Flughaveno Vieno
![](http://upload.wikimedia.org/wikipedia/commons/thumb/0/0d/Vienna_International_Airport_Schwechat_Wikivoyage_Banner.png/775px-Vienna_International_Airport_Schwechat_Wikivoyage_Banner.png)
Flughaveno Vieno / Flughafen Wien(-Schwechat) | |||||
---|---|---|---|---|---|
![]() | |||||
internacia flughaveno • place | |||||
IATA: VIE ICAO: LOWW | |||||
Resuma informo | |||||
Lando | Aŭstrio | ||||
Regiono | Malsupra Aŭstrio | ||||
Tipo | Civila flughaveno | ||||
Mastrumanto | Flughafen Wien AG | ||||
Apuda urbo | Vieno (18 km) | ||||
Alteco | 183 m | ||||
Geografia situo | 48° 6′ 52″ N, 16° 33′ 36″ O (mapo)48.11444444444416.56Koordinatoj: 48° 6′ 52″ N, 16° 33′ 36″ O (mapo) | ||||
| |||||
Kurej-angulo | 11/29; 16/34 | ||||
Kurej-longo | 3.500; 3.600 m | ||||
Retejo | www.viennaairport.at | ||||
Flughaveno Vieno (germane Flughafen Wien aŭ Flughafen Wien-Schwechat) estas la plej granda flughaveno de Aŭstrio. Ĝi situas oriente de Vieno kaj servas grandparte al internacia trafiko; ĝi estas la hejmo de la flugkompanioj Austrian Airlines kaj Niki Luftfahrt.
La flughaveno kapablas akcepti larĝtubajn aviadilojn, kiaj Boeing 747 aŭ Airbus A340.
Ĉar la flughaveno situas proksime de la ĉeĥa kaj slovaka landlimoj, ĝi servas ankaŭ al najbarlandaj urboj, precipe Bratislavo kaj Brno, kvankam tiuj ĉi havas proprajn flughavenojn.
Historio
[redakti | redakti fonton]La flughaveno ekestis en 1938 kiel armea flughaveno. Post la dua mondmilito la brita armeo transprenis ĝin. En 1953 estis fondita la brita asocio Austrian Handling Unit, kiu en 1954 estis transformita al la societo Wiener Flughafenbetriebsgesellschaft por civile funkciigi la flughavenon. Ĝi tiam definitive anstataŭis la flughavenon en Aspern, en la 22-a kvartalo de Vieno, kiu ekzistis de 1912.
Situo kaj instalaĵoj
[redakti | redakti fonton]La flughaveno situas inter Vieno (18 km okcidente) kaj Bruck an der Leitha (samdistance oriente). Schwechat, kiu donis al ĝi la kromnomon, situas ĉ. 10 km okcidente. Pli proksime situas Fischamend (2 km oriente), Enzersdorf an der Fischa (3 km sud-oriente) kaj Rauchenwarth (4 km sude). Du kilometrojn norde preterfluas Danubo.
La flughaveno estas aŭte atingebla tra aŭtovojo A4 (Oriente Aŭtovojo) kaj vojo B9 (Pressburger Straße). Ĝi havas propran fervojan stacidomon, kiun servas la viena antaŭurba fervojo (S-Bahn aŭ Schnellbahn) kaj speciala trajno kun la angla nomo City Airport Train. Ĉi-lasta kostas konsiderinde pli ol ordinaraj trajnoj, sed estas je kelkaj minutoj pli rapida, ĉar ĝi ne haltas inter stacio Wien-Mitte kaj la flughaveno.
Ekzistas ankaŭ buslinioj al Vieno kaj al aliaj urboj, ekzemple Brno.
La flughaveno havas du startejojn, kiuj situas en angulo de 50 gradoj. Ekzistas tri pasaĝerejoj, kvara estas konstruata.