લોકસભા ચૂંટણી 2024 (Lok Sabha Election 2024)

2024ની લોકસભા ચૂંટણીમાં મુખ્ય મુકાબલો ભાજપ અને કોંગ્રેસ વચ્ચે રહેશે. છેલ્લા 10 વર્ષથી દેશમાં ભાજપની આગેવાની હેઠળની NDA સરકાર સત્તામાં છે અને કોંગ્રેસનું પર્ફોમન્સ દસ વર્ષથી સતત નબળું પડી રહ્યું છે. 2024માં ભાજપને ટક્કર આપવા માટે કોંગ્રેસે INDIA બ્લોકની રચના કરીને વિપક્ષોને એક છત્ર હેઠળ લાવવાનો પ્રયા કર્યો હતો, પરંતુ નીતિશ કુમાર જેવા નેતાએ રાતોરાત INDIAમાંથી એક્ઝિટ લઈ ભાજપનો હાથ પકડી લેતા કોંગ્રેસના આ પ્રયાસોને મોટો આંચકો લાગ્યો હતો. હવે જો ભાજપની વાત કરવામાં આવે તો આ વખતે પાર્ટી 400થી વધુ બેઠકો જીતવાના લક્ષ્યાંક સાથે ચૂંટણીના મેદાનમાં ઉતરી છે, જ્યારે ગુજરાત જેવા પોતાના ગઢ સમાન કહેવાતા રાજ્યમાં પક્ષે દરેક બેઠકને પાંચ લાખથી વધુની લીડ સાથે જીતવાનો લક્ષ્યાંક રાખ્યો છે. જોકે, 400થી વધુ બેઠકો મેળવવાના લક્ષ્યાંકને પાર પાડવા માટે ભાજપે દક્ષિણ ભારતના રાજ્યો ઉપરાંત બંગાળ, બિહાર અને મહારાષ્ટ્રમાં પણ ઘણો પરસેવો પાડવો પડે તેવી શક્યતા નકારી શકાય તેમ નથી. 2024ની ચૂંટણી કોંગ્રેસ માટે અસ્તિત્વનો સવાલ બની રહેવાની છે જ્યારે ભાજપ માટે આ જંગ પ્રતિષ્ઠાનો છે, તેવામાં મતદારો કોના પર પસંદગીનો કળશ ઢોળે છે તે જોવું રસપ્રદ બની રહેશે.