વિદેશમાં મેડિકલ ભણવા જવું છે? ચીન કે યુક્રેન કરતા રશિયાની ડિમાન્ડ વધી

ભારતમાં મેડિકલ સીટની સંખ્યા ઓછી અને મેડિકલનો અભ્યાસ કરવા ઈચ્છતા સ્ટુડન્ટની સંખ્યા ઘણી વધારે છે. તેના કારણે દર વર્ષે હજારો વિદ્યાર્થીઓ વિદેશમાં મેડિકલ કોલેજમાં એડમિશન લઈને ડોક્ટર બનવાનું સપનું સાકાર કરે છે. ભારતીયના હજારો સ્ટુડન્ટ હાલમાં ચીન, ફિલિપાઈન્સ, રશિયા, યુક્રેન, કઝાખસ્તાન જેવા દેશોમાં મેડિસિન ભણે છે અને હવે તેમની પસંદગી બદલાઈ રહી છે. લેટેસ્ટ ડેટા પ્રમાણે ભારતીય સ્ટુડન્ટની ટોપની પસંદગીમાં ચીન અને યુક્રેન પાછળ રહી ગયા છે જ્યારે તેઓ રશિયાને વધારે પસંદ કરે છે.હાલમાં લગભગ 15 હજારથી વધારે ભારતીય વિદ્યાર્થીઓ રશિયામાં મેડિકલનો અભ્યાસ કરી રહ્યા છે. ઓરેનબર્ગ સ્ટેટ મેડિકલ યુનિવર્સિટીમાં ભારતીય વિદ્યાર્થીઓના પ્રતિનિધિ ડોક્ટર અશોક પટેલે જણાવ્યું કે હાલમાં 15 હજારથી વધારે ભારતીય સ્ટુડન્ટ મેડિકલનો અભ્યાસ કરે છે. મોટા ભાગના ભારતીય વિદ્યાર્થીઓ અગાઉ ચીન અથવા યુક્રેનમાં ભણતા હતા. પરંતુ બદલાયેલી પરિસ્થિતિમાં તેઓ રશિયા આવી રહ્યા છે. વિઝાની પ્રક્રિયા એકદમ સરળ કરવામાં આવી છે. હવે ઈંગ્લિશ મિડિયમમાં મેડિસિન ભણાવવામાં આવે છે. પાસ આઉટ રેશિયો પણ ઘણો વધ્યો છે. અહીં કોઈ રેસિઝમ - વંશવાદની સમસ્યા નથી. તેમણે ભારતીય કલ્ચર સાથે અનુકુલન સાધ્યું છે. તેઓ બોલિવૂડને પણ જાણે છે અને ભારતીયોને અહીં ઘર જેવું લાગે છે. આ ઉપરાંત રશિયામાં સુરક્ષાને લગતી પણ કોઈ ચિંતા નથી.

અગાઉ રશિયાના એમ્બેસેડર ડેનિસ એલિપોવે એવો આશાવાદ વ્યક્ત કર્યો હતો કે એકેડેમિક ડિગ્રીને પરસ્પર માન્યતા આપવા માટે ભારત સરકાર સાથે કોઈ સહયોગ કરી શકાશે. તેનું કારણ છે કે ભારતમાંથી વધુને વધુ વિદ્યાર્થીઓ રશિયામાંથી પ્રોફેશનલ ડિગ્રી મેળવી રહ્યા છે. તેથી ડોક્ટરોની ડિગ્રીને માન્યતા આપવામાં આવે તે તેમને બીજા કોઈ કોર્સ કરવાની જરૂર નહીં પડે અને સીધા ભારતમાં પ્રેક્ટિસ કરી શકશે.

રશિયા અને ભારત વચ્ચે વેપારમાં અસંતુલન છે ત્યારે તેને દૂર કરવા માટે પ્રયાસ ચાલુ છે. રશિયા હાલમાં યુક્રેન સાથે યુદ્ધ લડી રહ્યું છે ત્યારે ભારતે બહુ સંતુલિત થઈને ચાલવું પડે છે. આવતીકાલે વડાપ્રધાન નરેન્દ્ર મોદી બે દિવસ માટે રશિયાની મુલાકાત લેશે જ્યાં તેઓ પ્રેસિડન્ટ વ્લાદિમીર પુટિનને મળશે.

ભારતીયો રશિયા જઈને એમબીબીએસનો અભ્યાસ કરવાનું એટલા માટે પણ પસંદ કરે છે કારણ કે ત્યાં કોલેજની ફી ઘણી ઓછી હોય છે. આ ઉપરાંત વેસ્ટર્ન દેશોની ફી કરતા રશિયામાં મેડિકલ એજ્યુકેશન ઘણું સસ્તું પડે છે. રશિયામાં એમબીબીએસના અભ્યાસની વાર્ષિક ફી ત્રણ લાખથી સાડા ચાર લાખ રૂપિયા જેટલી આવે છે. તેમાં હોસ્ટેલ ફી અને બીજા બધા ખર્ચ ઉમેરવામાં આવે તો એક વર્ષમાં કુલ ખર્ચ લગભગ 10 લાખ રૂપિયાથી લઈને 15 લાખ રૂપિયા સુધી આવે છે.
સામાન્ય રીતે મે મહિનાથી લઈને સપ્ટેમ્બર મહિના દરમિયાન રશિયન મેડિકલ કોલેજમાં એડમિશન માટે વિન્ડો ખૂલે છે. તેમાં એડમિશન માટે કોઈ ચોક્કસ એક્ઝામ આપવાની જરૂર રહેતી નથી. રશિયન મેડિકલ યુનિવર્સિટીઓ ધોરણ 12ના માર્ક્સને ગણતરીમાં લે છે. NEET ના ક્વોલિફિકેશનને એલિજિબિલિટી માટે જરૂરી માનવામાં આવે છે, પરંતુ એડમિશન માટે તે પૂર્વ શરત નથી. ધોરણ 12માં ફિજિક્સ, કેમિસ્ટ્રી અને બાયોલોજી સાથે ઓછામાં ઓછા 50 ટકા ગુણ હોય, નીટમાં ક્વોલિફાઈંગ સ્કોર મેળવ્યો હોય અને 17થી 25 વર્ષ સુધીની ઉંમર હોય તો રશિયન મેડિકલ કોલેજમાં એડમિશન લઈ શકાય છે.