I Puan in Hmun Te Chu Zauh Rawh (Pentikos Thuchah 2012)
I Puan in Hmun Te Chu Zauh Rawh (Pentikos Thuchah 2012)
PCI General Assembly Pentikos 2012 Thuchah I PUAN IN HMUN TE CHU ZAUH RAWH (Isaia 54:2)
A. Thuhma Deuteronomy atanga Isaia thleng hi Israel-te thlamuanna thu bu tiin an sawi bawk thin. Kan chang thlan hi inzar pharh zau tura Israel-te hriattirna a ni. Saltan hun a tawp dawn a, din thar an ni dawn a ni. Heta tang hian tunlai kohhranten puan in zauh leh ringtu tihchak tharna kan mamawhna te kan thlir dawn a ni. 1. Puan in zauh Heta puan in a tih hi Israel-te leh an chenna hmun te a ni a. Puan in zauh tura a tih hian Gentail-te leng ve tura inhawng zau tura a tihna a ni a. Israel-te hian Pathian hnam thlan an nih an inhria a, hnam dang tan engmah awm ve lova ngaihna an nei nghet a, Pathian thahnemngaihna lam hawiin hma an la lo a ni. Tichuan Isaia hmangin Pathianin an mawhphurhna a rawn hriattir a, an la pun nasat dawn avangin inpharh zau turin a rawn hriattir a ni. Thuthlung Tharah hian Kohhranho chu rilru zim leh thlir tawi ni lo turin min duh a, inzar pharh turin min duh a ni. Jerusalem-a tawm khawm ringawt lo va, Judai ram leh Samari ramah te inpharh zau va, khawvel tawp thlenga a thuhretu ni turin a duh a. He thupek hi Isua zirtirte khan an tha tlin tawkin an rawn thawk a, an zin nasa a, Juda hnam hnenah hril hmasa mahse Juda-hovin Chanchin Tha an hnawl tak avang khan Jentailte hnenah an kal ta zel a, puan in an zauh nasa hle a ni. Hetiang hian Paula leh zirtir dangte khan Chanchin Tha puan in chu an lo zauh a ni. 2. Inren suh Puan in zauh tura insenso hian lawmman a nei a. Chu chu hriattirin Pathianin Israel-te chu inren lova insengso turin a hrilh a ni. Ringtu hmasate khan thilpek nun an lantir nasa a. Paula pawh kha mihring lam tehna atanga a thil hlu zawng zawng kalsanin Pathian tan a inhmang ral ta vek a ni. Chanchin Tha atan hian kohhran leh mimal tin hi eng angin nge kan insenso ve le? 3. Khenna tihngheh Puan in chu a zau va a len poh leh a hruai leh a thlunna khente chu an nghah lehzual a ngai a. Ramthar lama zar kan zauh mek lai hian a pawt nghettu ram chhunga ringtu kohhranho hi tihngheh deuh deuh kan mamawh a ni. B. Kohhran hna pawimawh ber puan in zauh Isua hna ngaihpawimawh a nih hriain Welsh Presbyterian Kohhran chuan kum za chuang zet liamtaah khan India Hmarchhak thlengin Chanchin Tha puan in an rawn zauh chho va; Khasi Hills leh Lushai Hills-ahte kohhran a lo ding ta a ni. Mizo kristian hmasate kha ringtu siam leh kohhran phun hnaah an tangkai hle. Mizoram Synod chuan tunah hian India leh Nepal ram chhungah missionary 2000 chuang a tir chhuak mek a, tuipuiral ram USA, Wales, Taiwan, China, Samoa, American Samoa, Solomon's Islan, Kiribati leh Cambodiaahte hian missionary 50 zet a tir chhuak mek bawk a ni. Isuan a zirtirte a kalsan dawn khan khawvel zawng zawnga Chanchin Tha hi lo hril turin a chah a. Chu hna thawk tura ringtute pui turin Pentecost niah khan Thlarau Thianghlim a lo thleng ta a. Tichuan kristian-te chu an chhuak darh a, kohhran an phun a, ringtu an siam zel a. 1) Chanchin Tha hril kan dah lian em? India Hmarchhakah hian a bik takin Presbyterian Kohhran hian Chanchin Tha hril hi a ngaipawimawh hle a. PCI General Assembly hnathawh pum pui kan thlir chuan Chanchin Tha hril hi a laipuiah a hmang tih kan hmu ang a. Kan inrelbawlna leh kan sum leh pai hmanna tur ruahman tam ber pawh he lam kawng hi a ni. Chutih lai chuan a taka thawhna kawngah kan thahnem tawk lo niin a hmuh theih a. Tuna PCI pum puia kan chet velnate hi ngun takin en ila, Chanchin Tha hril hna kan dah lian em le? PCI hnuaia Synod-ho zingah hian he lam kawngah hi chuan Mizoram Synod hi entawn tur an niin a lang. Anni anga missionary tir chhuak tam an awm lo va, India ram leh a pawn lamahte an tir chhuak nasa hle a ni. Heti chung hian Mizoram Synod meuh pawh hian a budget pum pui atanga za zela 30 chauh Chanchin Tha hrilna atan hian a hmang a ni. Khawtlang nun siamthatna lamah te nasa takin thawk mah ila, kan Lalpa chuan Chanchin Tha hril hna hi a ngai pawimawh ber a ni tih i hre thar leh ang u. 2) Rinnaa kal Chanchin Tha hril tura thupek ropui tak hlen chhuak tur hian rinnaa kal kan mamawh a ni. Mosia hnenah khan a rah chin apiang a ram ni tura tiam a ni a. Kohhran tam ber chuan kan kuta sum kan neihsa enin mission project kan siam thin niin a lang. Chanchin Tha hril hna tulna a zual zel a, Krista mamawhtu an pun zel lai hian kan mite zingah pawh hian Kohhran ke pen ngamna chin duhkhawp lo an pung mek niin a lang a, a chhan chu ParaChurch organization lamah kan che nasa tual tual tlat a ni. Tunah chuan Synod tin hian rinnain kan Lalpa thahnemngaihna hlen chhuahpui tura ke pen ngam kan mamawh a ni. 3) Thlarau Thianghlima harhna hi Chanchin Tha hril nan a ni Tho leh Isua khan a zirtirte hnenah Thlarau Thianghlim a lo thlen hunah Jerusalem-ah te, Judai ram leh Samari ram zawng zawngah a thuhretute an la nih tur thu a hrilh a (TT 1:8). India rama Kristian awm tan tirh atangin Presbyterian kohhran hian Thlarau Thianghlim tihharhna kan chang nasa em em reng a. He harhna avang hian Kristianna pawh a darh chak hle a ni. Chutiang harhna chu Meghalaya leh Mizoram te hi a chang nasa te kan ni. Pathianin Presbyterian Kohhran hi India rama Chanchin Tha hriltu ni turin a buatsaih a, chumi avang chuan harhna pawh a chantir thin a ni. Thlarau Thianghlima harhna kan chan hi kan Lalpa thupek Chanchin Tha hril hna kan hlen theihna tura Pathianin min buatsaihna a ni tih i hre thar leh ang u. C. TLANGKAWMNA Pathianin a Kohhran hi khawvelah mite tana eng leh malsawmna ni turin a dah a. Chuvangin a tih tur pawimawh ber chu khawvel hnena Isua Krista Chanchin hriattir a ni. Chu hna chu kan ngaihpawimawh ber a nih phawt chuan Pathianin min tihchak zual zel a duh ngei ang. Chu hna atan chuan Thlarau Thianghlim pekin kan awm thin a. Chu chuan min tih chak a, puan in zauh tura ke kan pen theihna tura min buatsaih a tum a ni. Chutiang ti tur leh Isua zuitu rinawm tak ni turin Pathianin min pui theuh rawh se. Amen.
Mail us at : [email protected] [email protected] S yn od I n fo rm ati o n & P u b l ici ty Ph on e - 2 31 46 48
Synfo