ఇంటర్నేషనల్ మొబైల్ స్టేషన్ ఎక్విప్మెంట్ ఐడెంటిటీ
![](http://upload.wikimedia.org/wikipedia/commons/thumb/6/60/IMEI_number_of_Nokia_6030_20110805.png/220px-IMEI_number_of_Nokia_6030_20110805.png)
ఇంటర్నేషనల్ మొబైల్ స్టేషన్ ఎక్విప్మెంట్ ఐడెంటిటీ లేదా ఐఎంఈఐ అనేది సాధారణంగా థర్డ్ జనరేషన్ పార్టనర్షిప్ ప్రాజెక్ట్ (3GPP) (అనగా జిఎస్ఎమ్, యుఎంటిఎస్, ఎల్టిఈ), ఐడెన్ మొబైల్ ఫోన్లు, అలాగే కొన్ని శాటిలైట్ ఫోన్లను గుర్తించే అద్వితీయమైన సంఖ్య. ఈ సంఖ్య సాధారణంగా ఫోన్ యొక్క బ్యాటరీ కంపార్ట్మెంట్ లోపల అతికించబడిన కాగితంపై కనిపిస్తుంది, అలాగే ఈ సంఖ్య చాలా ఫోన్లలో డయల్ ప్యాడ్ పై *#06# ను ఎంటర్ చెయ్యడం ద్వారా ఫోన్ స్క్రీన్ పై ప్రదర్శితమవుతుంది, లేదా స్మార్ట్ ఫోన్ ఆపరేటింగ్ వ్యవస్థలలో సెట్టింగ్ల మెనులోని ఇతర వ్యవస్థ సమాచారంతో పాటు ఉంటుంది. ఈ ఐఎంఈఐ సంఖ్యను చెల్లుబాటు అయ్యే పరికరాలను గుర్తించడానికి GSM నెట్వర్క్ ద్వారా ఉపయోగిస్తారు, ఈ ఐఎంఈఐ నెంబర్ ద్వారా దొంగిలించబడిన ఫోన్ లో ఏ నెంబరు సిమ్ను ఉపయోగిస్తున్నారో నెట్వర్క్ కమ్యూనికేషన్ వ్యవస్థ ద్వారా తెలుసుకొని వారిని పట్టుకోవచ్చు, లేదా ఆ ఫోనును పనిచేయకుండా ఆపివేయవచ్చు. ఉదాహరణకు ఒక మొబైల్ ఫోన్ దొంగతనం చేయబడినట్లయితే ఆ ఫోన్ యజమాని నెట్వర్క్ ప్రొవైడర్ కు కాల్ చేసి ఆ ఫోన్ యొక్క ఐఎంఈఐ నెంబరును తెలిపి ఆ ఫోనును "బ్లాక్లిస్ట్"లో పెట్టమని చెప్పాలి.