Bambolla immobiliaria
![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
![](http://upload.wikimedia.org/wikipedia/commons/thumb/3/3a/Especulacion.jpg/250px-Especulacion.jpg)
A bambolla inmobiliaria ye como se conoixe a l'abance, en a mayoría d'os países industrializaus occidentals, d'o pre d'os biens inmuebles muit por dencima d'os d'a resta de biens y servicios, materializau en dos empentons mientres as dos decadas que van dende metat d'a decada de 1980 dica metat d'a primera decada d'o sieglo XXI, con a consiguient fractura cheneracional que ello chenera en embrecar-ie un bien basico de consumo obligatorio como ye a vivienda
Orichen
[editar | modificar o codigo]O prencipal simptoma d'a bambolla immobiliaria estió o incremento anormal d'os pres muit por alto de l'IPC y d'as rentas, incrementos que s'explican mas que mas recurrindo a factors externos, como a falta de suelo edificable, os beneficios fiscals concedius a l'adquisición de viviendas, a immigración, a especulación y a recalificación de suelos, asinas como o exceso de credito.
A bambolla immobiliaria tenió o suyo inicio en 1997. O Banco d'Espanya explica que l'orichen d'a escalada de pres se troba, en parte, en l'anterior boom immobiliario que remató en 1991 con "una excesiva corrección". Como consecuencia, o Banco d'Espanya charra d'a "existencia d'una cierta infravaloración d'iste activo en a segunda metat d'o decenio d'os novanta". I hai qui sostiene que tenió o suyo inicio en 1985.
O periodo s'ha prolargau dica agosto de 2007, manifestando-se prencipalment en una elevación sostenida d'os pres superior a o 10% anyal y plegando en cualques anyos dica cerca d'o 30% anyal seguntes meten de manifiesto los informes elaboraus por a pachina web immobiliaria espanyola "Idealista.com". A bambolla immobiliaria en Espanya explica o comportamiento recient d'o mercau immobiliario en Espanya, ofrindo una previsión d'a suya evolución futura.
Cualques miembros de l'anterior gubierno socialista de Rodríguez Zapatero, sinyaloron a la bambolla immobiliaria como l'elemento diferencial d'a crisi economica en Espanya y a prencipal causa d'as elevadas cifras d'ature, especialment chovenil, y de l'abandono escolar.
Punchazo d'a bambolla immobiliaria
[editar | modificar o codigo]O resultau d'a esclatada d'a bambolla ha estau una brusca caita de la demanda y d'os pres, que seguntes l'APCE empecipió en aviento de 2007 y que encara continaba en 2011, con caitas en a demanda superiors a o 40%, y en 2012, que o suyo primer trimestre ha rechistrau a mayor caita d'o pre d'a vivienda de toda a democracia. Tot ixo provocau por a incapacidat d'o mercau ta absorber a enorme ofierta de vivienda construida y vueda disponible.
Iste cambio de ciclo immobiliario espanyol ha acayeciu por factors internos y externos: por un costau, a falta de liquididat d'o sistema financiero, causada por a crisi d'as hipotecas subprime en Estaus Unius en agosto de 2007, y por unatro, por a debilidat interna d'a economía espanyola, a manca de financiamiento y o escamallo d'o modelo de creiximiento (basau en a construcción), en reducir-se as tornadas d'a inversión (provocando a salida d'o mercau d'os especuladors) y contener-se o credito. En chulio de 2011, a vivienda heba perdiu ya un cuatreno d'a suya valor dende maximos de 2007, cayendo o suyo pre por metro cuadrau un 25% dende alavez, con una tendencia a la baixa d'a evolución d'o pre en o curto y meyo plazo. Cualques autors como Borja Mateo y consultoras como R.R. de Acuña & Asociados, vaticinan caitas importants en o pre d'a vivienda entre cuantos anyos.
Ista tendencia se confirmó en o primer trimestre de 2012, seguntes os datos daus a conoixer por l'INE o 14 de chunio de 2012, ya que o IPV (Indiz de Pres d'a Vivienda) d'ixe trimestre refleixaba a mayor caita de pres de toda a democracia (a vivienda libre s'abaratió de meya un 12,6% en o primer trimestre de 2012 respective a o mesmo periodo de l'anyo anterior). Asinas, dende os maximos que aconsiguió l'indiz de l'INE en o segundo trimestre de 2007, a vivienda s'ha abaratiu en un 25,6%. Istos datos de o primer trimestre de 2012 accentúan o descenso de l'11,2 % con o cual remató 2011, y son muit dencima d'a caita d'os pres d'a vivienda rechistrada en 2008, cuan os pisos baixoron un 5,4% de meya, en 2009, con una caita d'o 4,3%, y en 2010, con una baixada de l'1,9%, seguntes l'INE.
Entre las causas d'ista espectacular caita d'os pres d'a vivienda, os analistas sinyalan a falta de credito por os problemas de solvencia d'o sistema bancario espanyol y l'aumento de l'ature (y o miedo a perder o treballo que va uniu a él), que fa que pocas personas quieran arrisgar-se a adquirir una vivienda u cambiar de residencia.
Por unatro costau, a mayoría d'os expiertos sinyalan que dica que as entidaz financieras no aconsigan dar salida a las inchents reservas de viviendas y de suelo que poseyen (a causa d'os impagos d'as hipotecas y d'os creditos fallidos a constructors y promotors, o que las ha convertiu en as grans immobiliarias d'o país) no se superará a crisi.