Coctèl Molotov
![](http://upload.wikimedia.org/wikipedia/commons/thumb/0/05/Molotowcocktail.jpg/220px-Molotowcocktail.jpg)
Lo coctèl Molotov (var. coctel Molotov[1]) es una arma incendiària improvisada compausada d'una botelha de veire en partida emplida d'un liquide inflamable (esséncia, alcòl...). Inventat coma arma anticarri a la fin deis ans 1930, foguèt popularizat per l'armada finlandesa durant la Guèrra d'Ivèrn (1939-1940) e ironicament nomat en onor dau ministre deis Afaires estrangiers sovietic Vyacheslav Molotov. Es generalarament associat ai movements militars irregulars e ais insureccions civilas, mai es tanben fòrça utilizat per lei fòrças regularas en manca d'armas anticarri.
Istòria
[modificar | Modificar lo còdi]Lei premiereis utilizacions
[modificar | Modificar lo còdi]Lo coctèl Molotov sembla d'aparéisser durant la Guèrra d'Espanha (1936-1939)[2]. En particular, Franco ordonèt d'utilizar de dispositius d'aqueu tipe còntra lei carris T-26 de l'armada republicana. Puei, lei dos camps l'utilizèron en plaçant de substàncias inflamablas desgatjant de gas toxics. En julhet de 1939, lei Japonés utilizèron egalament de coctèls Molotov còntra lei blindats sovietics a la batalha de Khalkhin Gol.
L'utilizacion per lei Finlandés durant la Guèrra d'Ivèrn
[modificar | Modificar lo còdi]![](http://upload.wikimedia.org/wikipedia/commons/thumb/9/93/Kasapano.jpg/220px-Kasapano.jpg)
En decembre de 1939, durant la Guèrra d'Ivèrn, lei Finlandés adoptèron largament lo coctèl Molotov car mancavan d'armaments anticarri eficaç. Òr, la propaganda sovietica dirigida per lo ministre deis Afaires estrangiers Vyacheslav Molotov depintava l'ataca de l'Armada Roja coma una mena d'intervencion umanitària. Ansin, dins sei discors, declarèt que lei bombardiers sovietics largavan de viures per lei civius. Lei bombas sovieticas foguèron alora dichas « picnics Molotov ». Puei, per saludar l'avançada dei carris sovietics, diguèron « coctèls Molotov » seis armas incendiàrias. Rapidament, per metonimia, lo tèrme designèt tant l'arma que la substància inflamabla utilizada.
Lei Finlandés organizèron una produccion industriala de coctèls Molotov amb mai de 540 000 botelhas fabricadas per la destillariá de Rajamäki[3]. Demostrèron tanben l'interès de l'arma que foguèt estudiada e utilizada per mai d'una armada modèrna après 1939. Per exemple, lei Britanics ne'n produguèron per leis unitats encargadas de combatre un desbarcament alemand après la batalha de França en 1940 e leis Estatsunidencs utilizèron de granadas inspiradas per lo coctèl Molotov per netetjar lei posicions defensivas japonesas a la batalha d'Iwo Jima. Melhorèron fòrça la recèpta originala en utilizant un dispositiu d'alucatge compausat d'acid nitric e de sòdi metallic[4].
Lo coctèl Molotov dempuei 1945
[modificar | Modificar lo còdi]Dempuei la Guèrra d'Ivèrn e la Segonda Guèrra Mondiala, lo coctèl Molotov es encara utilizat per lei fòrças militaras que mancan d'armas anticarri. La batalha de Kiev en 2022 mostrèt son interès persistent dins la guèrra modèrna car fòrça veïculs demòran vulnerables ais armas incendiàrias. Pasmens, en parallèl d'aquel usatge militar, lo coctèl Molotov es vengut una arma emblematica deis insureccions popularas e deis esmogudas urbanas. Aquò a menat a una diversificacion considerabla dei recèptas utilizadas per sa fabricacion.
Principi
[modificar | Modificar lo còdi]Composicion
[modificar | Modificar lo còdi]![](http://upload.wikimedia.org/wikipedia/commons/thumb/0/07/Reporter%E2%80%99s_Notebook_-_Thriving_Kyiv_Becomes_Battle_Zone%2C_Almost_Overnight_03_%28cropped%29.jpg/220px-Reporter%E2%80%99s_Notebook_-_Thriving_Kyiv_Becomes_Battle_Zone%2C_Almost_Overnight_03_%28cropped%29.jpg)
Un coctèl Molotov es una botelha de veire emplida d'una substància inflamabla (esséncia, alcòl, napalm, etc.) e lo còl es sarrat ermeticament. Una mecha, generalament constituïda d'un tròç de teissut, es plaçada a l'entorn dau còl. Es embeguda d'un liquid un pauc mens inflamable coma lo gasòli. Per utilizar l'arma, fau abrar la mecha e gitar lo coctèl sus la buta amb una fòrça sufisenta per rompre la botelha. La mecha entraïna alora l'alucatge dau nívol de produch inflamable.
Fòrça variantas existisson dins la chausida de la botelha, de la substància principala e de la mecha. Per exemple :
- un pes plaçat dins la botelha, per exemple un tèrç d'arena, permet tanben d'estabilizar la trajectòria per un tir pus precís.
- de broquetas pegadas a la botelha pòdon remplaçar lo teissut, especialament dins lei regions frejas. Es tanben possible de plaçar dos produchs que reagisson violentament entre elei dins la botelha e sus la mecha (acid sulfuric dins l'esséncia e clorat de potassi sus la mecha).
- de substàncias autoinflamablas (fosfòr blanc, etc.) asseguran una explosion pus eficaça de la botelha.
- d'agents espessissents (gèl d'idrocarburs, nitrocellulòsa, polistirèn, etc.) aumentan l'aderéncia dau liquid en fuòc.
- d'acids permèton d'atacar lei materiaus pauc inflamables. Renfòrçan tanben l'efiech psicologic de l'arma.
- de detergents permèton d'alentir la combustion de l'esséncia que dura pus lòngtemps.
Aquela simplicitat de fabricacion es a l'origina de la popularitat dau coctèl Molotov car de centres de fabricacion rudimentaris pòdon rapidament produrre de centenaus d'exemplaris. Pasmens, istoricament, la fabricacion foguèt industrializada mai d'un còp per permetre un equipament sistematic dei tropas.
Foncionament
[modificar | Modificar lo còdi]![](http://upload.wikimedia.org/wikipedia/commons/thumb/c/cd/Panzer_II_hit_near_Tobruk_1941.jpg/220px-Panzer_II_hit_near_Tobruk_1941.jpg)
Coma totei leis armas incendiàrias, lo coctèl Molotov a tanben un efiech psicologic sus lei fantassins. Pasmens, en situacion de guèrra, es subretot utilizat per son efiech anticarri. D'efiech, la calor producha per la combustion de la substància inflamabla es capabla de damatjar lei sistèmas plaçats en dessota dau blindatge e de neutralizar lo veïcul. Aquò es fòrça eficaç sus lei veïculs dotats d'un blindatge metallic simple que se compòrta coma un conductor termic. En mai d'aquò, durant lei combats urbans, lo coctèl Molotov es sovent gitat dempuei una autor, çò que permet de tocar lei partidas superioras dau blindatge que son mens espessas.
Lei blindatges composits modèrnes destinats a dissipar la calor emesas per lei cargas vuejas ofrisson una proteccion pus eficaça. Pasmens, fòrça veïculs modèrnes gardan de ponchs de vulnerabilitat. De mai, se lo coctèl es pas capable de tuar l'equipatge ò de destrurre lei sistèmas protegits, la calor desgatjada pòu totjorn damatjar lei sistèmas installadas a l'exterior dau carri, coma leis optics.
Annèxas
[modificar | Modificar lo còdi]Liames intèrnes
[modificar | Modificar lo còdi]Bibliografia
[modificar | Modificar lo còdi]- (en) TM 31-210 Improvised Munitions Handbook, United States Department of War, 1969.
Nòtas e referéncias
[modificar | Modificar lo còdi]- ↑ Lo Congrès Permanent de la Lenga Occitana, Dicod'Òc, cèrca « cocktail », consultat lo 14 de setembre de 2023, [1].
- ↑ (en) Hugh Thomas, The Spanish Civil War, Nòva York, Simon & Schuster, 1994, p. 468.
- ↑ (en) Keijo Heinonen, « Who invented the Molotov cocktail? », Sotahistoriallinen Aikakauskirja, 2005, vol. 24, p. 151.
- ↑ (en) Richard O'Kane, Wahoo: The Patrols of America's Most Famous WWII Submarine, Presidio Press, 1987, p. 184.