Roller derby
Roller derby ye un deporte de contautu nel que dos equipos de cinco persones patinen nuna mesma direición per una pista circular o ovalada. El xuegu desenvuélvese nuna serie de turnos (nomaos 'jams') nos que cada equipu designa un xugador ('jammer') encargáu de puntuar pal so equipu, pa lo que tien que superar na pista a tolos patinadores del equipu contrariu. Cada equipu tien que tentar d'aidar al so 'jammer' nesa xera, al tiempu que torga al del equipu contrariu, polo que cada equipu xuega'l mesmu tiempu al ataque y en defensa.
![](http://upload.wikimedia.org/wikipedia/commons/thumb/f/f8/ComeAndGetIt136421766.jpg/250px-ComeAndGetIt136421766.jpg)
L'orixe del Roller derby allúgase nos maratones de patinaxe sobre ruedes en pista de la década de 1930 nos Estaos Xuníos. Leo Seltzer y Damon Runyon apurrieron la primera evolución nel reglamentu pa incrementar la competitividá neses carreres, daqué que-y apurrió cierta popularidá al xuegu. Sicasí, nos años vinientes el xuegu derivaría nuna mena d'espectáculu nel que primaben los elementos teatrales sobre la competición deportiva.
Esa deformación acabaría a entamos del sieglu XXI cola actualización d'esti deporte. El xuegu caltién elementos teatrales, como l'usu de nomatos agresivos o uniformes llamativos por parte de los equipos, pero eliminóse la 'dramaturxa' con ganadores predeterminaos y competencies coreografiaes.
El Roller derby modernu ye un deporte internacional domináu por equipos femeninos, magar que ta medrando el númberu d'equipos masculinos o mixtos, y ta en consideración la so entrada nos Xuegos Olímpicos de 2020 como deporte d'exhibición. Les lligues modernes d'esti deporte caltienen unos componentes éticos mui fuertes qu'amiesten deporte con elementos de la subcultura punk, la estética camp y del feminismu.
Referencies
editarEnllaces esternos
editar
- Wikimedia Commons tien conteníu multimedia tocante a Roller derby.