CHHIATNI |HATNI KAIHHRUAINA

Synod-in kum 1993-a Chhiatni |hatni Kaihhruaina a siam chu hun leh nunphung danglam zel avangin en \hat ngaia hriat a ni a. Hma lo la tura ruat, Synod Social Front kaihhruainain Dt.24.11.2006 khan Synod Committee Room-ah Kohhran Pawl hrang hrangte leh Tlawmngai Pawl hrang hrang aiawhte kal khawmin an lo sawiho tawh a. Central YMAin ram pum huapa inkaihhruaina a lo neih te pawh en tel niin, kalkhawmte hian Synod-in kaihhruaina a lo neih tawh sa chu \ha an ti a, siam\hat \ul tih lai an neihte an pharh pawh chu \ha an tihpui bawk a. He inrawnkhawmna a\anga Social Front-in siam\hat ngai nia a hriatte rawtna a siam chu SEC-ah a thlen a, SEC chuan lo thlirin, heng rawtnate beh chhan hian Chhiatni/|hatni kaihhruaina hi Social Front Committee-in lo en \ha leh sela, SEC-ah rawn thlen leh rawh se tiin a rel leh a (SEC 214:55). Hemi thu bawhzui hian Social Front Committee chuan a hnuaia mi ang hian Kaihhruaina thar a duang ta a ni. Chhiatni |hatni kan neihte hi sakhuana nen a inzawm vek \hin avangin a sawngbawl danah ringtute tih atana mawi ngaihtuah a \ul hle a ni. Neinung deuhte pawhin insum thiam leh harsa deuhte pawhin phak tawk hre chunga tih kan zir deuh deuh a \ul hle. A. CHHIATNI 1. Mitthi dar vuak : Mitthi dar vuak hi kan kohhran mi thi inhriattirna a ni a, Kohhran Committee member tu emaw tal hriatpuinaa vuak tur a ni. Second 20 vel dan zelah vawi 1 vuain, vawi 15 vuak tur. Presbyterian Kohhran mi, mikhual thi pawh a mikhualna hmuna vui tur a nih chuan a vuina hmun kohhran dar vuak tur a ni. Khuala thi chu a ruang thlen hnuah chauh vuak tur. Mahni intihlum leh hlamzuihah chuan mitthi dar vuak loh tur a ni. 2. Lumen leh thlan laih : Mitthi ruang lumen leh thlan laih hi \halai leh pavalaite mawhphurhnaa ngaih a ni deuh ber a. Kohhrana rawngbawltute pawhin thlahthlam hauh loh tur a ni. Vuina tih lohvah chuan kohhran mal intih thuneih viau aiin Tlawmngai Pawl kuta dah thiam hi khawtlang inpumkhatna atan a \ha zawk ang. 3. Mitthi puana tuam : Mitthi puana tuam hi chhungkhat laina leh \henrual \ha hnai bikte tih tura ngaih a ni. 4. Pangpar dah : Pangpar tak emaw, siam chawp pangpar emaw inpek hi lusun chhungte tan thil lawmawm tak leh hriat reng zinga mi chu a ni a. Amaherawhchu, pangpar dah aia tangkaa ral \hat zawkna chhungkua an awm thei a ni tih hriat a \ha. 5. Mitthi vui hun : Lumen ngai chu chawhnu dar khat (1:00 p.m) aia tlai lovah vui ni se, lumen ngai lo chu chawhnu dar thum (3:00 p.m) aia tlai lovah vui ni se. Khuala thi leh engemaw vanga hun bithliah tihdanglam a \ul chuan Kohhran hruaitute leh khawtlang hruaitute inbe rawna tih ni se.
www.mizoramsynod.org

6. Thlalak : Mitthi kuang thla lakpui nan hian hun rei lo thei ang ber hman a \hat avang leh senso a tlem zawk theih nan a \ul tak chauh thlalak ni se. Thla lak dan tur fel taka ruahman lawk a \ha. 7. Mitthi vui inkhawm : Mitthi vui inkhawm hi kohhran inkhawm a nih avangin mumal taka programme siam tur a ni. Thlanah chuan a rei lo thei hman ang ber hun hman ni se. Minister leh active Upa thite chu ina thlahna hun hman hnuah Biak Inah vui tur a ni. Mitthi vuina hi naupangte pun khawmna tura ngaih a ni lo. 8. Mahni intihlum : Kan kohhran member tawh phawt chu mahni intihlum pawh ni se kohhranin vui tur a ni. 9. Ralna : Mahni remchan dan azirin mitthi vui zawh kher nghak lova eng hunah pawh ralna hi pek a thiang a ni. Inkhawm \hulha Pathiannia ral tura khek kher loh a \ha. 10. Khawhar lenpui : Khawhar lenpui chhan ber chu lusun chhungte hnem leh thlamuan a nih avangin kohhran kalhmang leh thurin kalh zawnga thusawi chu remtih loh tur a ni. Chuvangin khawhar an awm hlimchhawng ni hnih ni thum chhung chu kohhranin a ruat rawngbawltuin chhun lam lengkhawm chu kaihruai \hin se a \ha. 11. Khawhar riahpui : Khawhar riahpuiin a tum ber chu lusunte thlamuan leh a \ul anga \anpui hi a ni a. Tunlai chuan zan hnih zan thum an inriahpui \hin. Khawhar chhungte tih hautak loh tur a nih avangin inriakte tan hian chawhlui buatsaih loh a \ha. 12. Thlan \hut : Khual khuaa chhungkhat laina bul tak an thih a, chumi hmuna kal ve theih loh vang emaw, chu thih thu chu a hnua hriat ve chauh a nih hian thlan \hut \hin a ni a. Hetiang ni si lova thlan \hut hi a mawi lo hle a ni. Thlan \hut hun chu Pathianni ni lo thei se a \ha. 13. Thih champhaphak : Mitthi ngaihna chawk tho zawnga thih champhaphak hman hi tih loh a \ha. Mi dang pun khawm leh sum seng zawnga hman phei hi chu ringtu tih dan tur a ni lo vang. Mitthi hnena lehkha thawn phei hi chu Kristianna nen a inhmeh lo a ni. 14. Lungphun : Hriatrengna lungphun hi kan hnam tih dan \hin a ni a, chhunzawm zel pawh a \ha ang e. Amaherawhchu, \hen leh rual khawm zawnga hun hmang kher lo pawhin chhungkuaa chinfel mai theih a ni tih hriat tur a ni. A hautak lo zawnga tih a \ha hle. 15. Thlan cheimawi leh thlan tlawh : Thlan tihfai \hin hi thil \ha leh \ul tak a ni a, amaherawhchu lusunna tithar zawnga thlan tlawha cheimawi \hin erawh chu ringtu tih atan a mawi lo a ni.
www.mizoramsynod.org

16. Hlamzuih chungchang : Ni 90 tling lova thi chu hlamzuih a ni a, chutiang chu kohhran leh khawtlangin phek buaipui tura ngaih a ni lo va, amaherawhchu, Pastor emaw, Upa emawin thlamuanna thuchah sawia \awng\aiin mitthi thlahna hun hman tur a ni a. Chumi zawhah thlanmualah emaw duhna hmun remchangah emaw phum tur a ni. 17. Puithuna atthlak : Chhiatni chungchanga chin dan hlui, puithuna atthlak chi hrang hrang, kristianna nena inhmeh tawh lo ang chi - khuala thi, a khaw lama thlan lo laih lawk tawh vanga a ruang thlen ni nia phum ngei ngei ngaia ngaih tlatna ang chi te, mitthi thuam thil chhawm zui tlak si phum tel ngei ngei tura ngaihna te, ruang awm chhunga in chhunga thil intar, dah bo ni si lo (calendar, darthlalang etc.) lehlin vek tura ngaihna etc. te hi tih loh atan a \ha. 18. Kohhran Inkhawm leh Thihna : A theih hram chuan mitthi awm avangin Kohhran inkhawm \hulh loh a \ha. Tin, kohhran inkhawm chhungin khawhar inah zai loh theih ni se. B. |HATNI 1. Inneih ni ruat: Inneih ni leh hun bi thliah chu inneihtirtu tur leh kohhran hruaitute rawn hmasain innei turten ruat tur a ni. 2. Sawmna: Inneih ngai pawimawh leh hre ve ngei tura hriatte chauh sawm ni sela, innei chhungten chutiang bak leh dawl zawh tur aia tam sawm vak hi a \ha lo a ni. Inneite awmna Kohhranah chuan Biak Ina puan hi a \ha mai awm e. 3. Man hlan : Man inhlan hi Mizo dana inneihna puithu lai tak a nih avangin fiamthu leh palaite chhaih buai chin hi a inhmeh lo a ni. Urhsun tak leh hlimawm taka man inhlan hun hi hman \hin tur a ni. 4. Man\ang sem: Man ineitir dan pangngai anga a eitu tur dik takte bak man eitu phuahchawpa man\ang eitu tih tam vak hi Mizo kalphung a ni lova, chin loh atan a \ha. Man eitute laka beisei leh phut let neih hi a mawi lo hle bawk a ni. 5. Incheina: Pathian leh Kohhranho hmuha mawi tawk, inelna leh hleihluakna kai lo leh mahni dinhmun nena inhmeh tawka inchei thiam a \ha. Mo leh a \hian incheina thawmhnaw man hi mipa lam tumtir lovin hmeichhe lamin intum ni mai se. Tin, Biak Ina inneih hriatpuitu leh lawmpuitute pawh mi baka inchei loh a \ha. 6. Inneih Inkhawm Programme: Inneih inkhawm Programme hi inneihtirtu leh innei turte inbe rawna siam tur a ni. Inneih inkhawm hi a rei lo thei zawnga ruahman thiam a \ha.

www.mizoramsynod.org

7. Pangpar khawi: Kohhranin Biak Ina pangpar a khawina \hin hmun bakah chuan innei chhungten pangpar khawi loh a \ha. Biak Ina hnutchhiah an phal theih chin bak chu pangpar khawi loh ni se. 8. |hian : Inneite hian \hian pakhat ve ve an nei tur a ni a, hriatpuitu pawimawh tak an nih avangin kan Kohhran dan chhunga mi emaw an sakramen leh inneihna kan pawm theih kohhrana dan zawhkim (Full member) emaw an ni tur a ni. 9. Zungbun: Inneih zungbun hi mipain hmeichhe hnena a pek leh buntir \hin a ni a, hmeichhiain mipa hnena pek ve a ngai lo. Zungbun tel lo pawhin a inneih theih tho tih hriat a \ha. 10. Thlalak: Inneih inkhawm urhsunna tibo thei khawpa thla lak hi a \ha lo va; chuvangin inneihtirtu berawn hmasaa tih ni se. Pawnah pawh hun khawh ral tam lovin a tlem thei ang leh innei chhungte tana phurrit ni lo turin thla lak dan tur fel taka ruahman sa a \ha a ni. 11. |hian man: |hian man hi awm ngei tura ngaih a ni lo nain pek a ngaih chuan hmeichhe lamin man\ang aia tam lo pek tur a ni. 12. Lawichal: Lawichal tih tur chu him taka Mo a lawi theihna tura venhim a ni. Tunah chuan mo hi ven a ngaih tawh loh avangin Lawichal awm hi a \ul tawh lem lo. Neih a nih pawhin Lawichal man atan Man\ang aia tam phut tur a ni lo. Tin, Kohhran dana inneih hnuah Lawichal hian lawi a kham thei lo tih hriat tur a ni. 13. Inneih lawm: Inah emaw, Hall-ah emaw inneih lawmna buatsaih a nihin Kristian-te tih dan tur ^wm renga zahawm leh mawi taka tih ni se. Ei leh in pawh a hautak lo zawnga tih hi kohhran duh dan a ni. 14. Thuam chhawm: Mutbu leh hmeichhe thuam pangngai bak chhawm tumna lian ta lutuk hi a \ha lo a ni. Chhungkaw dinhmun nena inphu tawk hriatthiam a \ha. Mi \henkhatin chintawk an neih loh avangin hemi kawngah hian fimkhur a \ul hle a ni. 15. Puithuna atthlak: Inneih hun atana ni serh leh thla serh bik neih te, ni \ha bik leh \ha lo bik neih te hi Kristanna nen chuan a inrem lo a ni.

www.mizoramsynod.org