Bokator
Tamién | Lbokatao, Bokatao, Labokator, Kun Khèl |
---|---|
País d'orixe | Camboya |
Prauticantes famosos | San Kim Sean, Meas Sok |
Deporte olímpicu | Non |
![]() |
El Bokator ye un arte marcial camboyanu qu'inclúi combate cuerpu a cuerpu, mañes en suelu y armes. Ye quiciabes el sistema de llucha más antiguu qu'esiste en Camboya, darréu que según la tradición oral el bokator, o un biltu más antiguu, yera'l sistema de combate cuerpu a cuerpu qu'usaren los exércitos d'Angkor hai 1.000 años. Ye común l'error de referise con bokator a toles artes marciales khmer, cuando en realidá namái se refier a un estilu concretu.
Historia
[editar | editar la fonte]![](http://upload.wikimedia.org/wikipedia/commons/thumb/1/1a/BanteayChmarRahu.jpg/220px-BanteayChmarRahu.jpg)
El términu bokator, que vien de labokatao ("golpiar a un lleón"), refierse a una tradición d'hai unos 2.000 años. Según la lleenda, un lleón taba atacando una aldea cuando un guerreru, armáu solamente con un cuchiellu, mató al animal coles sos propies manes, más en concreto con un rodiyazu simple. Dende aquella les téuniques desendolcábense pa enfrentase a animales salvaxes. Nun había lleones pel sureste d'Asia, anque ta'l lleón asiáticu de la India occidental, y la cultura y filosofía de la India foron les influyencies principales de la cultura d'Angkor. Toles grandes edificaciones d'Angkor tienen inscripciones en sánscritu y tán dedicaes a dioses hindús, sobre too Vishnú y Shiva. Tovía güei los prauticantes de bokator principien cada sesión d'entrenamientu amosando respetu a Brahma. La vida relixosa taba dirixida polos brahmanes, que na India tamién prauticaben esgrima y téuniques a mano vacía. El conceutu del lleón y les téuniques del bokator basaes n'animales surdieron escurque nel tiempu de los reis d'Angkor y la consecuente influyencia de les artes marciales de la India.
Los baxurrelieves nos pilpayos de los pilares de la entrada al templu Bayon, templu estatal de Jayavarman VII, representen delles téuniques del bokator. Un relieve amuesa dos homes que paecen tar engarraos, y otru amuesa dos lluchadores usando los coldos. Dambes son téuniques estándar del “kun khmer” modernu, o Pradal Serey. Un terceru representa un home enfrentándose a una cobra remontada, y un cuartu amuesa un home lluchando con un animal grande. El llargu heriedu marcial de Camboya pue que fuera un factor que permitiera a dellos reis d'Angkor dominar el sureste d'Asia más de 600 años dende'l 800 d.C..
Cuando'l réxime de Pol Pot (1975–1979) los que prauticaben artes tradicionales foron esterminaos sistemáticamente polos Khmeres Roxos, fuxeron como refuxaos o dexaron d'enseñar y s'escondieron. En pasando'l réxime de los Khmeres Roxos, entamó la ocupación vietnamita de Camboya, y les artes marciales natives foron declaraes dafechu fuera de la llei. San Kim Sean (o Sean Kim San nel orde occidental de nomes) ye conocíu davezu como'l padre del bokator modernu y ye'l que tien más reconocencia por facer alitar l'arte. Nel tiempu de Pol Pot, San Kim Sean tuvo que degolar de Camboya y asitió nos Estaos Xuníos, onde entamó a enseñar hapkido nun llocal de la YMCA en Houston, Texas, y más tarde marchó pa Long Beach (California). Dempués d'un tiempu de tar viviendo nos Estaos Xuníos enseñando y promoviendo l'hapkido, decatóse de que naide sintiera nunca falar del bokator. Dexó los Estaos Xuníos en 1992 y volvió pa Camboya pa devolver el bokator al pueblu y pa facer lo más que pudiera pa dalu a conocer al mundu.[1]
Nel 2001 tornó pa Phnom Penh y col permisu del rei entamó a aprender bokator a la mocedá llocal. Esi mesmu añu, al envís d'aconceyar a tolos maestros tovía vivos, escomenzó a viaxar pel país en cata de los lakru, o instructores de bokator, que sobrevivieren al réxime anterior. Los pocos qu'atopó yeren vieyos, de 60 a 90 años d'edá y galdíos por 30 años primíos; munchos con medrana d'enseñar l'arte al abertal. Dempués de muncho atesterar y cola aprobación del gobiernu, los antiguos maestros cedieron y Sean pudo por fin devolver el bokator al pueblu camboyanu. Conque Sean nun ye l'únicu maestru de bokator sobreviviente. Hai otros, como Meas Sok, Meas Sarann, Ros Serey, Sorm Van Kin, Mao Khann y Savoeun Chet. La primer competición nacional de Bokator de la historia celebróse nel Estadiu Olímpicu de Pnom Penh del 26 al 29 de setiembre del 2006. Nella participaron 20 lakrus a la cabeza d'equipos de 9 provincies.
Carauterístiques
[editar | editar la fonte]Al aviesu del kickboxing, que ye un deporte de combate, el bokator diseñóse pal campu batalla. Emplega un conxuntu variáu de golpes de coldu y rodiya, pataes cola canía, mañes de sumisión y llucha en suelu.[2] Los prauticantes entrenen pa cutir coles rodiyes, coldos, pies, caníes y cabeza. Tamién costazos, cadriles, caxada y deos pueden usase pa emponer al contrariu a la sumisión o a la muerte. Úsense tamién armes, sobre too palos de bambú y los palos curtios.
Los prauticantes de bokator tovía lleven nel combate los uniformes de los antiguos exércitos khmer. Los combatientes lleven alredor de la cintura una faxa llamada “krama”, y ataos en cabeza y brazos unos gordones de seda azul y encarnao llamaos sangvar day. Según paez, antaño los gordones taben encantexaos p'aumentar la fuercia, anque anguaño solamente son ceremoniales.
L'arte tien 341 secuencies que, como munches otres artes marciales d'Asia, básense nel estudiu de la vida na naturaleza. Por exemplu hai estilos de caballu, páxaru, dragón y grulla, caún con téuniques variaes. Al paecese muncho visualmente, al bokator avecen describilu por error como una variante del kick boxing modernu. Munches formes básense n'estilos tradicionales d'animales asina como en práutiques téuniques direutes de combate. El Pradal Serey ye un sistema de llucha más condensáu, ensin estilos d'animales, qu'usa namái unes poques téuniques básiques de puñetazos, coldazos, pataes y rodiyazos.
La faxa, o “krama”, amuesa'l nivel d'esperiencia del lluchador. El primer grau ye'l blancu, siguíu del verde, azul, bermeyu, marrón y, a lo cimero, el negru, con 10 graos. Namái completar l'entrenamientu inicial, los lluchadores lleven un krama negru polo menos diez años. Pa consiguir el krama doráu hai que ser un auténticu maestru y tener fecho dalgo importante pol bokator. Esto lleva xera abonda, quiciabes tola vida, darréu que solamente na parte ensin armes del arte hai ente 8.000 y 10.000 téuniques distintes, de les que sólo hai qu'aprender 1.000 p'algamar el krama negru.
Estilos d'animales
[editar | editar la fonte]Krama Blancu
[editar | editar la fonte]- Patu (tiea)
- Cámbaru (kdaem)
- Caballu (seh)
- Águila (baksey)
- Dragón (neak)
Krama Verde
[editar | editar la fonte]
Referencies
[editar | editar la fonte]Enllaces esternos
[editar | editar la fonte]- http://www.talesofasia.com/rs-99-bokator.htm
- http://www.phnompenhpost.com/TXT/current/stories/1520/from.htm Archiváu 2007-09-28 en Wayback Machine
- http://ki-media.blogspot.com/2006/09/300-participate-in-first-bokator.html
- http://slam.canoe.ca/Slam/Fighting/MixedMartialArts/2006/09/19/1862730-ca.html
- http://youtube.com/watch?v=617qPJPBSPM
- http://www.boxkator.net Archiváu 2011-07-23 en Wayback Machine