અમદાવાદના પાલડીમાં માતાની હત્યા કરી પુત્રએ જીવન ટૂંકાવ્યું

અમદાવાદના પાલડી વિસ્તારમાં બુધવારે માતા-પુત્રના મોતની ઘટનાથી ચકચાર મચી ગઈ છે. પાલડી વિસ્તારમાં આવેલા મહાલક્ષ્મી ફ્લેટમાં આ ઘટના બની છે. જેમાં પુત્રએ પહેલા માતાની હત્યા કરી હતી અને ત્યારબાદ તેણે આત્મહત્યા કરી લીધી હતી. પાડોશીઓએ આ અંગે પોલીસને જાણ કરી હતી. ઘટનાની જાણ થતાં જ પોલીસ પણ ત્યાં પહોંચી ગઈ હતી અને વધુ તપાસ હાથ ધરી હતી.આ ઘટના બુધવારે વહેલી સવારે કે પછી મંગળવારે રાત્રે બની હોય તેવું માનવામાં આવી રહ્યું છે. પાડોશીઓનું કહેવું હતું કે પુત્રને નોકરી જવાનું હોવાના કારણે દરરોજ તેઓ વહેલા ઉઠી જાય છે. પરંતુ બુધવારે સવારે તેમનો દરવાજો બંધ હતો જેના કારણે પાડોશીઓને શંકા ગઈ હતી. તેમણે બાદમાં પોલીસને જાણ કરી હતી અને પોલીસ ઘટના સ્થળે પહોંચી હતી. પોલીસે ત્યાં તપાસ હાથ ધરી હતી પરંતુ તેમને કોઈ સુસાઈડ નોટ મળી ન હતી. તેથી પુત્રએ માતાની હત્યા કરીને શા માટે આત્મહત્યા કરી તેનું કારણ હાલ પૂરતું જાણવા મળ્યું નથી.

આ ઘટનાની જાણ એફએસએલને પણ કરવામાં આવી હતી. એફએસએલની ટીમ પણ ઘટના સ્થળે પહોંચી હતી. ઘરમાં ફક્ત માતા-પુત્ર જ રહેતા હતા. પાડોશીઓનું કહેવું હતું કે પુત્ર થોડા સમયથી ડીપ્રેશનમાં રહેતો હતો પરંતુ બીજી કોઈ તકલીફ ન હતી. તેણે આવું કૃત્ય કર્યું તે જાણીને પાડોશીઓને પણ વિશ્વાસ થતો નથી. જોકે, પ્રાથમિક તપાસમાં તેના આ કૃત્ય પાછળનું કારણ સામે આવ્યું નથી. પોલીસે ઘટના સ્થળનું નિરિક્ષણ કરીને આગળની તપાસ હાથ ધરી છે.

તાજેતરમાં અંકલેશ્વરમાં પણ આવી જ એક ઘટના સામે આવી હતી. જેમાં પુત્રએ માતાની હત્યા કરી હતી. અંકલેશ્વર જીઆઈડીસીમાં આવેલા એક એપાર્ટમેન્ટમાં સિદ્ધાંત ચૌધરીની તેની માતા સાથે કોઈ મુદ્દે બોલાચાલી થઈ હતી. જેના કારણે સિદ્ધાંત રોષે ભરાયો હતો અને માતાને ચપ્પાના ઉપરાછાપરી ઘા માર્યા હતા જેના કારણે માતાનું મોત થયું હતું.