Azərbaycan xəbərləri
Azərbaycanın İrandakı səfirliyi fəaliyyətini bərpa edib
![Tehranda Azərbaycan səfirliyinin yeni binası](https://gdb.rferl.org/01000000-0aff-0242-ce20-08dca4a0ceca_cx0_cy5_cw0_w250_r1_s.jpg)
Bu gün, iyulun 15-də 1 il 5 aylıq fasilədən sonra Azərbaycanın İran İslam Respublikası paytaxtı Tehran şəhərindəki səfirliyi yeni ünvanda fəaliyyətini bərpa edib.
Azərbaycan Xarici İşlər Nazirliyi (XİN) bildirir ki, bu, iki ölkə arşında aparılmış danışıqlar nəticəsinə gerçəkləşib. "Səfir və səfirliyin hal-hazırkı heyəti İrana geri dönüb", - məlumatda vurğulanır.
XİN əlavə edir ki, hal-hazırda İrandakı səfirliyin yeni binasında konsulluq xidmətinin təşkili üçün müvafiq işlər görülür və yaxın zamanda həmin xidmətin bərpası barədə əlavə məlumat veriləcək.
Xatırlatma
2023-cü il yanvarın 27-də Azərbaycanın Tehrandakı səfirliyinə "Kalaşnikov" avtomatı ilə silahlı hücum olmuşdu. Hədisə nəticəsində səfirliyin bir əməkdaşının həlak olduğu, iksinin isə xəsarət aldığı açıqlandı. Bundan sonra səfirliyin işçiləri Azərbaycana təxliyə edildi.
Onda İran tərəfi silahlı hücumu məişət narazılığı ilə izah etmişdi. Azərbaycan XİN isə səfirliyinin təhlükəsizliyi ilə bağlı lazimı tədbirlərin vaxtında görülmədiyini vurğulamışdı.
Ötən ilin ortalarına qədər Azərbaycan və İran arasında müəyyən gərginlik yaşanıb. Hər iki ölkənin bir-birinin sərhədinə yaxın ərazidə hərbi təlimlər keçirməsi hətta qarşılıqlı narazılıqlara səbəb olmuşdu. Amma ötən ilin sonlarına doğru hər iki ölkənin rəsmilərindən bir-birlərinə yönəlik müsbət bəyanatlar səslənməyə başlamışdı. Üstəlik, bu il iki ölkənin hərbi qüvvələri birgə təlimlər də keçirdilər.
Bütün xəbərləri izləyin
‘Abzas Media işi’ üzrə tutulanların ittihamı ağırlaşdırılır
![Ülvi Həsənli, Sevinc Vaqifqızı və Məhəmməd Kekalov](https://gdb.rferl.org/01000000-c0a8-0242-e39e-08dbebe79e1d_w250_r1_s.jpg)
"Abzas Media işi" üzrə digər həbs olunan şəxslərin- nəşrin direktoru Ülvi Həsənlinin, baş redaktoru Sevinc Vaqifqızının, araşdırmaçı jurnalist Hafiz Babalının və reportyor Elnarə Qasımovanın da ittihamları ağırlaşdırılıb.
İstintaq orqanı olan Bakı Şəhər Baş Polis İdarəsi avqustun 19-da onlara qarşı yeni ittihamları irəli sürüb.
Jurnalistlərin vəkilləri deyib ki, onların ittihamları da iqtisadçı Fərid Mehralızadə, AbzasMedia" nəşrinin əməkdaşı Məhəmməd Kekalov və jurnalist Nərgiz Absalamovanın ittihamları kimi eyni qaydada ağırlaşdırılıb.
Vəkillər qeyd edib ki, jurnalistlər ittihamlarla razılaşmır və ittiham barədə sənədləri imzalamaqdan imtina ediblər:
“Onlar heç bir cinayət törətmədiklərini, bu ittihamların onlara aidiyyəti olmadığını və jurnalist fəaliyyətinə görə həbs olunduqları bildiriblər”.
Müdafiə tərəfinin açıqlamasına Daxili İşlər Nazirliyindən münasibət öyrənmək mümkün olmayıb.
Fərid Mehralızadə və Məhəmməd Kekalovun da ittihamı ağırlaşdırılıb
Avqustun 16-da "AbzasMedia işi" üzrə həbs olunan iqtisadçı Fərid Mehralızadəyə qarşı da 7 maddə ilə yeni ittiham irəli sürüldüyü bildirilir. Bu barədə məlumatı onun həyat yoldaşı Nərgiz Muxtarova verib.
Onun deməsinə görə, F.Mehralızadəyə verilən yeni ittihamda yer alan maddələr də Nərgiz Absalamovanın yeni təqsirləndirildiyi maddələrlə eynidir. Söhbət külli miqdarda gəlir əldə etməklə qanunsuz sahibkarlıqdan, bunun mütəşəkkil dəstə ilə törədilməsindən, habelə mütəşəkkil dəstə ilə qaçaqmalçılıqdan, vergidən yayınmaqdan, sənəd saxtalaşdırma və saxta sənədlərdən istifadədən gedir.
Üstəlik, bu iş üzrə təqsirləndirilənlərdən "AbzasMedia" nəşrinin əməkdaşı Məhəmməd Kekalovun da ittihamının eyni qaydada ağırlaşdırıldığı bildirilir.
Nərgiz Absalamovaya ittiham ağırlaşdırılıb
Avqustun 16-da "AbzasMedia işi" üzrə istintaqa cəlb olunmuş jurnalist Nərgiz Absalamovaya qarşı yeni bir çox maddə ilə ittiham irəli sürülüb.
Bu barədə məlumatı jurnalistin vəkili Şəhla Hümbətova yayıb.
"Nərgiz Absalamovaya qarşı Cinayət Məcəlləsinin 192.3.2 (qanunsuz sahibkarlıq - xüsusilə külli miqdarda gəlir əldə etməklə törədildikdə), 193-1.3.1, 193-1.3.2 (cinayət yolu ilə əldə edilmiş əmlakı leqallaşdırma-mütəşəkkil dəstə tərəfindən xeyli miqdarda törədildikdə), 206.4 (qaçaqmalçılıq - mütəşəkkil dəstə tərəfindən törədildikdə), 213.2.1 (vergiləri ödəməkdən yayınma - mütəşəkkil dəstə tərəfindən törədildikdə), 320.1 və 320.2-ci (sənəd saxtalaşdırma və saxta sənədlərdən istifadə etmə) maddələri ilə ittiham irəli sürülüb", - vəkil qeyd edib.
Yeni ittihamlarla şəxsə 12 ilə qədər həbs cəzası verilə bilər.
Hələlik, vəkilin açıqlamasına istintaqı aparan Daxili İşlər Nazirliyi və başqa rəsmi qurumlardan münasibət almaq mümkün olmayıb.
N.Absalamova ötən il noyabrın 30-da "AbzasMedia işi" üzrə ikinci dəfə Bakı şəhər Baş Polis İdarəsində dindiriləndən sonra saxlanılıb. Ona qarşı Cinayət Məcəlləsinin 206.3.2-ci (qrup halında qaçaqmalçılıq) maddəsi ilə ittiham irəli sürülüb və barəsində 3 aylıq həbs-qətimkan tədbiri seçilib. Sonradan bu müddət iki dəfə uzadılıb.
O, ittihamları qəbul etmir.
Əvvəlki maddə ilə isə şəxsə maksimum 8 il cəza nəzərdə tutulur.
Xatırlatma
Ötən ilin noyabrından başlayaraq Azərbaycanda qruplar halında 20 civarında jurnalist, ictimai fəal qaçaqmalçılıq ittihamı ilə həbs edilib. Onların əvvəlcə çoxu "AbzasMedia işi" ilə əlaqəli olub. Həmin işdə öncə saytın direktoru Ülvi Həsənli, əməkdaşı Məhəmməd Kekalov, baş redaktoru Sevinc Vaqifqızı həbs edilib. Daha sonra bu işə aid həbslər jurnalistlər Hafiz Babalı, Nərgiz Absalamova və Elnarə Qasımova ilə davam edib. Amma onlar ittihamla razılaşmır, bunu peşə fəaliyyətləri və siyasi sifariş ilə izah edirlər.
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 250-300 siyasi məhbus var.
Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Dron hücumundan sonra Rostovdakı neft bazasında yanğın ikinci gündür ki, davam edir
![Rostov vilayətindəki Proletarsk neft bazasında yanğın](https://gdb.rferl.org/01000000-0aff-0242-fa5a-08dcc0342797_cx2_cy7_cw85_w250_r1_s.jpg)
Rostov vilayətinin Proletarsk rayonundakı neft bazasında yanğının söndürülməsi zamanı Fövqəladə Hallar Xidmətisinin 18 əməkdaşı xəsarət alıb. Həkimlər onların vəziyyətini “ağır” olaraq qiymətləndiriblər.
Rostov vilayətinin qubernatoru Vasili Qolubev bildirib ki, Ukraynanın dron hücumu nəticəsində başlanmış yanğını artıq ikinci sutkadır ki, söndürmək mümkün olmur.
Proletarsk rayonunda fövqəladə vəziyyət rejimi elan edilib.
Rayon administrasiyasının başçısı Valeri Qoriç deyib ki, "hələlik heç nə dəyişməyib, yanğının sahəsini azaltmaq olmur”.
Bu yaxınlarda Rostov şəhərinin sənaye zonasının ərazisi Ukrayna dronlarının hücumuna məruz qalmışdı. Proletarskdakı yanğının başlanmasına da elə bu səbəb olub. Region rəhbərliyi bildirir ki, vurulan dronların qırıntıları yanacaq çənlərinin üstünə düşüb. Bunun dərhal ardınca daha bir dron hücumu olub və yanğının söndürülməsi bu səbəbdən dayandırılıb.
Ukrayna silahlı qüvvələri bildirir ki, Proletarskdakı neft bazasına dron hücumunu Ukrayna hərbi kəşfiyyatı həyata keçirib.
Son bir neçə ayda Proletaskdakı bazaya bir neçə dəfə hücumlar edilib.
Üçüncü körpü də dağıdılıb?
Bu arada Rusiyanın hərbi blogerləri Vladimir Romanov və Yuri Podalyaka yazıblar ki, Ukrayna hərbçiləri Kursk vilayətində, Seym çayı üzərindəki üçüncü körpünü də dağıdıblar.
Kursk vilayəti qubernatorunun müşaviri Roman Alyoxin Podolyakanın xəbərinə istinad etsə də, onu “yoxlanmış məlumat” adlandırıb.
Xəbər verilir ki, Rusiya hərbçiləri hazırda çaydan keçmək üçün ponton körpülərindən istifadə edirlər.
Körpünün dağılmasına dair rəsmi xəbər yoxdur. Ukrayna tərəfi də bu xəbəri hələ ki, şərh etməyib.
Seym çayı üzərindəki birinci körpü avqustun 16-da, ikinci körpü isə avqustun 18-də dağıdılıb. Hər iki körpünün dağıdılması üçün məsuliyyəti öz üzərinə Ukrayna tərəfi götürüb.
Blogerlər Krıja kəndi yaxınlığındakı körpünü sonuncu körpü adlandırırlar, amma Kekino kəndi yaxınlığında daha bir körpünün olduğu deyilir. Podolyakanın sözlərinə görə bu körpü tam olaraq Ukrayna ordusunun atəş nəzarəti altındadır.
Ukrayna prezidenti Volodimir Zelenski deyib ki, Ukrayna ordusunun əsas vəzifəsi Kursk vilayətində “bufer zonası” yaratmaqdır.
Ukrayna körpüləri dağıdır
Bundan əvvəl verilən xəbərlərdə deyilirdi ki, Ukrayna silahlı qüvvələrinin komandiri deyir ki, Rusiyanın Kursk vilayətində ikinci körpü vurulub. Kiyev Rusiyanın bu ərazidə döyüş əməliyyatlarını zəiflətməyə çalışır.
"Daha bir körpünü çıxaq", – Hava qüvvələrinin komandiri Mikola Oleşçuk avqustun 18-də Telegram-da yazıb.
"Hava qüvvələri dəqiq hava zərbələri ilə düşməni logistika qabiliyyətindən məhrum etməkdədir, bu isə əməliyyatların gedişatına ciddi təsir göstərir", – komandir yazır.
Moskva bu zərbə ilə bağlı şərh verməyib. Ukrayna iki həftəyə yaxındır Rusiyanın Kursk vilayətinə qəfil əks-hücuma keçib ki, bu isə iki il yarımdır gedən müharibənin dinamikasını dəyişib, 120 min nəfər evini tərk etməli olub.
Vurulan körpü
Rusiya hərbi bloqerləri əvvəlcə vurulan birinci körpünün fotosunu yerləşdiriblər. Bu körpü Kurskdakı Zvannoye kəndi yaxınlığından keçən Seym çayı üzərindədir.
Rusiya təhlükəsizlik rəsmilərinin sözlərinə görə, bu körpünün dağıdılması Qluşkov rayonunun bir hissəsi ilə əlaqəni kəsib, bu da regiondakı mülki evakuasiyanı çətinləşdirib.
Avqustun 16-da Rusiya Xarici İşlər Nazirliyi Ukraynanı Amerikanın uzaqmənzilli raketləri ilə Qluşkovdakı əsas körpünü dağıtmaqda, bu zaman mülkilərin evakuasiyasına kömək edən könüllüləri öldürməkdə ittiham edib.
Təhlilçilərin fikrincə, Seym üzərində körpülərin vurulması Ukraynaya Kurskda hücumu üçün təhlükəsiz cinah təmin etməkdən ötrü vacibdir. Belə ki, bu zaman Moskvanın çayın cənubundakı qüvvələrini təchiz etməsi çətinləşir.
Ukrayna prezidenti Volodimir Zelenski avqustun 18-də axşam müraciətində deyib ki, Ukraynanın Kurskdakı əməliyyatı "hələ də Rusiya ordusu və dövlətinə, müdafiə sənayesi və iqtisadiyyatına ziyan vurur". O, cəbhədə bütün istiqamətlərdə "yaxşı" nəticələrin olduğunu söyləyib.
Dron və raket hücumları
Bu arada Ukraynanın şərqi Donetsk vilayətində döyüşlər davam edir, Ukrayna tərəfi bəzi ərazilərdə evakuasiya göstərişi verib.
Ukrayna ordusunun baş qərargahı Rusiyanın Rostov vilayətində neft və neft məhsullarının saxlandığı bir obyektin vurulduğunu bəyan edib. Həmin məhsullar Rusiya ordusu tərəfindən istifadə olunur. Baş qərargah ərazidə azı iki yanğının qeydə alındığını açıqlayıb.
Rusiya Müdafiə Nazirliyi ötən gecə Belqorod, Kursk və Rostov vilayətləri üzərində Ukraynanın beş dronunu tutduğunu bildirib. Kiyev adətən dron hücumları barədə şərh vermir.
Kiyev hərbi administrasiyasının başçısı Sergey Popko isə avqustun 18-də deyib ki, Rusiya bu ay Ukrayna paytaxtına üçüncü ballistik raket hücumunu edib. O, Rusiya qüvvələrinin Kiyevə doğru qanadlı raket buraxdığını söyləyib.
Popkonun sözlərinə görə, Rusiyanın Şimali Koreya istehsalı KN-23 raketindən istifadə etdiyi güman olunur.
Putin Azərbaycana gəlib
![Rusiya prezidenti Vladimir Putin Bakıda](https://gdb.rferl.org/01000000-c0a8-0242-af88-08dcbfaa373d_cx0_cy5_cw0_w250_r1_s.jpg)
Rusiya prezidenti Vladimir Putin avqustun 18-də axşam saatlarında Azərbaycana gəlib.
Kremlin mətbuat xidmətinin məlumatına görə, iki gün davam edəcək səfər zamanı müzakirə olunacaq əsas mövzulardan biri “Rusiya-Azərbaycan strateji partnyorluq və müttəfiqliyinin daha da inkişaf etdirilməsi” məsələsi olacaq. Danışıqlar zamanı habelə digər aktual beynəlxalq və regional məsələlərin müzakirə ediləcəyi gözlənilir. Kremlin məlumatında vurğulanır ki, səfərin nəticəsi olaraq birgə bəyanat və bir neçə başqa sənədlər imzalanacaq.
Vladimir Putin Azərbaycanda sonuncu dəfə 2018-ci ilin sentyabrında olub. Həmin səfər zamanı o, cüdo üzrə dünya çempionatı yarışlarına tamaşa edib və Rusiya-Azərbaycan regionlararası forumunun IX plenar iclasına qatılıb.
2 il əvvəl, fevralın 22-də Moskvada Azərbaycan və Rusiya dövlət başçıları iki ölkə arasında “… müttəfiqlik qarşılıqlı fəaliyyəti haqqında Bəyannamə” imzalayıb. Sənəddə iki ölkə arasında siyasi, iqtisadı və daha bir çox sahələrdə əməkdaşlığın inkişafının vacibliyindən bəhs edilir.
Rusiya prezidentinin Azərbaycana indiki səfəri tamam fərqli geosiyasi şəraitdə baş verir.
Azərbaycan və Ermənistan arasında 2020-ci ildə baş vermiş müharibə nəticə etibarilə Bakının ərazi bütvlüklərini tədricən bərpa etməsi ilə başa çatıb. İki ölkə arasında münaqişə ötən əsrin 80-ci illərində yenidən gərginləşən Qarabağ məsələsi üstündə baş verib. 4 il əvvəlki 44 günlük müharibədən sonra Azərbaycanın Qarabağ bölgəsinə üçtərəfli razilaşmaya (Azərbaycan, Rusiya və Ermənistan) əsasən Rusiya sülhməramlı kontingenti yeridilmişdi. Sülhməramlılar Azərbaycanda 2025-ci ilədək qalmalı idilər. Lakin 2023-cü ildə Azərbaycan bir günlük hərbi əməliyyatla Qarabağ üzərində nəzarəti tam bərpa etdi və oradan erməni əhali köç etdi. Bu il isə Rusiya sülhməramlıları Azərbaycanı tərk elədi.
Son illər Azərbaycan və Ermənistan arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələ də, sülh sazişi imzalanmayıb. Azərbaycan-Ermənistan sərhəddində tez-tez olmasa da ara-sıra atəşksəin pozulması ilə bağlı məlumatlar yayılır. Tərəflər buna görə bir qayda olaraq bir-birlərini günahlandırırlar. Bir neçə gün öncə də belə məlumatlar yayılmışdı.
Haaqada mənzillənən Beynəlxalq Cinayət Məhkəməsi (BCM) Ukrayna uşaqlarının Rusiyaya qanunsuz deportasiyasına görə 2023-cü ilin martında prezident Vladimir Putin və Rusiyanın uşaq ombudsmanı Mariya Lvova-Belova barəsində həbs orderi verib. Bu isə o deməkdir ki, BCM-in yurisdiksiyasına daxil ölkələr, o cümlədən Ermənistan onları öz ərazisində həbs etmək öhdəliyinə malikdir. Putin Azərbaycanda həbs oluna bilməz, çünki Bakı BCM-nin Roma statutuna qoşulmayıb.
Putin avqustun 18-19-da Azərbaycana səfər edəcək
![İlham Əliyev və Vladimir Putin (Arxiv fotosu)](https://gdb.rferl.org/01000000-0aff-0242-9fa2-08dc638ff7f1_cx0_cy5_cw0_w250_r1_s.jpg)
Rusiya prezidenti Vladimir Putin avqustun 18-19-da Azərbaycana dövlət səfəri edəcək.
Bu məlumatı Kremlin mətbuat xidmətinə istinadla TASS dövlət xəbər agentliyi yayıb.
Xəbərdə deyilir ki, səfər zamanı müzakirə olunacaq əsas mövzulardan biri də “Rusiya-Azərbaycan strateji partnyorluq və müttəfiqliyinin daha da inkişaf etdirilməsi” məsələsi olacaq.
Danışıqlar zamanı habelə digər aktual beynəlxalq və regional məsələlərin müzakirə ediləcəyi gözlənilir.
Kremlin məlumatında deyilir ki, səfərin nəticəsi olaraq birgə bəyanat və bir neçə başqa sənədlər imzalanacaq.
Putin Azərbaycanda son dəfə 2018-ci ilin sentyabrında olub. Həmin səfər zamanı Putin cüdo üzrə dünya çempionatı yarışlarına tamaşa etmiş və Rusiya-Azərbaycan regionlararası forumunun IX plenar iclasına qatılmışdı.
Bundan sonra Azərbaycan prezidenti İlham Əliyev onu, özünün münasib bildiyi vaxtda Azərbaycana dəvət etmişdi.
Tamam fərqli geosiyasi şəraitdə
Rusiya prezidentinin Azərbaycana indiki səfəri tamam fərqli geosiyasi şəraitdə baş verir.
Azərbaycan və Ermənistan arasında 2020-ci ildə baş vermiş müharibə nəticə etibarilə Bakının bütün ölkə ərazisi üzərində suverenliyini bərpa etməsi ilə başa çatıb.
Bu müharibə dövründə Azərbaycanın Qarabağ bölgəsinə Rusiya sülhməramlı kontingenti yeridilmişdi. Sülhməramlılar razılaşmaya görə Azərbaycanda 2025-ci ilədək qalmalı idilər.
Lakin 2023-cü ildə Azərbaycanın hərbi əməliyyatla Qarabağ üzərində nəzarəti ələ almasından sonra sülhməramlılara praktik ehtiyac qalmamışdı. Bu kontingent bu il, vaxtından xeyli əvvəl Azərbaycandan çıxarılıb.
Rusiya son aylarda Azərbaycan və Ermənistan arasında münasibətlərin normallaşdırılması və sülh müqaviləsinin imzalanması istiqamətində aparılan danışıqlardakı fəal mövqeyini itirib. Hazırda ABŞ və Avropa İttifaqı bu danışıqlarda təşəbbüsü ələ almış kimi görünürlər.
Rusiya Qərbi Moskvanı Cənubi Qafqaz regionundan sıxışdırıb çıxarmaq niyyətində ittiham edir.
Rusiyanın özü də 2022-ci ilin fevralında Ukraynaya tammiqyaslı müdaxilə edəndən bəri Qərblə geosiyasi qarşıdurmamadır və sərt sanksiyalarla üzləşir.
Rusiya ordusunun Ukraynanın Donbas regionunda irəlilədiyi bir vaxtda, avqustun 6-da Ukrayna ordusu da Rusiyanın Kursk vilayətinə müdaxilə edərək müəyyən əraziləri nəzarət altına alıb.
Britaniyalı deputatlar Qubad İbadoğluya azadlıq istəyirlər
![Qubad İbadoğlu](https://gdb.rferl.org/01000000-0aff-0242-69a3-08dc645380e7_w250_r1_s.jpg)
Böyük Britaniyadan bir qrup deputat Azərbaycan hökumətini iqtisadçı Qubad İbadoğlunu azad etməyə çağırıblar. London İqtisadi və Siyasi Elmlər Məktəbinin akademiki Q.İbadoğlu hökumətin siyasətini tənqid edən məqalələrdən sonra saxlanılıb. Bu barədə "The Guardian" qəzeti yazır.
Beynəlxalq "Global Witness" qeyri-hökumət təşkilatının prezident İlham Əliyevə göndərdiyi məktubu 25 təşviqat qrupu, Lordlar Palatasının üzvü Alfred Dabs və İcmalar Palatasının səkkiz deputatı imzalayıb. Onlar iqtisadçı alimin qeyd -şərtsiz buraxılmasına çağırırlar. Qəzet yazır ki, alimin vəkillərinə göndərilən məktubda onun məhkəməsinin qeyri-müəyyən vaxtadək təxirə salındığı təsdiqlənir.
"Azərbaycan məhkəmələri bu işi dondurub, istintaq prosesini təxirə salıb və Doktor İbadoğlunu qeyri-müəyyən müddətə girov saxlamağa hazırlaşır. Sizdən onu qeyd-şərtsiz azad etməyə, xaricdə tibbi müalicə almasına icazə verməyə, ailəsi ilə birləşməsinə imkan yaratmağa çağırırıq", – müəlliflər yazırlar.
Bu ilin noyabrında Bakıda BMT-nin COP29 iqlim sammiti keçirilməlidir. Məktubda deyilir ki, Azərbaycan bu konfransı həqiqətən sülh tədbirinə çevirmək istəyirsə, Q.İbadoğlunu dərhal və qeyd-şərtsiz azad etməli, ona qarşı bütün ittihamları ləğv etməlidir.
Xatırlatma
Q.İbadoğlu ötən il iyulun 23-də həbs edilmişdi. O, Cinayət Məcəlləsinin (CM) 204.1-ci (Satış məqsədi ilə saxta pul... və ya xarici valyuta hazırlama, əldə etmə və ya satma - mütəşəkkil dəstə tərəfindən törədildikdə) maddəsi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb. Q.İbadoğlu ittihamları saxta adlandırıb.
Bu il aprelin 22-də onun barəsində seçilmiş həbs-qətimkan tədbiri ev dustaqlığı, daha sonra isə müstəntiqin qərarı ilə polisin nəzarətinə verilmə ilə əvəz olunub.
Q.İbadoğlu dövlət qeydiyyatına alınmayan Azərbaycan Demokratiya və Rifah Partiyasına (ADR) rəhbərlik edib. Amma ev dustaqlığına buraxılandan sonra səhhəti ilə bağlı siyasi fəaliyyətinə fasilə verdiyini açıqlayıb.
Qəbələdə toydan sonra xəstəxanaya kütləvi müraciət olub
![Ambulans](https://gdb.rferl.org/D0C874F2-0802-4C1E-8EFE-2BA9709479B9_w250_r1_s.jpg)
Avqustun 15-də Qəbələ rayonunda xəstəxanaya kütləvi müraciət olub. Yerli sakinlərin bildirməsinə görə, səhhəti ağırlaşan insanlar rayonda bir toy məclisində iştirak ediblər. Ümumilikdə 50-dən çox şəxsin səhhətinin pisləşdiyi deyilir.
Azərbaycan Qida Təhlükəsizliyi Agentliyi bildirib ki, hadisənin səbəbləri, onun qida zəhərlənməsi olub-olmaması ilə bağlı mütəxəssisləri və müvafiq qurumların əməkdaşları araşdırmalara başlayıblar.
Hələlik, toy sahibi ilə danışmaq mümkün olmayıb.
Son vaxtlar Azərbaycanda belə oxşar hadisələr tez-tez baş verir.
Avqustun 11-də Gəncə şəhərində xəstəxanaya kütləvi müraciət olmuşdu. Onda isə bir yas mərasimindən sonra yüzdən çox şəxsin səhhətinin ağırlaşdığı açıqlanmışdı.
Antiinhisar araşdırmasını gözləmədən internet qiyməti artırılır
![Aztelekom](https://gdb.rferl.org/01000000-0aff-0242-badf-08db81dc655a_w250_r1_s.jpg)
Avqustun 15-də axşam Rəqəmsal İnkişaf və Nəqliyyat Nazirliyinə tabe olan "Aztelekom" dövlət telekommunikasiya provayderi davam edən antiinhisar araşdırmalarına baxmayaraq, fiber-optik (GPON) internet xidmətlərinin yeni tariflərini müəyyənləşdirib.
Yenidən nəzərdən keçirilmiş tariflərə əsasən, minimum trafik sürəti 40 Mbit/s-dən 100 Mbit/s-ə yüksəlib. İndi istehlakçılar ayda 100 Mbit/s üçün 25 manat, 150 Mbit/s-ə 30 manat və 250 Mbit/s-ə 36 manat ödəməlidirlər. Bundan əvvəl 40 Mbit/s sürətli ən aşağı paket 18 manata başa gəlirdi.
Elan Azərbaycan Antiinhisar və İstehlak Bazarına Nəzarət Dövlət Xidmətinin yoxlaması fonunda verilib. Avqustun 14-də qurum "Aztelekom" və "Baktelecom"un tətbiq etdikləri qiymət dəyişikliklərinin yoxlanılmasına başlayıb. Araşdırmada məqsədin provayderlərin hərəkətlərinin Rəqabət Məcəlləsinə və yeni tariflərin hüquq normalarına uyğunluğunu müəyyən etməkdir: "100 Mbit/s-dən aşağı internet sürəti seçmək istəyən müştərilərin seçim imkanlarının məhdudlaşdırılacağı və onların alıcılıq qabiliyyəti nəzərə alınmadan yüksəksürətli internet paketlərinin yüksək qiymətə təqdim olunacağı müəyyən edilib".
Hələlik, məsələyə "Aztelekom" və başqa provayderlərdən münasibət almaq mümkün olmayıb.
Dövlət Statistika Komitəsinin məlumatına görə, hazırda ölkədə 1.6 milyon internet abunəçisi var. Avqustun 15-də bir çox abunəçilər internetin sürətindən şikayətləniblər.
Bundan əvvəl...
Ötən ay ölkə mediasında "Aztelekom" və "Bakı Telefon Rabitəsi"nə istinadən avqustun 15-dən internetin qiymətlərində dəyişiklik olacağı açıqlanmışdı.
Açıqlamada həmin qurumlar bunu müştərilərin yüksəksürətli genişzolaqlı internetə artan tələbatı ilə izah edirlər: "Bu işlər ölkəmizdə dünya trendləri ilə ayaqlaşma, əhalinin yüksək sürətli internetə olan tələbatında artım tendensiyasını nəzərə alaraq, göstərilən xidmətin keyfiyyətinin yüksəldilməsi və dayanıqlı infrastrukturun təmin edilməsi məqsədilə həyata keçirilir".
Həmin vaxt Azərbaycan İnternet Forumunun prezidenti Osman Gündüz isə demişdi ki, hazırda minimal qiymət 18 manat müəyyən olunub və bu ödənişlə vətəndaş 40 Mbit/s sürət əldə edə bilir: "İndi isə minimal 100 Mbit/s üçün 25 manat olacaq. Görünür, provayderlər, o cümlədən dövlət provayderləri bir anda varlanmaq xətti götürüblər. Baxırlar ki, hamı ölkədə qiymətləri qaldırır, düşünüblər ki, onlar niyə etməməlidirlər".
az24saat.org saytının təsisçisi həbs edilib
![Vüqar Qurdqanlı](https://gdb.rferl.org/01000000-0aff-0242-f3be-08dcbc5bbcef_cx0_cy25_cw0_w250_r1_s.jpg)
Avqustun 13-də az24saat.org saytının təsisçisi Vüqar Qurdqanlı (Ələkbərov) saxlanıb.
Daxili İşlər Nazirliyinin (DİN) Mətbuat xidmətindən "Turan"a verilən məlumata görə, o, ayrı-ayrı vətəndaşlara müxtəlif vədlər verərək 100 min manatdan artıq pulu dələduzluq yolu ilə ələ keçirməkdə şübhəli sayılır.
Onun barəsində məhkəmə qərarı ilə həbs-qətimkan tədbiri seçilib.
Vəkil Mehman Muradlı isə hesab edir ki, 178 və 178 2.4-cü (dələduzluq və dələduzluq - xeyli miqdarda ziyan vurmaqla törədildikdə) maddələr ilə Qurdqanlıya qarşı irəli sürülən ittihamlar əsassızdır.
Müdafiə tərəfindən bildirildiyinə görə, o, avqustun 13-də saxlanıb və həmin gün Xətai rayon Məhkəməsi onun barəsində 1 ay 12 gün müddətinə həbs-qətimkan tədbiri seçib. Bu maddələrlə şəxsə 5 ilədək azadlıqdan məhrumetmə cəzası verilə bilər.
az24saat.org hələ 2018-ci ildə Rəqəmsal İnkişaf və Nəqliyyat Nazirliyinin Elektron Təhlükəsizlik Xidmətinin şikayəti əsasında Bakının Səbail rayon Məhkəməsi qərarı ilə bloklanıb. Buna səbəb kimi saytda ölkə qanunvericiliyinin tələblərinin pozulduğu yazıların dərci göstərilib. Sayt rəhbərliyi isə bunu düzgün saymayıb.
Bundan sonrakı dövrdə Qurdqanlı sosial şəbəkələrdə materiallar dərc edirdi. Onun yazılarında hökumətə və dövlət orqanlarına qarşı tənqidlər yer alırdı.
Azərbaycanın yerli hüquq müdafiəçilərinin hazırladıqları siyahılara görə, ölkə həbsxanalarında hazırda 300-ə yaxın siyasi məhbus var. Amma rəsmilər, ümumiyyətlə, ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, siyasi məhbus siyahılarında yer alanlar sırf törətdikləri əmələ görə məsuliyyətə cəlb ediliblər.
Qardaşı: 'Ələsgər Məmmədlinin hüquqlarından istifadəsinə imkan verilmir'
![Ələsgər Məmmədli](https://gdb.rferl.org/03720000-0aff-0242-b41e-08da1bcb7e47_w250_r1_s.jpg)
Yaxınları ToplumTV-nin təsisçisi Ələsgər Məmmədlinin həbsdə hüquqlarının pozulduğunu deyirlər. Onların bildirməsinə görə, Ə.Məmmədli istintaq təcridxanasında dərman qəbul etsə də, qan təzyiqini sabitləşdirmək mümkün olmur.
Bu barədə qardaşı Nəsimi Məmmədli bildirib.
"Ələsgər Məmmədlinin qapalı məkanda saxlanılması ona bir sıra ciddi problemlər yaradıb. Qalxanabənzər vəz şişi hələ də nəfəs almağı çətinləşdirir", - o deyib.
Yaxınlarının sözlərinə görə, onun şəxsiyyət vəsiqəsini istintaq orqanı götürüb. Onların vurğulamasına görə, Ə.Məmmədli vergi hesabatından ötrü yeni "Asan İmza" almaq üçün də yaxınlarına etibarnamə verməlidir.
"Lakin cəzaçəkmə yerlərində saxlanılan şəxslərin hüquq və azadlıqları haqqında qanunu pozaraq onun yanına notariusu buraxmırlar", - N.Məmmədli əlavə edib.
Onun deməsinə görə, etibarnamə həm də Ə.Məmmədlinin iki övladının ali təhsil xərclərini ödəmək üçün avtomobilini satmasından ötrü lazımdır və ailə maddi çətinlik çəkir.
Yaxınları Ə.Məmmədlinin hələ həbsindən öncə səhhətində problemlərin olduğunu açıqlayıblar.
Hələlik, qardaşının bu açıqlamasına Penitensiar Xidmət və istintaqı aparan Daxili İşlər Nazirliyindən münasibət almaq mümkün olmayıb.
Xatırlatma
Ə.Məmmədli bu il martın 8-də həbs olunub. Ona qarşı Cinayət Məcəlləsinin 206.3.2 (qaçaqmalçılıq) maddəsi ilə ittiham verilib. O, ittihamı qurama sayır.
Ötən ilin noyabrından Azərbaycanda aralarında ToplumTV, habelə "AbzasMedia" nəşrinin əməkdaşları da olmaqla qruplar halında 20-yə qədər jurnalist, ictimai fəal qaçaqmalçılıq ittihamı ilə həbs edilib.
Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə siyasi sifarişlə basqılara məruz qalmır.
Fazil Mustafaya sui-qəsdə görə ömürlük həbs cəzası kəsildi
![Fazil Mustafa](https://gdb.rferl.org/01000000-c0a8-0242-b767-08dcbb7c91e8_cx2_cy4_cw84_w250_r1_s.jpg)
Deputat Fazil Mustafaya sui-qəsddə suçlanan şəxslərdən birinə – Azər Səricanova ömürlük həbs cəzası verilib. Avqustun 13-də Bakı Ağır Cinayətlər Məhkəməsində belə hökm çıxarılıb.
Eyni hökmlə bu olayda təqsirləndirilən daha dörd nəfərdən Səbuhi Şirinova 20 il, Rəşad Əhmədova 19 il, Elşad Əsgərova 18 il, Emin Əliyarova isə 4 il həbs cəzası kəsilib.
Təqsirləndirilən şəxslər və onların ailələri narazı qaldıqlarından hökmdən apellyasiya şikayəti verəcəklər.
Xatırlatma
Ötən il martın 28-də axşam saatlarında paytaxtın Sabunçu rayonundakı Zabrat qəsəbəsində yaşadığı evin önündə Fazil Mustafa atəşə tutulub. Deputat çiyin və bud nahiyəsindən yaralanıb.
Olay üzündən beş nəfər - Azər Səricanov, Elşad Əsgərov, Səbuhi Şirinov, Emin Əliyarov və Rəşad Əhmədov cinayət məsuliyyətinə cəlb edilib.
Cinayət işində iddia olunur ki, F.Mustafaya sui-qəsd planı İranın Rey şəhərində müzakirə olunub. Həmin planın icrası barədə tapşırıq verilib və Bakıya bundan ötrü 30 min dollar pul göndərilib.
Təqsirləndirilən şəxslərə dövlətə xəyanət, terrorçuluq, dövlət xadiminin həyatına sui-qəsd də daxil, bir sıra ağır ittihamlar verilib.
Onlar özlərini qismən təqsirli bilirlər. Deputatı vurduqlarını təsdiqləsələr də, bu olayın İrandan gələn sifariş olmadığını deyirlər. Təqsirləndirilən şəxslər vurğulayıblar ki, deputatı öldürmək niyyətləri olmayıb, onu dini mövzuda səsləndirdiyi fikirlərə görə cəzalandırmaq istəyiblər. Elə bu üzdən, F.Mustafanın həyati önəmli orqanlarına deyil, çiyin və ayağına atəş açdıqlarını vurğulayırlar.
Yaxınları Emin İbrahimovun aclıq aksiyasını dayandığını deyirlər
![Emin İbrahimov](https://gdb.rferl.org/01000000-0aff-0242-f84c-08dbba8a9e02_cx0_cy51_cw0_w250_r1_s.jpg)
Keçmiş diplomat Emin İbrahimovun Şüvəlan İstintaq Təcridxanasında 20 gündür davam etdirdiyi aclıq aksiyasını bugün, avqustun 12-də dayandırdığı bildirilir. Yaxınlarının sözlərinə görə, bu barədə o, telefon söhbətində qeyd edib.
Amma bu məlumata, hələlik, Penitensiar Xidmətdən münasibət almaq mümkün olmayıb.
Öz növbəsində, Siyasi Menecment İnstitutunun direktoru Azər Qasımlı da deyib ki, İbrahimov aclığı ailə üzvlərinin, qohumlarının, dostlarının və həmfikirlərinin israrlı xahişlərindən sonra dayandırıb.
"Biz bundan əvvəl də Emindən aclığı dayandırmağı xahiş edirdik, lakin o, israrla aksiyanı davam etdirirdi. Bu dəfə biz onu inandırdıq ki, o, mübariz adamdır və işini davam etdirmək üçün sağlam olmalıdır", - deyə Qasımlı bildirib.
Penitensiar Xidmət keçmiş diplomata həbsdə təzyiq olmadığını deyir
Penitensiar Xidmət həbsdə olan keçmiş diplomat Emin İbrahimova təzyiq edilməsi ilə bağlı onun vəkili vasitəsi ilə açıqlamasına münasibət bildirib.
Qurumdan “Turan” Agentliyinə deyilib ki, Emin İbrahimov barəsində cinayət işinin başlanmasına etiraz əlaməti olaraq aclıq etməsi ilə bağlı ərizə ilə iyulun 28-də nahardan sonra aidiyyəti üzrə müraciət edib:
“E.İbrahimovun yaxın qohumları ilə görüş hüququ məhdudlaşdırılmayıb, telefonla danışmaq hüququndan istifadə edib. Ona qarşı təzyiqlərin olması barədə iddia isə həqiqəti əks etdirmir. Belə ki, o işçi heyəti, həbs edilmiş şəxslər tərəfindən təzyiqlərə, işgəncələrə məruz qalmır, hüquqları və qanuni mənafeləri qorunur”.
Bugün, iyulun 30-da isə vəkili Bəhruz Bayramov onunla görüşüb. Vəkil qeyd edib ki, İbrahimov 15 məhbusun olduğu kameradan ayrı kameraya köçürülüb:
“Hazırda İbrahimov tək saxlanılır, ancaq onu tibbi nəzarətə götürməyiblər.”
Emin İbrahimovun apellyasiya şikayəti təmin edilməyib
Bundan bir gün əvvəl, iyulun 29-da keçmiş diplomat Emin İbrahimovun həbsi ilə bağlı məhkəmə qərarından verilən apellyasiya şikayətini Bakı Apelyasiya Məhkəməsi təmin etməmişdi.Vəkili Aqil Layıc bildirmişdi ki, E.İbrahimov artıq 6 gündür 3 saylı İstintaq Təcridxanasında aclıq aksiyası keçirdiyini deyir.
Onun sözlərinə görə,Emin İbrahimov vurğulayır ki, 15 nəfərin olduğu kamerda saxlanır, aclıq aksiyasını dayandırmaq üçün müəssisə rəhbərliyinin təzyiqlərinə məruz qalır.
Vəkil habelə qeyd edib ki, E.İbrahimova telefonla danışmaq və ailə üzvləri ilə görüşməyə də qadağa qoyulub.
Keçmiş diplomat, ictimai fəal Emin İbrahimov iyulun 22-də saxlanıb. Ona Cinayət Məcəlləsinin 126.2.4 (xuliqanlıq niyyəti ilə sağlamlığa qəsdən ağız zərər vurmaq) və 221.-cı (xuliqanlıq) maddələri ilə ittiham elan edilib.İyulun 24-də barəsində 4 aylıq həbs-qətimkan tədbiri seçilib.O bir şəxsi bucaqla vurmaqda ittiham edilir.Amma ittihamı qurma sayır.
E.İbrahimov Azərbaycanın Birləşmiş Ştatlardakı səfirliyində və başqa qurumlarda çalışıb. Onun 2020-ci ilin fevralında Azərbaycandakı parlament seçkilərini özü üçün "son damcı" sayaraq martın 13-də ovaxtkı xarici işlər naziri Elmar Məmmədyarova istefa ərizəsi yazdığı bildirilir. Bu həftə E.İbrahimovun saxlanmasından sonra onun yazdığı bildirilən ərizənin fotosu sosial şəbəkələrdə yayılıb.
ATƏT Demokratik Təsisatlar və İnsan Haqları Bürosu (DTİHB) 2020-ci il seçkilərində həqiqi rəqabətin qarşısının alındığını, həqiqi siyasi müzakirələrin olmaması səbəbindən seçicilərə "mənalı" seçim imkanı verilmədiyini bildirib.
Rəsmilər isə həmin seçki ilə bağlı tənqidləri qəbul etmir.
Gəncədə xəstəxanaya kütləvi müraciət olub
![Ambulans (Foto arxiv)](https://gdb.rferl.org/13645e81-63ce-4492-9f0f-65ed43e01f73_cx0_cy9_cw0_w250_r1_s.jpg)
Tibbi Ərazi Bölmələri İdarəetmə Birliyindən (TƏBİB) avqustun 12-si, günorta saatlarında bildiriblər ki, Gəncədə zərərçəkmişlərə operativ tibbi yardım göstərilib və onlar ambulator müalicəyə buraxılıblar: "Hazırda 15 nəfər, o cümlədən üç uşaq xəstəxanadadır".
+++
Avqustun 11-də Gəncə şəhərində xəstəxanaya kütləvi müraciət olub. Müraciət edənlər həyətlərin birində yas mərasimindən sonra səhhətlərinin pisləşdiyini bildiriblər. Həmin şəxslər halva, bozbaş və pomidor-xiyar salatı qəbul etdiklərini deyiblər.
Müraciət edənlər ümumilikdə 100-dən çox olub. Göygöl rayon Mərkəzi Xəstəxanasından onlardan bir neçəsinin vəziyyətinin ağır olduğu qeyd edilib.
Qida Təhlükəsizliyi Agentliyindən verilən məlumata görə isə, mütəxəssisləri bölgəyə göndəriblər, baş verənlərin səbəbləri araşdırılacaq.
Hələlik, baş verənlərlə bağlı yas mərasiminin sahibi ilə danışmaq mümkün olmayıb.
Müdafiə Nazirliyinin daha bir polkovniki həbs edilib
![](https://gdb.rferl.org/01000000-c0a8-0242-2d80-08dc12a93a7b_cx16_cy0_cw68_w250_r1_s.jpg)
Müdafiə Nazirliyinin Mənzil İstismar İdarəsinin sabiq rəisi Elmar Məmmədov həbs edilib. Onun haqqında həbs qərarı avqustun 9-da Bakı Hərbi Məhkəməsində çıxarılıb.
E.Məmmədov 659 min 442 manatı mənimsəməkdə və rüşvət almaqda ittiham olunur. Onunla bağlı cinayət işinin istintaqı Hərbi Prokurorluqda gedir.
Hərbi prokuror E.Məmmədovun istintaq dövründə həbsdə saxlanmasından - ilkin olaraq, 4 aylıq həbs qətimkan tədbiri seçilməsindən ötrü məhkəməyə təqdimat verib. Məhkəmə də avqustun 9-da axşam saat 6.00 radələrində təqdimata baxaraq, onu təmin edib.
E.Məmmədov təxminən iki həftə öncə həbs edilən Rəhim Laçınovla əlbirlikdə ittiham edilir. R.Laçınov Mənzil-İstismar İdarəsinin Əsaslı və Cari Təmir bölməsinin rəisi olub.
Cinayət işində iddia edilir ki, E.Məmmədov 2020-ci ilin əvvəlində Mənzil-İstismar İdarəsinin rəisi olduğu dövrdə R. Laçınovla birlikdə külli miqdarda yeyintiyə yol veriblər.
E.Məmmədov özünü təqsirli bilmir, yarım milyon manatdan çox yeyinti ittihamıyla razılaşmır.
E.Məmmədov və R.Laçınova Cinayət Məcəlləsinin 179.4-cü (xüsusilə külli miqdarda mənimsəmə) maddəsilə ittiham verilib. Bu maddədə 10 ildən 14 ilədək həbs cəzası nəzərdə tutulub.
Cinayət Məcəlləsinin 311-ci (rüşvət alma) maddəsilə E.Məmmədova əlavə ittiham da verilib.
Müdafiə Nazirliyi Mənzil-İstismar İdarəsinin bundan öncəki rəisi Fikrət Mirzəyev də həbsdədir. O, Müdafiə Nazirliyində 143 milyon manatlıq mənimsəməyə dair cinayət işi üzrə həbs olunub. Hazırda Bakı Hərbi Məhkəməsində onun mühakiməsi davam edir.
Şahin Cəfərli ölkədən çıxışına qadağa qoyulduğunu deyir
![Şahin Cəfərli](https://gdb.rferl.org/01000000-0aff-0242-a7c4-08dcb86bb70a_w250_r1_s.png)
Siyasi şərhçi, aparıcı Şahin Cəfərli bildirir ki, ölkədən çıxışına qadağa qoyulub.
Qadağanın Cəfərlinin “Toplum” TV İnternet kanalı ilə əməkdaşlığı ilə əlaqədar tətbiq edildiyi güman edilir. 2023-cü ilin noyabrında bu kanalın bəzi əməkdaşları ilə bağlı cinayət işi açılıb.
Bundan əvvəl Cəfərli Bakı Şəhər Baş Polis İdarəsində bu iş üzrə şahid qismində dindirilib.
Şahin Cəfərli “Toplum” TV-də proqram aparıcısı olub.
Lakin onun ölkədən çıxışına qadağa qoyulması ilə bağlı dediklərinə Daxili İşlər Nazirliyi və başqa rəsmi qurumlardan münasibət almaq mümkün olmayıb.
Bu il martın 6-8-də “Toplum” TV və Demokratik Təşəbbüslər İnstitutunun 9 əməkdaşı saxlanıb. Onlar xarici valyuta qaçaqmalçılığında ittiham olunublar. Yeddi nəfər həbs edilib, iki nəfər polis nəzarətinə verilib.
Bu iş üzrə keçənlər ittihamları rədd edirlər.
Ötən ilin noyabrından başlayaraq Azərbaycanda 20 civarında jurnalist və fəal qaçaqmalçılıq ittihamı ilə həbs edilib.
Bir sıra yerli hüquq müdafiə təşkilatları hesab edirlər ki, hazırda
Azərbaycan həbsxanalarında 300 civarında siyasi məhbus var.Rəsmilər isə ölkədə siyasi məhbusların olması dilə bağlı deyilənləri qəbul etmirlər.Onlar da deyir ki, siyasi məhbus siyahılarına daxil edilən şəxslər sırf törətdikləri əmələ görə, məsuliyyətə alınıblar.
Paris-2024: Azərbaycan 4-cü medalını qazandı
![](https://gdb.rferl.org/01000000-0aff-0242-3ca9-08dcb5519f47_w250_r1_s.jpg)
Azərbaycanın yunan-Roma növü üzrə güləşçisi Həsrət Cəfərov avqustun 8-də Fransanın paytaxtı Parisdə keçirilən Yay Olimpiya Oyunlarının bürünc medalını qazanıb.
67 kq çəki dərəcəsində yer alan H. Cəfərov qırğızıstanlı Amantur İsmayılovla üz-üzə gəlib.
Rəqibinə 8:0 hesabı ilə qalib gələn Həsrət Cəfərov fəxri kürsünün üçüncü pilləsinə yüksəlib.
Bu, Azərbaycanın yunan-Roma güləşçilərinin yarışda qazandığı ilk və tək mükafat olub.
Daha əvvəl cüdoçular Hidayət Heydərov (73 kq) və Zelim Kotsoyev (100 kq) olimpiya çempionu olublar.
Taekvondoçu Qaşım Maqomedov (58 kq) gümüş mükafat qazanıb. Boksçu Alfonso Dominqes (92 kq) finala yüksəlməklə ən azı gümüş medalı təmin edib.
XXIII Yay Olimpiya Oyunlarının rəsmi açılışı iyulun 26-da olub. Olimpiyada oyunları avqustun 11-də başa çatacaq.
Azərbaycan taekvondoçusu gümüş medal qazanıb
Azərbaycan taekvondoçusu Qaşım Maqomedov Fransanın paytaxtı Parisdə təşkil olunan Yay Olimpiya Oyunlarının gümüş medalını qazanıb.
58 kq çəki dərəcəsində yer alan idmançı finalda Cənubi Koreya təmsilçisi Park Taejoonla qarşılaşıb.
Rəqibinə məğlub olan Maqomedov fəxri kürsünün ikinci pilləsinə yiyələnib.
O, ilk hissəni geridə tamamlayıb - 0:9. İkinci hissəni isə zədə üzündən sona qədər davam etdirə bilməyib.
Q.Maqomedov görüş zamanı ayağından zədə alıb.
Bu Paris-2024 Olimpiya Oyunlarında Azərbaycanın 3-cü medalı olub. Buna qədər bu yarışlarda Azərbaycan cüdoçuları Hidayət Heydərov (73 kq) və Zelim Kotsoyev (100 kq) olimpiya çempionu olublar.
XXIII Yay Olimpiya Oyunlarının rəsmi açılışı iyulun 26-da olub.
Azərbaycan bu yarışlara 15 idman növü üzrə 48 idmançı göndərib. Avqustun 11-dək davam edəcək olimpiadaya 200 civarında ölkədən 10 min 500 idmançı qatılıb.
Artıq bu oyunlar çərçivəsində 80 civarında ölkə müxtəlif sayda medallar qazanıb.
Mindən çox namizəd qeydiyyata alınıb
![Məzahir Pənahov](https://gdb.rferl.org/01000000-0aff-0242-06fe-08dcabbc1d93_cx0_cy7_cw0_w250_r1_s.jpg)
İndiyə kimi Azərbaycanda fəaliyyət göstərən partiyalardan 459 nəfərin namizədliyi verilib, onlardan 305-i qeydə alınıb.
Bunu bugün, avqustun 8-də Mərkəzi Seçki Komissiyasının (MSK) sədri Məzahir Pənahov bildirib.
Ümumilikdə isə indiyə kimi 1030 nəfərin deputatlığa namizədliyi qeydə alınıb.
M. Pənahov habelə qeyd edib ki, 1508 nəfər namizədlik üçün müraciət etmişdi.
Azərbaycanda 20-dən çox siyasi partiya fəaliyyət göstərir. Onlardan yalnız biri-Azərbaycan Xalq Cəbhəsi Partiyası (AXCP) növbədənkənar parlament seçkilərini boykot edib. AXCP ölkədə azad və ədalətli seçkilərin olmadığını bəyan edib. Amma istər MSK rəhbərliyi, istərsə də hökumət təmsilçiləri vurğulayırlar ki, ölkədə azad və ədalətli seçkilər üçün bütün imkanlar mövcuddur.
Azərbaycanda növbədənkənar parlament seçkiləri sentyabrın 1-nə təyin olunub. Avqustun 9-da təşviqat mərhələsi start götürəcək.
Seçkilərin bu ilin noyabrında keçiriləcəyi gözlənirdi. Hakim Yeni Azərbaycan Partiyası (YAP) həmin ay ölkədə BMT-nin iqlim konfransını (COP29) keçiriləcəyini səbəb göstərərək parlamentin vaxtından əvvəl buraxılması təşəbbüsü ilə çıxış edib. Təşəbbüs parlamentdə qəbul edilib.
Bundan əvvəlki parlament və prezident seçkiləri də Azərbaycanda növbədənkənar olub. Onda parlament seçkilərinin önə çəkilməsi “prezidentin apardığı islahatlarla ayaqlaşmaq istəyi”, prezident seçkisinin növbədənkənar keçirilməsi isə Qarabağda suverenliyin bərpası ilə izah edilmişdi.
AXCP isə bəyan etmişdi ki, hakimiyyət seçkiləri önə çəkməklə onu tələsik saxtalaşdırmaq niyyəti güdərək istədiyinə nail olub.
Amnesty International Tbilisini Əfqan Sadıqovu Azərbaycana ekstradisiya etməməyə çağırır
![Əfqan Sadıqov Tbilisidə saxlanılıb](https://gdb.rferl.org/01000000-c0a8-0242-4ca7-08dcb476d574_w250_r1_s.jpg)
Amnesty International beynəlxalq insan haqları təşkilatı Gürcüstan hakimiyyətini Əfqan Sadıqovun Azərbaycana deportasiyasını dayandırmağa çağırıb.
Təşkilatın Şərqi Avropa və Mərkəzi Asiya üzrə direktor müavini Denis Krivoşeyev avqustun 5-də yaydığı bəyanatda Tbilisini özünün beynəlxalq öhdəliklərinə əməl etməyə, Əfqan Sadıqovu və ailəsini himayə etməyə çağırır:
"Heç bir şübhə yoxdur ki, Sadıqovun Azərbaycana ekstradisiyası onun insan haqlarının ciddi şəkildə pozulması, onun işgəncəyə məruz qalması, qanunsuz həbs olunması və ədalətsiz mühakimə edilməsi üçün əhəmiyyətli risk yaradır”.
Krivoşeyev əlavə edib ki, Sadıqova qarşı iş Azərbaycanda müstəqil medianın aradan qaldırılması meylinin davam etdirilməsi kimi qiymətləndirilə bilər.
Amnesty International habelə Bakını fərqli düşüncə və müstəqil mediaya siyasi motivli hücumlarını dayandırmağa və yalnız öz ifadə azadlığından istifadə etdiyinə görə həbs olunmuş bütün şəxsləri dərhal azad etməyə çağırır.
Azel.Tv saytının rəhbəri Əfqan Sadıqov Tbilisidə həbs edilib
Gürcüstanda Tbilisi Şəhər Məhkəməsinin Azel.Tv saytının rəhbəri Əfqan Sadıqov barəsində həbs qətimkan tədbiri seçdiyi bildirilir.
Bu barədə onun həyat yoldaşı Sevinc Sadıqova məlumat yayıb. Onun sözlərinə görə, Tbilisi polisi avqustun 3-də həyat yoldaşını saxlayıb.
Sevinc Sadıqova qeyd edir ki, Azərbaycanda Əfqan Sadıqova qarşı mayın 10-da Daxili İşlər Nazirliyində cinayət işi qaldırıldığı bildirilir: “İyunda Bakıda "Asan Xidmət"ə həyat yoldaşıma qarşı cinayət və ya məhkəmə işinin olub-olmaması, axtarışda olub-olmaması ilə bağlı sorğu göndərdim. Sorğuya cavabda sadəcə onun barəsində məhkumluğun olduğu göstərilib”, Sadıqova bildirib.
O hesab edir ki, həyat yoldaşına qarşı cinayət işi saxtadır. Sadıqova vurğulayıb ki, həbs qərarından apellyasiya şikayəti veriləcək.
Hələlik, onun dediklərini Gürcüstan və Azərbaycan rəsmi qurumlarından dəqiqləşdirmək mümkün olmayıb.
S.Sadıqova onu da əlavə edir ki, saxlanmasından bir gün əvvəl Əfqan Sadıqov Gürcüstanın Ombudsmanı ilə görüşüb: “Ə.Sadıqov Ombudsmana iyulun 17-də Gürcüstan sərhədçilərinin onun ölkədən Türkiyəyə getməsinə necə imkan vermədiyi barədə məlumat verib. Ə.Sadıqova deyiblər ki, o, ancaq Azərbaycana qayıda bilər.”
Əfqan Sadıqov 2023-cü ildə ailəsi ilə birlikdə Gürcüstana köçmüşdü.
Ə.Sadıqov həbsindən öncə AzadlıqRadiosunun gürcü xidmətinə deyib ki, Gürcüstanda özünü təhlükəsiz saymır və Bosniya-Herseqovinaya getmək istəyir. Ancaq ona sərhədi keçməyə icazə verməyiblər.
“Gürcüstan və Azərbaycan hökumətləri dostdurlar. (Azərbaycan prezidenti İlham) Əliyev Gürcüstandan mənim təhvil verilməyimi istəyə bilər. O nə istəsə, Gürcüstan hökuməti yerinə yetirəcək. Bundan qorxuram”, -- Ə.Sadıqov həbsindən 10 gün əvvəl deyirdi.
Əvvəlki həbslər
“Azel Tv”nin rəhbəri olan Ə.Sadıqov 2020-ci ildə Cinayət Məcəlləsinin 182.2.1-ci və 182.2.4-cü (qabaqcadan əlbir olan bir qrup şəxs halında xeyli miqdarda əmlakı hədə-qorxu ilə tələb etmə) maddələri ilə təqsirli bilinərək Bakı Ağır Cinayətlər Məhkəməsinin hökmü ilə 7 il həbs edilib. Bir il sonra Sumqayıt Apellyasiya Məhkəməsi onun cəzasını 6 ilə endirmişdi. O, 2022-ci il mayın 27-də isə əfv olunmuşdu.
Əfqan Sadıqov ondan da əvvəl 2016-cı il noyabrın 22-də həbs edilmişdi. Onda isə Cinayət Məcəlləsinin 127.2.3-cü (xuliqanlıq niyyəti ilə təhlükəli üsulla sağlamlığa qəsdən az ağır ziyan vurma) maddəsi ilə ittiham olunaraq 2 il 6 ay müddətinə azadlıqdan məhrum olunmuşdu. Sonradan onun cəzası 1 il azaldıldı. Ə.Sadıqov 2018-ci ilin mayında azadlığa çıxdı. O, bütün hallarda ittihamları qəbul etməyib və onların onun jurnalist fəaliyyətinin məhdudlaşdırılmasına yönəldiyini bildirib.
Onu yerli hüquq müdafiəçiləri əvvəlki həbsi zamanı siyasi məhbus kimi tanımışdılar. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, Azərbaycan siyasi məhbus adlandırılan şəxslər sırf törətdikləri əmələ görə məsuliyyətə alınıblar.
Hazırda Azərbaycanda azı 10 jurnalist həbsdədir, onlar ittihamları qəbul etmir, siyasi motivli sayırlar.
AXCP üzvünə 3 il həbs cəzası kəsildi: ‘Necə olur ki, hamımız yerdən narkotik tapırıq?’
![Elnur Həsənov](https://gdb.rferl.org/d5f93274-3ff0-438a-beb8-31796f0817b6_cx0_cy16_cw0_w250_r1_s.jpg)
Azərbaycan Xalq Cəbhəsi Partiyasının (AXCP-nin) üzvü Elnur Həsənova 3 il həbs cəzası kəsilib. Avqustun 2-də Bakı Ağır Cinayətlər Məhkəməsində belə hökm verilib.
Cəbhəçi fəalın 39 yaşı var və o, 8 aydan çoxdur narkotik ittihamıyla həbsdədir. Cinayət işinin materiallarında iddia olunur ki, saxlanılarkən onun cibindən 5 qramdan çox narkotik tapılıb. Ona Cinayət Məcəlləsinin 234.4.3-cü (satış məqsədilə külli miqdarda narkotik əldə etmə, daşıma, saxlama) maddəsilə ittiham verilib.
Avqustun 2-də məhkəmədə prokuror da elə həmin maddə ilə E.Həsənova 6 il 6 ay cəza istəyib.
Müvəkkilinin təqsirsiz olduğunu söyləyən vəkil Nemət Kərimli ona bəraət verilməsini istəyib. Vəkil bu cinayət işində çoxsaylı qanun pozuntularını vurğulayaraq, ortada iki polisin ifadəsindən başqa heç bir sübutun olmadığını deyib. O, həmin iki ifadənin, az qala, nöqtə-vergülünədək bir-birini təkrarladığını diqqətə yetirib. Bu da, o polislərin istintaq vaxtı hazır ifadələrə imza atdığını düşünməyə əsas verir.
N.Kərimli əlavə edib ki, E.Həsənovun qardaşı 2020-ci ildə 44 günlük müharibədə Azərbaycanın ərazi bütövlüyü uğrunda döyüşlərdə həlak olub və ona şəhid statusu verilib.
“Kimi şərləyirlər, yazırlar ki, üstündən narkotik çıxıb”
Cəbhəçi fəalın özü də son sözündə şərlənərək həbs olunduğunu deyib. O, siyasi baxışlarına, o cümlədən sosial şəbəkələrdəki tənqidi paylaşımlarına görə narkotiklə şərlənərək cəzalandırıldığını bildirib.
E.Həsənov həbsindən öncə qanunsuz cərimələr yazdıqları üçün yol polislərin fəaliyyətini tənqid edən paylaşımlarına diqqət çəkib. O, Facebook hesabında buna etiraz olaraq, Dövlət Yol Polisi İdarəsinin rəisi Ramiz Zeynalovun vəzifədən çıxarılmasını tələb etdiyini bildirib.
“Kimi şərləyirlər, yazırlar ki, üstündən narkotik çıxıb, onu yerdən tapmışdı? Narkotik bostanda bitir ki, elə hamımız yerdən narkotik tapaq? Necə olur ki, hamımız yerdən narkotik tapırıq?”, - E.Həsənov son sözündə belə deyib.
Onun çıxışının ardından müşavirəyə gedən hakimlər bir neçə dəqiqə sonra geri qayıdaraq, hökmü açıqlayıblar. Hökmə görə, E.Həsənova qarşı ittiham nisbətən yüngülləşdirilərək, CM-in 234.4.3-cü maddəsindən 234.1-1-ci maddəsinə tövsif olunub – ittihamdakı satış məqsədi çıxarılıb. Bu maddə ilə də ona 3 il həbs cəzası kəsilib.
Vəkil Nemət Kərimli AzadlıqRadiosuna hökmdən apellyasiya şikayəti verəcəklərini bildirib.
Xatırlatma
İndi AXCP-nin 10 nəfərə yaxın üzvü həbsdədir.
Son illərdə onlarla ictimai-siyasi fəal narkotik ittihamıyla həbs edilib. İttihamla razılaşmayan fəallar hökumətin ünvanına səsləndirdikləri tənqidlərə, sosial mediadakı paylaşımlara görə şərlənərək cəzalandırıldıqlarını deyirlər. Onlar narkotiki ciblərinə polislərin atdığını, işgəncə altında etiraf ifadəsi verməyə məcbur qaldıqlarını deyirlər.
Daxili İşlər Nazirliyi fəalların narkotiklə şərlənməsi, işgəncəyə məruz qalması haqda dediklərini təkzib edir. Nazirliyin mətbuat xidməti iddia edir ki, onlar konkret faktlar əsasında saxlanılıblar.
Paris-2024: Azərbaycan olimpiadada ikinci qızıl medalı qazanıb
![Zelim Kotsoyev](https://gdb.rferl.org/e561de31-fd23-4fce-92f7-4076fda44e07_cx0_cy7_cw0_w250_r1_s.jpg)
Azərbaycan bugün, avqustun 1-də Fransada keçirilən Yay Olimpiya Oyunlarında ikinci qızıl medalı qazanıb.
Azərbaycan cüdoçusu Zelim Kotsoyev finalda Gürcüstan idmançısı İlya Sulamenizdeni məğlub edərək Olimpiya çempionu olub.
Bununla, Azərbaycan Olimpiya komandası hesabına ikinci qızıl medalı yazdırıb.
Bundan əvvəl iyulun 29-da isə Azərbaycanın başqa bir cüdoçusu Hidayət Heydərov (73 kq) qızıl medal qazanmışdı.
73 kq çəki dərəcəsində yarışan Hidayət Heydərov finalda fransalı Con Benjamin Qabanı məğlub etmişdi.
XXIII Yay Olimpiya Oyunlarının rəsmi açılışı iyulun 26-da olub.
Azərbaycan bu yarışlara 15 idman növü üzrə 48 idmançı göndərib. Avqustun 11-dək davam edəcək olimpiadaya 204 ölkədən 10 min 500 idmançı qatılıb.
Artıq bu oyunlar çərçivəsində 40-dan çox ölkə müxtəlif sayda medallar qazanıb.
Xatırlatma
Bundan əvvəl koronovirus pandemiyasına görə, 1 il geçikmə ilə 2021-ci ildə Yaponiyada keçirilən XXII Yay Olimpiadasında Azərbaycan 7 medal qazanmışdı (3 gümüş və 4 bürünc).
Braziliyada 2016-cı ildə gerçəkləşən XXI Olimpiadada isə Azərbaycan daha çox medal- 1 qızıl, 7 gümüş və 10 bürünc əldə etmişdi.
COP29-a görə şagirdlər payız tətilinə buraxılacaq, tələbələr distant təhsilə keçəcək
![Bakıda 20 saylı məktəb-lisey](https://gdb.rferl.org/01000000-0aff-0242-ddb6-08db36a246af_w250_r1_s.jpg)
Birləşmiş Millətlər Təşkilatının (BMT) İqlim konfransına (COP29) görə Azərbaycanda şagirdlər payız tətilinə buraxılacaq, Bakı, Sumqayıt və Abşeronda tələbələr distant təhsilə keçəcəklər.
Bununla bağlı Nazirlər Kabineti bu gün, avqustun 1-də qərar verib.
Qərara əsasən, ölkədə fəaliyyət göstərən təhsil ocaqlarında (xüsusi təhsil müəssisələri istisna olmaqla) ümumi təhsil pilləsi üzrə -2024-cü il noyabrın 12-dən 22-dək payız tətili olacaq.
Peşə, orta ixtisas və ali təhsil pillələri üzrə isə Bakı və Sumqayıt şəhərlərində, Abşeron rayonunda noyabrın 12-dən 22-dək distant (məsafədən) formada təhsilə keçiləcək.
Noyabrın 11-dən 22-nə kimi Bakıda COP29 ilə yanaşı, Kioto Protokolunun Tərəflər Görüşünün 19-cu sessiyası və Paris Sazişinin Tərəflər Görüşünün 6-cı sessiyası da keçiriləcək.
Apellyasiya Məhkəməsi İqbal Əbilovu həbsdə saxlayıb
![İqbal Əbilov](https://gdb.rferl.org/01000000-0aff-0242-9653-08dcac7a1631_cx0_cy4_cw0_w250_r1_s.jpg)
İyulun 31-də Bakı Apellyasiya Məhkəməsində 'Talış Milli Akademiyasının xəbərləri'nin baş redaktoru İqbal Əbilovun həbsindən verilən şikayətə baxılıb. Amma şikayət təmin edilməyib. Müdafiə tərəfindən verilən məlumata görə, o, ittihamları rədd edib.
“İqbal Əbilov bildirdi ki, o, sırf elmi fəaliyyət və tədqiqatla məşğul olub. O, ittihamı, ümumiyyətlə, başa düşmədiyini bildirdi”, – deyə vəkil Rövşanə Rəhimova qeyd edib.
Müdafiə tərəfi də hesab edir ki, ittihamın maddi hüquqi əsası yoxdur və yalnız istintaqın subyektiv fərziyyələrinə əsaslanır. Vəkil bildirib ki, Əbilovun hüquqlarının müdafiəsi və bərpası üçün bütün hüquqi addımlar atılacaq.
"Oğlum siyasətlə məşğul olmayıb"
İyulun 24-də Səbail rayon Məhkəməsi İ.Əbilov barəsində 4 ay müddətinə həbs-qətimkan tədbiri seçmişdi. O, Cinayət Məcəlləsinin 283 (milli ədavətin qızışdırılması) və 274 (dövlətə xəyanət) maddələri ilə ittiham olunur.
Onun atası Şahin Əbilov da deyirdi ki, İ.Əbilov ona qarşı irəli sürülən ittihamları qəbul etmir.
O əlavə edib ki, oğlu uşaqlıqdan Belarusda yaşayıb: "Oğlum siyasətlə məşğul olmayıb. O, geniş elmi araşdırmalar aparıb. Onun tədqiqatları təkcə talışlarla bağlı deyil, Çindən Türkiyəyə qədər bütün geniş regiona aid olub".
Bəzi yaxınları isə onun həbsini müxtəlif milli azlıqlar, o cümlədən Azərbaycan talışları ilə bağlı araşdırmaları ilə izah edirlər.
Atasının və yaxınlarının bu açıqlamasına, hələlik, rəsmi qurumlardan münasibət almaq mümkün olmayıb.
Amma yerli saytlarda yer alan iddialara görə, İ.Əbilov üçüncü ölkə ərazisində məskunlaşıb xarici xüsusi xidmət orqanının tapşırıqlarını icra etməklə dövlətə xəyanətdə, Azərbaycan ərazisində etnik zəmində nifrət və düşmənçiliyin salınmasına yönələn hərəkətlərdə təqsirləndirilir.
DTX saxlayıb
Belarusdan Azərbaycana məzuniyyətə gələn Azərbaycan vətəndaşı İ.Əbilovu iyulun 22-də Masallı rayonunun Bala Kolatan kəndində Dövlət Təhlükəsizliyi Xidmətinin (DTX) əməkdaşları saxlayıb.
35 yaşlı İ.Əbilov virtual "Talış Milli Akademiyası"nın mətbu orqanı olan "Talış Milli Akademiyasının xəbərləri"nin baş redaktorudur. Saytda talış folklor nümunələri, talışlarla bağlı nəşr olunmamış tarixi sənədlər, tədqiqatlar dərc edilib.
İ.Əbilov Belarus Dövlət Universitetinin Beynəlxalq münasibətlər ixtisası üzrə 2012-ci ildə bakalavr, 2013-cü ildə isə magistraturasını bitirib. 2016-cı ildə həmin universitetin aspiranturasına daxil olub.
Azərbaycanın 4 hərbi qulluqçusu vəfat edib
![Müdafiə Nazirliyi](https://gdb.rferl.org/01000000-c0a8-0242-2d80-08dc12a93a7b_w250_r1_s.jpg)
İyulun 30-u Laçin rayonu ərazisində Azərbaycanın 4 hərbi qulluqçusunun həlak olduğu bildirilir.
Bu barədə məlumatı Azərbaycan Müdafiə Nazirliyindən də təsdiqləyiblər.
Nazirlikdən bildirildiyinə görə, “xidmətdən kənar saatlarda Laçın rayonu ərazisində kükürd qazlı termal sularda çimərkən ilkin ehtimala görə zəhərlənən” 4 hərbi qulluqçunun meyitləri aşkar edilib. Onlardan birinin kapitan, birinin gizir, qalan ikisinin isə çavuş rütbəsini daşıdıqları bildirilir.
Hələlik, rəsmi məlumata adları çəkilən hərbi qulluqçuların yaxınlarından münasibət öyrənmək mümkün olmayıb.
Hərbi Prokurorluq araşdırma aparır
Hərbi Prokurorluğun Mətbuat xidməti hərbi qulluqçuların Laçın rayonun ərazisində meyitlərinin aşkarlanması ilə bağlı araşdırma aparıldığını bildirir.
Məlumata görə, Qubadlı hərbi prokurorluğunun və Azərbaycan Hərbi Prokurorluğunun Kriminalistika və İnformasiya Texnologiyaları idarəsinin əməkdaşları hadisə yerinə, habelə meyitlərə baxış keçirilib:
“İş üçün əhəmiyyət kəsb edən predmetlər maddi sübut kimi götürülüb, müvafiq ekspertizalar təyin edilərək, icraya yönəldilib, eləcə də izahatlar alınıb və digər hərəkətlər icra edilib. Hazırda Qubadlı hərbi prokurorluğunda araşdırma davam etdirilir”.
Müdafiə Nazirliyində keçmiş rəhbər şəxs həbs edilib
Müdafiə Nazirliyinin Mənzil-İstismar İdarəsinin Əsaslı və Cari Təmir bölməsinin keçmiş müdiri Rəhim Laçınov həbs edilib.
Respublika Hərbi Prokurorluğunun Mətbuat xidmətinin rəhbəri Firad Əliyev iyulun 30-da “Turan”a bildirib ki, iş bu qurumun İstintaq idarəsində aparılır.
R.Laçınova qarşı Cinayət Məcəlləsinin 179.4-cü ( külli miqdarda mənimsəmə və ya israf etmə), 32.5, (Cinayətin törədilməsinə məsləhətləri,... ilə köməklik etmək) və 341.2.3-cü ( ağır nəticələrə səbəb olmaqla vəzifə səlahiyyətlərindən sui-istifadə və ya vəzifə səlahiyyətlərini aşma) maddələri ilə ittiham elan edilib. Onun barəsində Bakı Hərbi Məhkəməsinin qərarı ilə həbs qətimkan tədbiri seçilib.
İttihamlara, hələlik, Rəhim Laçınov və onun vəkillərindən münasibət öyrənmək mümkün olmayıb.
Bu ittihamlarla şəxsə 14 ilə qədər həbs cəzası verilə bilər.
Son illər Azərbaycanda Müdafiə Nazirliyinin maliyyə, habelə maddi-texniki təchizat sahələri ilə bağlı bir sıra vəzifəli şəxsləri mənimsəmə və başqa ittihamlarla həbs ediliblər. Bu günlər məhkəməsi gedən belə cinayət işlərinin birində 143 milyon manatlıq yeyinti iddasından bəhs edilir. Amma işdə təqsiriləndirilən şəxslər araşdırmaları düzgün saymır, özlərinin verilən tapşırıqları yerinə yetirdiklərini bildirirlər.
Paris-2024: Azərbaycan idmançısı qızıl medal qazanıb
![Hidayət Heydərov və Akil Qyakova](https://gdb.rferl.org/1bcf23d9-3347-4a19-ae89-58d0411c6ced_cx0_cy10_cw0_w250_r1_s.jpg)
Fransada keçirilən Yay Olimpiya Oyunlarında Azərbaycan cüdoçusu Hidayət Heydərov bugün, iyulun 29-da qızıl medal qazanıb.
73 kq çəki dərəcəsində yarışan Hidayət Heydərov finalda fransalı Con Benjamin Qabanı məğlub edib.
Mübarizəyə 1/8 finaldan başlayan Hidayət Heydərov bu mərhələdə Tohar Butbulla (İsrail) qalib gəlib. O, 1/4 finalda Artur Margelidondan (Kanada), yarımfinalda isə Akil Qyakovadan (Kosovo) güclü olub.
Bu, Hidayət Heydərovun karyerasında ilk iştirak etdiyi olimpiadadır.
Bununla da Azərbaycan Fransada keçirilən 33-cü Yay Olimpiya Oyunlarında ilk medalına yiyələnib. 33-cü Yay Olimpiya Oyunlarının rəsmi açılışı iyulun 26-da olub.
Azərbaycan bu yarışlara 15 idman növü üzrə 48 idmançı göndərib. Avqustun 11-dək davam edəcək olimpiadaya 204 ölkədən 10 min 500 idmançı qatılıb.
Artıq bu oyunlar çərçivəsində 20-dən çox ölkə müxtəlif sayda medallar qazanıb.
Azərbaycan AŞPA-ya parlament seçkilərini müşahidə etmək üçün dəvət göndərməyib
![AŞPA-nın sessiyası (Arxiv fotosu)](https://gdb.rferl.org/01000000-0aff-0242-5c13-08db480738ca_cx0_cy13_cw0_w250_r1_s.jpg)
Azərbaycandan Avropa Şurasının Parlament Assambleyasına (AŞPA) ölkədə sentyabrın 1-də keçiriləcək parlament seçkilərini müşahidə etmək üçün rəsmi dəvət göndərilməyib.
Bu barədə “Turan”a Azərbaycan Xarici İşlər Nazirliyinin (XİN) sözçüsü Ayxan Hacızadə məlumat verib.
O qeyd edib ki, Xarici İşlər Nazirliyi 7 beynəlxalq təşkilatı dəvət edib:
“ATƏT Demokratik Təsisatlar və İnsan Haqları Bürosu, Müstəqil Dövlətlər Birliyi, İslam Əməkdaşlıq Təşkilatı, GUAM, Qoşulmama Hərəkatı Gənclər Təşkilatı, Şanxay Əməkdaşlıq Təşkilatı, Türk Dövlətləri Təşkilatı XİN-in dəvət etdiyi təşkilatlardır”.
Amma, hələlik, AŞPA-ya dəvətin göndərilməməsinin səbəbləri ilə bağlı rəsmi açıqlama yoxdur.
Bundan əvvəl bu ilin fevralında Azərbaycanda keçirilən növbədənkənar prezident seçkiləri ilə də bağlı da AŞPA-ya dəvət göndərilməmişdi.
Bu il bu qurumla Azərbaycan arasında müəyyən gərginlik də yaşanıb. AŞPA-nın yanvar sessiyasında Azərbaycan nümayəndə heyətinin səsvermə hüququ tanınmayıb.
Buna səbəb kimi əməkdaşlıqda problemlərin yaşanması və Azərbaycanın insan hüquqları ilə bağlı üzərinə götürdüyü öhdəliklərə əməl etməməsi göstərilb.
Azərbaycan da iradları qəbul etməyərək, buna cavab olaraq qurumda fəaliyyətini dayandırdığını açıqlayıb.
Xatırlatma
Azərbaycanda sentyabrın 1-nə növbədənkənar parlament seçkiləri təyin olunub. Halbuki seçkilərin bu ilin noyabrında keçiriləcəyi gözlənirdi.
Hakim Yeni Azərbaycan Partiyası (YAP) həmin ay ölkədə BMT-nin iqlim konfransını (COP29) səbəb göstərərək parlamentin vaxtından əvvəl buraxılması təşəbbüsü ilə çıxış edib. Təşəbbüs parlamentdə qəbul edilib.
Bundan beş il əvvəl də YAP parlamentin özünü buraxması və erkən parlament seçkilərinin keçirilməsi təşəbbüsünü irəli sürmüşdü. Onda partiya bunu prezidentin apardığı islahatlarla ayaqlaşmaq istəyi ilə izah etmişdi.
Nəticədə parlament seçkiləri vaxtından altı ay əvvəl baş tutmuşdu. Sonradan əvvəlki tərkibin əksəriyyətinin yenidən parlamentə düşməsi bir çoxlarının tənqidinə səbəb olmuşdu.
Müxalifət partiyaları isə bəyan etmişdilər ki, hakimiyyət seçkiləri önə çəkməklə onu tez-tələsik saxtalaşdırmaq məqsədi güdür.
Hakimiyyət rəsmiləri isə ölkədə seçkilərin xalqın iradəsini ifadə etdiyini vurğulayırlar.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
Ətraflı məlumat üçün bura klikləyin.