અમદાવાદ: અમેરિકાની ભીંસ વધતા થોડા સમય પહેલા જ શરૂ થયેલી ડોંકી ફ્લાઈટની એક નવી લાઈન બંધ થઈ ગઈ છે. સૂત્રોનું માનીએ તો ઈન્ડિયાના એજન્ટો છેલ્લા બે-ત્રણ મહિનાથી લિબિયાની ગધામિસ એરના ચાર્ટર્ડ એરક્રાફ્ટથી પોતાના પેસેન્જર્સને વાયા લિબિયા થઈને નિકારાગુઆ પહોંચાડી ત્યાંથી અમેરિકા મોકલતા હતા. અમેરિકાની નજરમાં ડોંકી ફ્લાઈટની આ નવી લાઈન ઘણા સમયથી આવી ગઈ હતી, પરંતુ લિબિયાની એરલાઈન તેને નહોતી ગાંઠતી અને અમેરિકા નિકારાગુઆમાં પણ તેનું લેન્ડિંગ નહોતું અટકાવી શકતું.
જોકે, હવે એક એવી માહિતી બહાર આવી છે કે લિબિયાની સરકારે આ એરલાઈનના સંચાલકોની ધરપકડ કરવા માટે આદેશ આપ્યો છે, અને તેમના પર વાયા નિકારાગુઆથી લોકોને ઈલીગલી અમેરિકા મોકલવાના કામમાં સામેલ હોવાનો આરોપ મૂકાયો છે. ત્રિપોલીની એટર્ની જનરલ ઓફિસના જણાવ્યા અનુસાર ગધામિસ એરના કોમર્શિયલ ડિરેકટર સામે હાલ તપાસ ચાલી રહી છે. જ્યારે તેનો ઓનર લિબિયા છોડીને ભાગી ગયો હોવાનું પણ સૂત્રોના હવાલેથી જાણવા મળ્યું છે.
સૂત્રોનું માનીએ તો છેલ્લા બે-ત્રણ મહિનામાં એજન્ટોએ આવી કુલ છ ડોંકી ફ્લાઈટ્સ ઓપરેટ કરી હતી, જેમાં 1800ની આસપાસ ઈન્ડિયન અને નેપાળી પેસેન્જર્સને નિકારાગુઆ મોકલવામાં આવ્યા હતા. આ છ ડોંકી ફ્લાઈટ્સમાં લગભગ 200-300 જેટલા ગુજરાતીઓને પણ નિકારાગુઆ ગયા હતા. આ રૂટ પરથી શરૂઆતની એકાદ-બે ફ્લાઈટ્સ દુબઈથી રવાના થઈ હતી પરંતુ દુબઈમાં પણ પ્રેશર વધી જતાં એજન્ટો કઝાકિસ્તાનના અલમાટી એરપોર્ટ પરથી આ ફ્લાઈટ્સ અરેન્જ કરી તેમાં પોતાના પેસેન્જર્સને બેસાડતા હતા. લિબિયાના રૂટ પરથી છેલ્લી ફ્લાઈટ 03 જૂનના રોજ ઓપરેટ થઈ હતી, જેણે અલમાટીથી ટેક-ઓફ કર્યા બાદ ત્રિપોલીમાં સ્ટોપેજ લીધું હતું અને ત્યાંથી તે સીધી નિકારાગુઆ પહોંચી હતી. આ ફ્લાઈટમાં પણ 20 જેટલા ગુજરાતીઓ હતા તેવી માહિતી સામે આવી હતી અને તેનું એક લિસ્ટ પણ તે વખતે અમુક વોટ્સએપ ગ્રુપ્સમાં ફરી રહ્યું હતું.
આ લિસ્ટમાં પેસેન્જરના નામ અને એડ્રેસ સાથે તેમના પાસપોર્ટના નંબર પણ હતા, જેમાં ગુજરાતથી જનારા મોટાભાગના મહેસાણા જિલ્લાના હતા. એકાદ-બે કેસમા તો આખી ફેમિલી પણ આ ફ્લાઈટથી નિકારાગુઆ ગઈ હતી. સૂત્રોનો દાવો છે કે 03 જૂનના રોજ નિકારાગુઆ જવા નીકળેલી ફ્લાઈટની ગોઠવણ હૈદરાબાદ અને પંજાબના નામચીન એજન્ટોએ કરી હતી અને ગુજરાતના એજન્ટોએ પણ પોતાના 20 જેટલા પેસેન્જર્સને તેમના મારફતે જ રવાના કર્યા હતા. હૈદરાબાદનો જે એજન્ટ આ રેકેટમાં સામેલ હતો તે નેપાળથી ઓપરેટ કરતો હોવાનું પણ સામે આવ્યું હતું.
ગધામિસ એર મારફતે ડોન્કી ફ્લાઈટ્સ અરેન્જ કરવાનું બધું કામકાજ પંજાબના એજન્ટો અને હાલ નેપાળથી ઓપરેટ કરતો અને મૂળ હૈદરાબાદનો બીજો એક એજન્ટ કરતો હતો, જેમની સાથે ગુજરાતના એજન્ટો પણ સંકળાયેલા છે. સૂત્રોનું એવું પણ કહેવું છે કે ગુજરાતના એજન્ટો પોતાના પેસેન્જરનું તમામ પેમેન્ટ ડોંકી ફ્લાઈટ્સ અરેન્જ કરનારાને એડવાન્સમાં ચૂકવી દેતા હતા જેમાં તેમને મોટો કટ મળતો હતો. ડોંકી ફ્લાઈટ જ્યાંથી ઉપડવાની હોય ત્યાં સુધી પેસેન્જર્સને ગુજરાતના એજન્ટો પહોંચાડતા હતા અને ત્યાંથી તેમને આગળ લઈ જવાની જવાબદારી ફ્લાઈટ અરેન્જ કરનારા એજન્ટોની રહેતી હતી.
એક ચાર્ટર્ડ ફ્લાઈટનો ખર્ચો લગભગ 40 કરોડ રૂપિયાની આસપાસ આવતો હતો, જેમાં 300 પેસેન્જર્સને મોકલવામાં આવતા હતા અને આખી ફ્લાઈટ ભરાઈ જાય તેટલા પેસેન્જર્સ મળ્યા બાદ જ તેની તારીખ નક્કી કરવામાં આવતી હતી. જોકે, અમેરિકાએ ગધામિસ એર પર પ્રેશર વધારતા તેની સાથે સંકળાયેલા લોકો પર વિઝા રિસ્ટ્રિક્શન લાદી દીધા હતા તેમજ લિબિયાને પણ તેમની સામે કાર્યવાહી કરવાની ફરજ પાડતા 03 જૂનથી જ લિબિયાવાળી લાઈન બંધ થઈ ગઈ હતી.
