch d Romagna e Deil vom Chillestaat worde. Dr Napoleon het us dr Romagna 1797 e Deil vo dr Cisalpinischen Republik gmacht, wo sit 1802 Italiänischi Republik gheisse het und 1805 s Königriich Italie worden isch. Im Wiener Kongräss isch d Romagna wider an dr Chillestaat gfalle bis zum Risorgimento. 1860 isch s Gebiet zsämme mit Umbrie und de Marke zum neue Königriich Italie cho.
D Romagna bildet hüte mit dr Emilia d Region Emilia-Romagna.
![]() |
Dä Artikel basiert uff ere fräie Übersetzig vum Artikel „Romagna“ vu de dütsche Wikipedia. E Liste vu de Autore un Versione isch do z finde. |