Die eerste keer toe ek vir Sally Andrew ontmoet, was sy deftig uitgedos in ’n balrok. Dit was in 2022 tydens die Schreiner Karoo-skrywersfees op Cradock by die bekendstellng van haar boek The Milk Tart Murders.
Die geleentheid het in die namiddag plaasgevind, en in die Victoria Manor se volgepakte eetkamer het die gaste se oë gedurig van die lieflike Sally (56) na die ewe aanloklike eetgoed gespring – handtertjies en kolwyntjies gebak deur die hotel se Cherie Antrobus en haar personeel.
Wat egter mý oog gevang het, is die lang man met gebeitelde gelaatstrekke – Sally se lewensmaat, die kunstenaar Bowen Boshier (59).
Ek het Sally én die deftige tee en versnaperinge vreeslik geniet. Later daardie aand was ek, my man, Chris, en Sally en Bowen só gemaklik met mekaar dat hulle ons genooi het om te kom kuier waar hulle buite Ladismith in ’n natuurreservaat woon. “Die huis het nie op die oomblik vensters nie en ons kamp maar eintlik binnenshuis,” het sy bygevoeg. “Maar julle is enige tyd welkom!”
Dit was egter twee jaar voordat ek en Chris uiteindelik daar uitkom. Sally stuur ’n ellelange WhatsApp met padaanwysings, want Google Maps weet skynbaar nie waar dié plek lê nie. Nie dat dit veel help nie, want die oomblik toe ons ’n ent wes van Ladismith van die R62 afdraai, verdwyn die selfoonsein.
Ons stoot verder. Die aanwysings is soos raaisels wat ’n mens na ’n versteekte skat lei. Mylmerkers word genoem. Klein padbordjies wat jy maklik