Mèrda
C'l artìcul chè 'l è scrit in
Miranduléś |
![](http://upload.wikimedia.org/wikipedia/commons/thumb/c/c2/Hestem%C3%B8j.jpg/215px-Hestem%C3%B8j.jpg)
![](http://upload.wikimedia.org/wikipedia/commons/thumb/c/c4/Human_Feces.jpg/215px-Human_Feces.jpg)
![](http://upload.wikimedia.org/wikipedia/commons/thumb/3/3b/Strontvlieg.jpg/215px-Strontvlieg.jpg)
![](http://upload.wikimedia.org/wikipedia/commons/thumb/a/ab/Sisso.jpg/215px-Sisso.jpg)
![](http://upload.wikimedia.org/wikipedia/commons/thumb/5/5b/Pet_Waste_Station.jpg/215px-Pet_Waste_Station.jpg)
![](http://upload.wikimedia.org/wikipedia/commons/thumb/8/82/Merda_graffito_Torino_via_Giulio_21_giugno_2016.jpg/215px-Merda_graffito_Torino_via_Giulio_21_giugno_2016.jpg)
La mèrda (da 'l latìn “Merda”) l'è 'l scart dal magnàr ch'al bèsti e 'l óm i càgan via dòp la digestiòṅ. I èṅ cgnusùdi anc cuma escremènt. I s fórman in dal budèli e i vènan fati andàr fóra p'r al buś dal cûl. Soquànti bèsti i n s fànan minga di prubléma a magnàr-i, cuma i caṅ[1], i cunèṅ[2] o i pìcui ad Koala ch'i màgn'n i pét mój 'd sò màdar. La mèrda la gh'à dènt'r incóra la mità dl'energìa ch'la gh'iva 'l magnàr a 'l inìsi.
La mèrda la gh'à 'n udōr daśgustóś asè ch'al s fórma in dal méntar ch'i àcid e i batēr dal budèli i dàsf'n al magnàr.
In soquànti parti dal mónd 'l aldàm dal bèsti ch'i màgnan l'èrba, cuma i cavài, i bóv o i drumedàri, al vèṅ druâ p'r muciàr sù dal carburànt méntar la mèrda filtràda da 'l canaléti la sarvìs par tiràr-ag via 'l gas metàṅ. In di Stat Unî a gh'è 'n uśdàł in Massachusetts ch'al paga la gint p'r avér la sò caca ch'la sarvìs p'r èsar strapiantàda in chi sugèt ch'i gh'aṅ di prubléma ad culìte ulsróśa[3].
La paròla mèrda la gh'à dimóndi sinònim ch'i s dróan a secónda di caś:
- pét o caca o stròns (da 'l lungubàrd strunz): l'è 'n blòc ad mèrda “furmàda”, in gènar a fórma 'd salsìsa;
- caghét o caghéta o cagòt o cagarèla: l'è la mèrda “lìquida”, minga furmàda bèṅ;
- cagadùra o caganéla: l'è la mèrda fata in série, in gènar da dal bèsti cuma gl'insèt (mósca), al cavri, i sórag o i cunèṅ;
- aldàm: l'è la mèrda dal bèsti tgnuda dacàt e fata scar cuma cuncìm par la tèra;
- sis: l'è la mèrda mója dal bèsti, al sûg d'l aldàm, stramnàda in di camp par cuncimàr la tèra;
Cumpuśisiòṅ
La mèrda la mét insém dimóndi cumpunènt difarènt, tacànd da qvéi ch'i n s pōlan minga digerìr cuma la celulóśa e la cheratìna, pasànd pò p'r i scart di àcid gàstrig, da i fusfâ e da 'l cals ch'a gh vansa, dla fēl (ch'la gh dà 'l culōr), da 'l catàr, da 'l cèluli mòrti, da l'àqua (75% dal vulùm) e da i batēr.
'L è par cal mutìṿ chè che s'anc a n s magna piò a s caga pò listés.
Dal vòlti i mèdag i fànan far gl'eśàm di pét par védar s'a gh'è dal sangṿ lugâ dèntar[4] o par catàr di parasìta cuma la Giàrdia làmblia o la Tègna sólium. Anc al culōr di stròns a pōl ès'r un signàl 'd un mâł in cōrs.
Pruvèrbi e mōd ad dir
- Póm còt, mèrda fata: magnàr di póm còt a dà na maṅ par vudàr-as
- Èsar pîṅ 'd caca: èsar tròp burióś
- Èsar mèrd: èsar spòrc e muśnènt
- Dar-as dla caca: dar-as dgl'àri
- Tgnir al pét: tgnir al muś
- Ès'r un stròns: èsar na bruta parsòna
- ’T 'l à da cagàr s't fus in bras a Dio!: At gh'à da pagàr-la par fòrsa
- A vèrar 'n òm a s egh cata sempar dla mèrda: nisùn 'l è parfèt
- I póm còt, 't in magn ùn, 't in cag ôt[5]: i póm còt i fan curar bén a vudàr-as
- A meśdàr la mèrda, la pùsa[6]: méj an star lè a giràr e prilàr dal quistiòṅ delicàdi
- Pistàr na mèrda: Quànd a s fà 'n brut śbali
- (CARPŚ) Pistèr na squàia:[7] Fàr na figuràsa
- (CARPŚ) Al gh'à un caràter ed merda!: ùn semp'r arbaltâ
- (CARPŚ) Un quèl ch'a gh'òm e ch'a gh'aròm...: śōg ad paròli cun "Un quèl ch'cagòm e ch'cagaròm"
- (PRA) Mó có vót savér! A tzè gnan ed merda se tet chègh adòs!: ùn un pò nessi
dal letame nascono i fiori...»
Quèi curióś
- In dla Śmòrfia al nùmar dla mèrda 'l è 'l stant'òṅ;
- „Mèrda 'd artìsta“ 'l è 'l tìtul dn'òpra dal 1961 ad Piero Manzoni, sîṅ dla Pippa Bacca;
- Òṅ di giròṅ dal film Salò o le 120 giornate di Sodoma ad Pier Paolo Pasolini 'l è qvél dla mèrda;
- In dla puntàda „05x01“ ad South Park la paròla "shit" (mèrda) la vèṅ dita par 162 vòlti;
Culegamènt estéran
Nòti
- ↑ Mo parchè al caṅ al magna i sò pét?
- ↑ Mo parchè al cunèṅ al magna la sò mèrda? «'L è 'l sò istìnt ad scampàr. Ma a gh'è da far-ag cambiàr idéa»
- ↑ La banca dla caca la v paga p'r i vòstar pét (ch'i saràṅ strapiantâ)
- ↑ Sangṿ lugâ in dla mèrda: cànc'r o quèl àtar?
- ↑ (MUD) e (IT) "Proverbi, Modi di dire, Perle di saggezza, in dialètt mudnés", dl'Elena Pratizzoli, Parma, 2009, paǵ 44.
- ↑ (MUD) e (IT) "Il dialettario modenese 2, dal Giuseppe di Genova, Mòdna, 1995, paǵ 66.
- ↑ (CARPŚ) e (IT) In dal "Dizionario del dialetto carpigiano" ed Grasiàn Malagòli e Anna Marìa Ori, Mòdna 2011, a s escrìv: „Pistèer 'na quàaia”.
Àtar prugèt
Wikiquote contiene citazioni di o su Mèrda
Wikimedia Commons contiene file multimediali su Mèrda