કેનેડાએ કેટલા ઈન્ડિયન્સને PR આપ્યા, ટોપ-10 દેશો કયા-કયા છે?

ભારતીયોમાં તો કેનેડાના પીઆર એટલે કે પરમેનેન્ટ રેસિડેન્ટ સ્ટેટસ મેળવવાનું વળગણ છે જ પરંતુ જે લોકો પોતાનો દેશ છોડીને અન્ય દેશમાં રહેવા જવા ઈચ્છે છે તેમાંના મોટા ભાગના લોકોમાં કેનેડા એક હોટ ફેવરિટ દેશ છે. તેનું એક મોટું કારણ એ છે કે કેનેડામાં અન્ય મોટા દેશોની તુલનામાં ઝડપથી પીઆર મળી જાય છે. કેનેડા વિશ્વભરના માઈગ્રન્ટ્સને પોતાના ત્યાં આવકારતું રહ્યું છે. 2024માં કેનેડા 4,85,000 લોકોને પીઆર આપવાનો લક્ષ્યાંક ધરાવે છે. તાજેતરના ઉપલબ્ધ આંકડા દર્શાવે છે કે કેનેડાએ આ વર્ષે મે મહિના સુધીમાં 2,10,865 લોકોને પીઆર આપ્યા છે. તેમાં કોઈ જ શંકા નથી કે આમાં ભારતીયોની સંખ્યા સૌથી વધુ છે. આપણે જોઈએ કે આ વર્ષે મે મહિના સુધીમાં કેનેડાના પીઆર મેળવનારા ટોચના 10 દેશો કયા છે.કેનેડાના પીઆર મેળનાવાર લોકોમાં ભારતીયોની સંખ્યા સૌથી વધુ છે. આ વર્ષે મે મહિના સુધીમાં 64,730 ભારતીયોએ કેનેડાના પીઆર મેળવ્યા છે. કેનેડામાં નવા PR મેળવનારાઓ માટે ભારત અગ્રણી સ્ત્રોત દેશ છે. ઘણા ભારતીય ઈમિગ્રન્ટ્સ એક્સપ્રેસ એન્ટ્રી સિસ્ટમ, પ્રોવિન્શિયલ નોમિની પ્રોગ્રામ્સ (PNPs) અને ફેમિલી સ્પોન્સરશિપ દ્વારા આવે છે. કેનેડામાં ભારતીય ડાયસ્પોરાની મજબૂત હાજરી, એજ્યુકેશનલ અને પ્રોફેશનલ તકો સાથે તેને સ્કિલ્ડ ઈમિગ્રન્ટ્સ અને ઈન્ટરનેશનલ સ્ટુડન્ટ્સ માટે આકર્ષક સ્થળ બનાવે છે. જોકે, ગયા વર્ષની સરખામણી કરવામાં આવે તો કેનેડા આવતા ભારતીય ઈમિગ્રન્ટ્સની સંખ્યામાં નોંધપાત્ર ઘટાડો જોવા મળી રહ્યો છે, જેનું મુખ્ય કારણ બે દેશોના બગડેલા રાજદ્વારી સંબંધો અને કેનેડા દ્વારા ઈમિગ્રન્ટ્સ પર મૂકવામાં આવેલો ટેમ્પરરી કાપ પણ જવાબદાર છે. 2024ના પ્રથમ ક્વાર્ટરમાં કેનેડાએ 37,915 ભારતીયોને પીઆર આપ્યા છે જે 2023ના પ્રથમ ક્વાર્ટર કરતાં 8175 ઓછા છે. ગત વર્ષે પ્રથમ ક્વાર્ટરમાં કેનેડાએ 46,090 ભારતીયોને પીઆર આપ્યા હતા.

ભારત બાદ ફિલિપાઈન્સનો નંબર આવે છે જેના 14,360 નાગરિકોને કેનેડાએ પીઆર આપ્યા હતા. કેનેડિયન ઈમિગ્રન્ટ્સ માટે મૂળ દેશોમાં ફિલિપાઈન્સ છેલ્લા ઘણા સમયથી ટોપના દેશોમાં આવે છે. ફિલિપાઈન્સના નાગરિકો ઘણીવાર ફેમિલી સ્પોન્સરશિપ, કેરગીવર પ્રોગ્રામ્સ અને સ્કિલ્ડ વર્કર્સ તરીકે કેનેડા આવે છે. કેનેડામાં ફિલિપાઈન્સના લોકો મોટા ભાગે ઓન્ટારિયો, અલ્બર્ટા અને બ્રિટિશ કોલંબિયા પ્રોવિન્સમાં રહે છે જેના કારણે નવા આવનારાઓને મજબૂત નેટવર્ક મળી રહે છે. આ યાદીમાં ત્રીજા ક્રમે ચીન આવે છે જેના 13,100 નાગરિકોને કેનેડાએ પીઆર આપ્યા છે. કેનેડાના નવા પરમેનન્ટ રેડિડન્ટ્સમાં ચીનના ઈમિગ્રન્ટ્સનો હિસ્સો નોંધપાત્ર છે અને મોટાભાગના લોકો કેનેડા આવવા માટે ફેમિલી સ્પોન્સરશિપ અને ઈકોનોમિક ઈમિગ્રેશન પાથવે પર આધાર રાખે છે. કેનેડાએ 2024ના પ્રથમ ક્વાર્ટરના અંતે 8145 નવા ચાઈનીઝ ઈમિગ્રન્ટ્સને અને 2024ના એપ્રિલ અને મે મહિનામાં કુલ 4955 ઈમિગ્રન્ટ્સને આવકાર્યા હતા.

ટોપ-10 દેશોની યાદીમાં નાઈજીરિયા ચોથા ક્રમે છે જેના 8625 નાગરિકોને કેનેડાએ પીઆર આપ્યા છે. 2024ના પ્રથમ ક્વાર્ટરમાં કેનેડાએ નાઈજીરિયાના 4695 નાગરિકોને પીઆર આપ્યા હતા જ્યારે એપ્રિલ અને મે મહિનામાં 3930 લોકોને પીઆર આપ્યા હતા. પાંચમાં ક્રમે અફઘાનિસ્તાનનો નંબર આવે છે જેના 7055 નાગરિકોને કેનેડાએ પીઆર આપ્યા છે. આતંકવાદથી ગ્રસ્ત આ દેશના લોકો મોટા ભાગે હ્યુમેનિટેરિયન અને રેફ્યુજી પ્રોગ્રામ્સ અંતર્ગત કેનેડા આવે છે. તાજેતરના વર્ષોમાં કેનેડાની સરકાર દ્વારા તાલિબાન શાસનમાં સજાના ડરનો સામનો કરી રહેલા અફઘાનિસ્તાની રેફ્યુજીને પ્રાથમિકતા આપવામાં આવી રહી છે. જોકે, કેટલાક અફઘાન નાગરિકો ફેમિલી સ્પોન્સરશિપ અને ઈકોનોમિક ઈમિગ્રેશન સ્ટ્રીમ્સ મારફતે પણ કેનેડા આવે છે.

આફ્રિકાના ગરીબ દેશ કેમેરૂનના 6785 નાગરિકોએ 2024ના મે મહિના સુધીમાં કેનેડાના પીઆર મેળવ્યા છે. કેમેરૂનના નાગરિકો વિવિધ ઈમિગ્રેશન પ્રોગ્રામ્સનો ઉપયોગ કરીને કેનેડા આવે છે જેમાં એક્સપ્રેસ એન્ટ્રી અને પ્રોવિન્સિયલ નોમિની પ્રોગ્રામ એટલે કે PNP મુખ્ય છે. ઘણા લોકો ફેમિલી સ્પોન્સરશિપ અને ઈન્ટરનેશનલ સ્ટુડન્ટ્સ તરીકે આવીને બાદમાં કેનેડાના પીઆર મેળવે છે. સાતમાં ક્રમે રહેલા ઈરાનના 5860 નાગરિકોએ આ સમયગાળા દરમિયાન કેનેડાના પીઆર મેળવ્યા છે. ઈરાની નાગરિકો મોટે ભાગે એક્સપ્રેસ એન્ટ્રી સિસ્ટમ અને પ્રોવિન્સિયલ નોમિની પ્રોગ્રામ મારફતે અહીં આવે છે. 2024ના પ્રથમ ક્વાર્ટરમાં 3570 ઈરાની લોકોએ કેનેડાના પીઆર મેળવ્યા છે. કેનેડાના પીઆર મેળવવામાં પાકિસ્તાનીઓની સંખ્યા પણ નોંધપાત્ર છે. આ વર્ષે મે મહિના સુધીમાં 4485 પાકિસ્તાનીઓને કેનેડાના પીઆર મળ્યા છે. ભારતીયોની જેમ પાકિસ્તાનીઓનું પણ અહીં મજબૂત કોમ્યુનિટી નેટવર્ક છે.

કેનેડાના પાડોશી અને વિશ્વના સૌથી શક્તિશાળી દેશ ગણાતા અમેરિકાના 4180 નાગરિકોએ પણ કેનેડાના પીઆર મેળવ્યા હતા. છેલ્લા કેટલાક વર્ષોમાં અંદાજીત ત્રણ મિલિયન અમેરિકનો પોતાનો દેશ છોડીને કેનેડા આવ્યા છે. કેનેડા પણ અમેરિકાના ટેક વર્કર્સને ટાર્ગેટ બનાવે છે અને પોતાના ત્યાં આવવા માટે આકર્ષે છે. 2023માં 10,640 અમેરિકન કેનેડા આવ્યા હતા જ્યારે 2022માં આ આંકડો 10,415 હતો. જ્યારે 10માં નંબરે યુરોપનો સુંદર અને મજબૂત ઈકોનોમી ધરાવતો દેશ ફ્રાન્સ આવે છે. કેનેડા સાથે ફ્રાન્સના ઈમિગ્રેશન સંબંધો ઘણા મજબૂત છે. કેનેડાના ક્યુબેક સિટી અને મોન્ટ્રીયલ જેવા મોટા શહેરોમાં ઐતિહાસિક રીતે ફ્રેન્ચનો પ્રભાવ જોવા મળે છે. ભાષાકીય રીતે પણ, ફ્રાન્સના લોકો માટે કેનેડા એ ખૂબ જ આકર્ષક વિકલ્પ છે. 2021માં 1,02,000 ઈમિગ્રન્ટ્સે ક્યુબેકની બહાર કેનેડામાં બોલાતી તેમની પ્રથમ સત્તાવાર ભાષા તરીકે ફ્રેન્ચ ગણી હતી. તેમાંના મોટા ભાગના ઓન્ટારિયો (66,000), આલ્બર્ટા (13,000) અને બ્રિટિશ કોલંબિયા (12,000)માં રહે છે.