Jogo do pau
![](http://upload.wikimedia.org/wikipedia/commons/thumb/4/48/Malta_do_Ateneu_1.jpg/200px-Malta_do_Ateneu_1.jpg)
El jogo do pau ye un tipu de combate o arte marcial tradicional gallega y portuguesa.
Historia
[editar | editar la fonte]En munches sociedaes la espada desendolcóse como un arma a la qu'atribuíen un calter sagráu, polo que solamente podíen llevala y emplegala los guerreros nobles. El pueblu tenía torgao usala, asina que víase obligáu a perfeicionar métodos de combate alternativos, coles manes desnúes o con ferramientes o arbíes de les xeres cotidianes, como asocedió por exemplu n’Okinawa col kobudo, qu'inclúi téuniques d'usar foces, palos, mayales que s’usaben como un martiellu, etc. Con esti arsenal los paisanos o los pescadores podíen enfrentase si yera necesario escontra los arguyosos invasores samuráis, que diben armaos con katanes y otres armes de guerra. Tamién en Portugal el pueblu desendolcó un sistema de combate usando como arma’l cayáu qu'acompañaba per dayures, hasta hai bien poco, a pastores y a llabradores. Esti sistema llegó a conocese pol nome de Jogo do Pau (Xuegu del Palu), nun teniendo equí la pallabra “jogo”’l sen de “trebeyu”, sinón el de “téunica” o “manexu”.
Yá bien entráu’l sieglu XX tovía yeren frecuentes per tou Portugal, pero sobre too pel norte’l país, y en Galicia los combates de palu en feries y romeríes. Nestes amarraces participaben a veces aldees enteres, y otres les lluches yeren individuales, o d'un “jogador” contra dellos. Yera la dómina de los “puxadores” (nome que se daba a los xugadores del norte) y de los “varredores de feiras” (xugadores de nomadía que viaxaben per feries y romeríes desafiando a otros, probando asina’l so valor al ganalos a toos). Mestre Monteiro, natural de la rexón de Fafe, cuenta que pela dómina de la mocedá de so padre había dos pueblos qu'avezaben dir en domingu a la mesma capiya, llevando cada home o mozu, como yera tradicional, la so vara, de tal mou que cuando s’arrodiyaben en misa víense tolos palos en posición vertical saliendo perriba les cabeces. Acabante la ceremonia yera frecuente que na plaza cercana s’engarraren los rapazos d'entrambes aldees, entamándose por cualesquier pequeña razón (un requiloriu a una mozuca de l'aldea vecina, los celos d'un amante traicionáu, un alderique pola vecera’l riegu…) que s’iguaba a palos. Pero de nenguna manera yera un combate ensin regles. Había un códigu éticu que torgaba a los lluchadores solmenar a un home que nun llevara palu o que tuviera en suelu. Inda se cuenten pelos círculos d'aficionaos histories antigües como la de “Manilha”, qu'acabante vencer y desarmar a tres atacantes que lu arrodiaren, tiró’l palu al suelu. O la d'un xugador perafechiscu d'Oporto llamáu Carvalho, tratante de ganáu, que na feria del 26 n’Angeja, cerca d'Aveiro, foi quien a aguantar solu contra un grupu que lu atacó, hasta que zarapicó y cayó al suelu, y tando asina’l meyor xugador de los rivales pasóse al so llau, preparáu pa defendelu, diciéndo-yos a los collacios que’l que quixera solmená-y al valiente cayíu tenía que lluchar primero con él. Tamién na lliteratura podemos atopar hestories sobre’l jogo do pau, sobre too n’autores como Aquilino Ribeiro y Miguel Torga.
Dende los años 1930 el jogo do pau escomenzó a perder importancia. Los motivos son variaos: l'aición de les autoridaes policiales, que pa evitar lluches sangrientes acabaron torgando l'usu de los palos nos recintos de les feries; la emigración de munchos homes pa los medios urbanos o pal estranxeru; o la xeneralización del usu d'armes de fueu, que fizo innecesariu’l deprendimientu llargu y abegosu d'esta téunica pa la defensa personal.
Escueles del Jogo do pau
[editar | editar la fonte]En Lisboa, sobre too dende’l sieglu XIX, prauticábase un estilu propiu, desendolcáu nos patios de la capital y en clubes como l'Atenéu Comercial de Lisboa y el Real Ximnasiu (que más tarde se convirtió nel Ginásio Clube Português) onde tovía güei s’enseña l'arte. Surden dos grandes escueles, estremaes téunicamente y basaes en factores histórico-sociales: la Escuela del Norte y la Escuela de Lisboa (tamién prauticada nel Ribatejo y n’Estremadura). Esta última desarrolló un refileru d'anovaciones téuniques y pasó a dar menos importancia al combate contra dellos adversarios. El jogo do pau alcuéntrase nel Sport Algés y Dafundo en Lisboa.
Mestres famosos
[editar | editar la fonte]A llargo la hestoria del jogo do pau foron munchos los mestres de sonadía nes diferentes rexones del país; ente ellos: Mestre António Nunes Caçador, Mestre Frederico Hopffer, Mestre Júlio Hopffer, Mestre Joaquim Baú, Mestres Calado Campos, padre y fíu, Mestre Chula, Mestre Custódio Neves, Mestre Pedro Ferreira, Mestre Elias Gameiro, Mestre Nuno Russo, Mestre Manuel Monteiro, ente munchos otros.
El nome de Mestre Pedro Ferreira (1915–1996) rescampla pel so estraordinariu desenrollu téunicu lleváu a cabu per aciu de combinar les Escueles del Norte y de Lisboa, de les que yera fondu conocedor. Los sos discípulos foron munchos de los actuales maestros n’activo. Xugó’l palu tola so vida, siendo consideráu ún de los más destacaos xugadores hasta la so muerte. Foi maestru del Ateneu Comercial de Lisboa, tresmitiendo nos sos últimos años esa responsabilidá a Mestre Manuel Monteiro, socesor d'él.
Organización y desendolcu na actualidá
[editar | editar la fonte]El Jogo do Pau entamó un procesu d'organización a nivel nacional cola fundación en 1977, afalada pol Mestre Pedro Ferreira, de l'Asociación Portuguesa de Jogo do Pau. Les distintes escueles y clubes organícense anguaño nuna estructura representativa, la Federación Portuguesa de Jogo do Pau. Como prueba de la calidá téunica d'esti sistema, hai que mentar que nos campeonatos abiertos de lluches con palu llargu realizaos en Francia na década de los 1980 cola presencia de sistemes de combate del Xapón, Francia y otres naciones, los jogadores do pau portugueses quedaron campeones absolutos, ganando tolos combates onde participaron.
Referencies
[editar | editar la fonte]Enllaces esternos
[editar | editar la fonte]- Jogo do Pau (Azores) Archiváu 2011-07-19 en Wayback Machine
- Jogo do Pau Archiváu 2016-10-22 en Wayback Machine (entrenamiento)
- [1]
- Jogo do Pau portugués – información, aú entrenar, etc. Archiváu 2011-07-13 en Wayback Machine