Bible Lo Piandan.
Bible Lo Piandan.
Bible tih tawngkam lo chhuah dan chu hetiang hian a ni . Sidon khaw hmar lamah khuan khaw
pakhat ' Gebel' a awm a , chu khua chu phairuang lehkhapuan siam chhuahna hmun a nih avangin
Grik ho chuan Biblos tiin an kova, chu chu lehkhabu tihna a ni . Lehkhabu te reuh tê chu biblion an ti
a . Biblion chu pakhat aia tam an sawi dawn chuan biblia an ti . Chu chu Latin tawngin an la chhawng
a , biblia an ti ve a . Chuta tang chuan French tawngin La Bible an ti ve leh a . French tawng atang
chuan English tawngin Bible tih hi a lo piang ve leh ta a ni . Tichuan Kristian sakhaw lehkhabu
hmingah Bible tih chu hman a lo ni ta a . Mizoten ' Pathian lehkhabu Thianghlim ' tiin a bu chhung
thu hrilhfiahna tha tak ni pah fawmin kan lo phuah a . A hming hi a mawiin a inhmeh hle a ni.
Hmanlaiin sakhuana lam kawk lehkhabu chi hrang hrang a awm nual a . Bible atana an pawm duh
chin pawh a inang lo va , vawiin thleng pawh hian Bible - a kan pawm chin hi a la inthuhmun lo nual a
ni . Bible chu Pathian inpuanna ziahna bu a ni a . Pathianin mihring, a duh taka a siamte chu sualna
khura tlu bo tur a chhanchhuah leh dan ziakna bu a nih avangin Chhandamna Chanchin Bu tiin kan
sawi thin . Bible ziah hun chhung hi kum 1600 vel , Isua pian hma kum 1500 vel leh a pian hnu kum
100 vel inkara ziah zawh a ni a , chutah chuan chhuan 60 vel an tla hman a ni. A ziaktute hi mi 40 lai
an ni a , hnam hrang hrang , dinhmun inang lo tak tak an ni hlawm a .
Juda te chuan Thuthlung Hlui chauh hi Bible ah an pawm . Hmun thumah an then a :- Thenkhatna
chu Torah an vuah a . Chu chuan Genesis-Deuteronomy thleng a huam . Heng lehkhabu panga te hi
'Pentateuch ' an ti bawk . An thawnthu inhlanchhawn zelah Mosia ziak anga an sawi avangin ' Mosia
Lehkhabu' tiin an sawi bawk thin . Torah hi Pathian lehkhabu atana an pawm fel hun chu BC 400 vel
nia rin a ni . Thenhnihna chu Nebiim (zawlneite ) an ti a . An chhiar dan chuan lehkhabu pariat chiah
a ni . Hetiang hian an chhiar a :- 1 . Josua 2 . Roreltute 3 . 1 & 2 Samuel 4 . 1 & 2 Lalte 5 . Isaia 6 .
Jeremia 7 . Ezekiela 8 . Zawlneite 12 . A hmasa palite khi ' Zawlnei Hmasa ' tiin an vuah a . Keinin
lehkhabu pahniha kan chhiar thenkhat chu anni chuan pakhatah an chhiar thung a ni . A hnuhnung
palite hi ' Zawlnei Hnuhnung' an ti bawk a . Zawlnei tê 12 te hi bu khatah an chhiar thung bawk. He
Nebiim hi BC 200 velah khan Pathian lehkhabuah an pawm tawh niin a lang . Then thumna chu
Kethubim (Thuziakte ) tiin an vuah a . Grik tawnga Thuthlung Hlui an lehlin Septuagint - ah chuan
Hagiographa an ti kher a , chu chu Thuziak Thianghlimte tihna a ni . Judate hian Thuthlung Hlui hi BC
132 vel khan then thumah an then tawh a . Mahse then thumna in a huam chin erawh a la mumal lo
hle . Then thumnaah hian Sam Bu hi a lar deuh bik a ni mai thei. Chuvangin then thumna hming atan
a chang chuan 'Fakna Hlabu' tih hman a ni (Lk . 24 :44 ). Tuna kan neih ang thlapa Thuthlung Hlui bu
huap chin siam fel hun chu AD 90 - 100 vel a ni . Judate sawi dan chuan hetih hun lai hian Jamnia (Tel
- Aviv chhim lam mel 12 ) hmunah Juda mithiam kalkhawmin Pathian lehkhabua pawm tur chin an
siam fel niin an sawi .
Thuthlung Thar lehkhabu 27 hming hmerh faka sawilang hmasabertu chu Alexandria (Egypt) khaw
Bishop Athanasius - a a ni. Ani chuan kum tin , Easter Sunday apiangin a bial chhunga chhiar chhuah
tur lehkha a thawn chhuak thin a . AD 367 a a lehkha thawnah chuan ringtute lehkhabu chhiar tur a
sawi chhuah zingah hming hmerh ngatin tuna Thuthlung Thar lehkhabu 27 hi a tarlang a ni . Chu chu
Carthage khua a kohhran inkhawmpuiin an pawm a ni. Chuta teh fung (Canon of the Bible)
pawimawh pali an hman te chu: - 1 . Pathian thawkkhum a ni tur a ni . 2 . Dan nena inlaichin a ni tur
a ni . 3 . Pathian Chhandamna chanchin ziakna ani tur a ni . 4 . Ezra kha Zawlnei hnuhnung bera an
ngaih avangin Ezra hun hnua zawlnei inti thuziakte chu an pawm duh tawh lo . Ama ' rawhchu heng
Hebrai , Jakoba , 2 Petera, 2 & 3 Johana , Juda leh Thupuan bu chungchangah hian inhnialna nasa tak
a chhuak a ni . Mahse AD 400 vel atang erawh kha chuan tuna lehkhabu 27 hi Kristiante chuan an
pawmtlang tawh niin a lang . Bible bu 66 hi duh duha pawm leh nemngheh mai a ni lo . Kristian
hmasate khan hetiang hian tehna hman deuh bik an nei a :- 1 . A thu zirtir a him em ? 2 . Ringtute ' n
an hmang tangkai tawh thin em ? 3 . Apostol - te kutchhuak a ni em ? 4 . Apostol te kutchhuak a nih
loh pawn a thachhang dawltute kutchhuak a ni em ? tihte hi an hmang ber.
Lehkhabu ziaka lo awm tawh zingah pawh ral leh ta mai lova kohhranin a hman tangkai thin leh a thu
zirtir him chin chu Bible atana pawm turin an thlang a ni . Lehkhabu tam tak, zirtirna him tawk lo a
awm hlawm a . Chungte erawh chu an hnawl thung a ni. Bible kuta ziak hmasatute hian hawrawppui
ngatin , punctuation pawh awm lovin , vowel awm bawk hek lovin an ziak a . A tirah chuan a bung leh
chang pawh a awm lo va, tlai khaw hnu AD 1228 ah Stephen Langton - an a bung a rem fel a , chuta
tanga kum 200 zet AD 1448 ah R. Nathana' n Thuthlung Hlui bute hi a chang a rem fel leh a , 1551 ah
Robert Stephena' n Thuthlung Thar bu hi chang mal te tein a rem fel leh a ni. Bible hi awlsam taka
kan neih mai a ni lova . Mi tam takin nunna an chan phah fo a ni . Hmanlai chuan Rom Pope ho
chauhin Bible hi an chhiar thianga Bible a an chhiar chu mipuite hnenah an hrilh chhawng thin a ni .
Oxford Theologian John Wycliff - an a ruka chhiarin Bible lehlin hna chu a bei ta ngat ngat a . A
thawhrimna a zarah kum 1380 chho vel khan English Bible chu manuscripts in en tur a awm a .
Tichuan, kum 1450 vel khan Bible hmasaber tur chu an print tan a ni . Hetiang hian Bible avanga
nunna chan phah sawi tur tam tak an awm ang . King James I Lal hma kha chuan Bible hi awlsam taka
print theih a ni lo .
Kristiante chuan Bible hi Pathian thawkkhum a nihzia kan pawm vek a . Kan pawm dan inchen lo
erawh hi chu Kristian leh Kristiante inkara inhriat thiam lohna thlentu , pawl hrang din duhna hial
khawpa rilru min puttirtu a nih avangin a pawi hle . 2 Tim . 3 :16 ah Tirhkoh Paul' an Pathian
thawkkhum a nih thu min hrilh a , thawkkhum a nih dan tak hi fiah taka hmuh tur erawh a awm lem
lo . Hei vang hian hetianga pawmdan chi hrang hrang hi a lo chhuah phah ta a ni .
1 . Verbal Inspiration :- He ngaihdan pawmtute chuan Bible - a hawrawp tinte hi Pathian thawkkhum
a ni an ti a . Hetianga thawkkhum ngaih dan hian a ken tel tlat chu Bible- a chang mal tinte hi dik lo
thei lo a ni tih hi a ni a . He ngaihdan pawmtute chuan an ngaihdan nemngheh nan Matthaia 5 :18 hi
an hmang . He ngaihdan ang chuan a ziaktute pawhin thumal hman turah thuneihna an nei lo va.
Hawrawp mal tinte leh coma te , semi - colon leh full - stop etc ... . zawng zawng pawh tihdanglam
thiang lo khawpa Pathian thawkkhum a nihzia a huap thei ang .
3 . Dynamic Inspiration : - He ngaihdan hi Plenary Inspiration nen a inhnaih hle . Pathian chu Thlarau
Thianghlim hmangin tute hnenah emaw a inhriattir a . Anni chuan chu Pathian inhriattirna chu an
hriatthiam angin an ziak chhuak a . Pathian chungchanga thudik , Pathian hnen atanga an dawn ziak
an nih avangin an thuziak pawh chu Pathian thawkkhuma ziak a ni . Pathian thawkkhum tih hi Bible-
a ziaktute kha Pathianin a thawkkhum tihna a ni lo va. An lehkhabu ziah kha lehkhabu dang aia a
danglam theihna turin a thawkkhum tihna a ni bawk hek lo . Mihringin an ziah chhuah kha Pathian
hnen atanga an dawn a ni . Anni chu Pathian hmanrua , Pathian aiawh a thusawitu an ni .
Thawkkhum tih tawngkam (Gr. Theopneustos ) Sap tawnga lehlinna ' inspiration ' hi a dik fuh zan lo
deuh a ni ang . Ngaihdan dik tawk lo a siam thei a . ' Inspiration ' aiin ' Expiration ' Pathian
thawkchhuah (God - breathed - out) hman ni sela , a fuh deuh zawk awm e . Bible hi Pathian thu a ni
a , mihring thu a ni bawk . Pathianin a puang chhuak a , mihringin an lo ziak a . An tihsual loh nan
Pathianin a veng a , mahse a ziaktute mimal nihna leh zia (personality ) erawh chu a sut chhiat sak
lo . Pathian thu an dawn chu an finna leh thiamna hmangin an ziak chhuak a . An finna leh thiamna
hmang mahse Pathian thuchah chu an tidanglam lo . Bible ziakna tawngkam hi mihring tawngkam a
ni a . Juda - te tawngkauchheh hmanga ziak a ni ber bawk a . Mahse Pathian thu erawh a ni reng.
Chuvangin Bible in a sawi chu Pathian sawiah kan pawm thin a ni .
Lehkhabu dang zawng zawng aiin Bible hian chhiartu a ngah ber a , chhiar zin ber niin chhiar ngun
ber a ni bawk . Lehkhabu malah chuan lekhabu dangte nena khaikhin rual lohin chhut chhuah
(published ) tam ber a ni . Kum 1930 - 40 vel khan Bible mamawhna a sang em em mai a , Hy
Pickering chuan heti hian a sawi a ni , "British and Foreign Bible Society chuan Bible mamawh zat
chhu chhuak tur chuan chhun leh zan mar pata thawkin second thum chhungin bu khat zel a chhut
hman a ngai a ni , " a ti. Kum 1932 ah phei kha chuan an han chhu chhuak hnem khawp a , bu 1 ,
330 , 213 , 815 zet an chhu chhuak a ni . Tun hnai a Communist kulhpui a lo chim hnu atang hian
Chanchin Tha hrilh darhna a inhawng zau zel a , Bible mamawhna a sang ta em em a ni . Heng
Communist ramahte hian Bible maktaduai sawmthum thawn luh a ngai ta hem mai. Communist ram
te chuan ramdang atanga lak luhte chu duh khawp lovin anmahni ram ngei Russia ramah te ,
Czechoslovakia ramah te , Bible Society a lo ding thar ta . China ramah phei chuan an Bible chhutna
khawl Amity Printing Press chuan mipui mamawh zat a chhu chhuak daih ngang lo a ni . An din tan
kum 1988 khan bu 4 , 00 , 000 an chhu chhuak a , kum 1989 ah bu 6 , 00 , 000 an chhu chhuak leh a ,
kum 1990 khan bu 12 , 00 , 000 chhutchhuah an tum a ni . Bible dodal ber thintu Communist ram ten
Bible an ngaina in an inchan lo a ni . Tin , Bible hi kum zabi 21 ah phei hi chuan tawng 2303 chuanga
lehlin tawh a ni .
IV . Bible Makna
Pathian lehkhabu Thianghlim , Bible hi khawvela lehkhabu siam tawh zawng zawngah chuan a
danglam bik em em a . Hmun hrang hranga ziak ni si a thu tum erawh pakhat chauh a ni . A thenin
tan in atang an ziak a , a thenin Lal in a tang , a then erawh chuan zin pah ten an ziak a ni . A ziaktute
pawh hi nihna sang leh mifing pui pui ni lovin sangha mantute, chhiahkhawntute , ranrual
enkawltute an ni a . Mahse an lehkha ziahah hian tunlai khawvel mifingte hriat phak loh a inphum ru
teuh a ni. Bible an ziah lai hian Hebrai , Aramaic leh Greek tawngin an ziak a . Mihring finna a
lehkhabu (scientific book) ziah tam tak chu tunlaia hman tlak tawh loh tam tak a awm . Kum 1898
khan ' General Astronomy' tih Young - a ziah chu college hrang hrangah an zir a . Nimahsela finna lo
sang zelin tlem tlemin a dik loh zia a rawn tarlang zel a . Tunah phei chuan Solar System , ni leh a vela
inherte piah lam chhuina atan chuan a hmantlak ta miah lo a ni . Kum za pawh la tling mang lo a mi
mah heti khawpa lehthal a nih chuan Mosia ziak kum 3500 daih ami chu Science thiamna hmanga
ziah nise chuan a bu hmuh tur pawh a awm tawh lovanga, tuman an chhiar duh tawh hek lovang .
Tunlai science thiamna sang ber berte hmang hian Genesis dikzia hriatchhuah a ni mek zel a . Hengte
hian Bible hi mihring finna maia ziak a ni lo tih a tilang chiang hle a ni. Heng bakah hian mithiam ten
Bible Code ah thil mak tak tak an hmuchhuak zel a ni . Kum 1994 khan Juda mithiam rualhote ' n a
inkawpa thumal inphum lo awm tawhte inlaichin dan chungchanga hmuhchhuah an neih thu an
chhuah a . Chungte chu Mosian Torah bu a ziak hnu daiha khawvel hun kal zela thil awmte an ni . An
enchhinnaah chuan kum 1900 hma kum sang khat chhunga Rabbi langsar leh Juda mifing 34 an
thlang chhuak a . An thlan dan pawh chhan tha em em nei chuang lovin , Juda mi ropuite hming
ziahna bu Encyclopedia of Great Men in Israel tih bua chuang chanchin nei sei deuhte kha an thlang
chhuak satliah mai a ni . Chutia mi lar 34 hming an tawngpawng thlan zawh chuan , Torah buah heng
milar hmingte leh an pian kum emaw , thih kum emaw a awm teh reng emaw tiin an computer chu
an han zawn tir a . Mak tak maiin chung Rabbi 34 an thlan chhuahte hming chu Genesis bu ah hian a
lo inphum vek a nih chu ! Chu mai a la ni lo . An hming awmna bul lawkah an pianni emaw, an thih ni
emaw a lo awm ve zel bawk a , a mak tih piah lam a ni . Hetiang thil hi engkim hretu tih ni lova ,
vanneih thu emaw , tihpalh emaw , coincidence emaw a lo awm mai thei a nih lohzia chu, a theihna
lam chance khat awm ta se , a theihlohna lam chu chance maktaduai 775 a awm . Statistical Science
Journal chhuahtu mithiam rual , he thil chhut chhuah sa lo endiktute chuan mak an ti thei ngei mai. A
diklohna hmuh chhuah tur an hre si lo . Kawng dang an dap a . Tichuan Juda mifing langsar chanchin
ziahna Encyclopedia bu atanga an lak chhuah tel loh , Juda mifing challang deuh deuh 32 hming an
thur chhuah belh leh a . A hmaa an tihdan ang khan computer chu an chhutchhuah tir leh ta a . A
endiktu zinga lo ringhleltute mak tih tur tak mai hian - chung mifing hming an telh belhte pawh chu
Bible Code ah an lo lang kim leh thup mai anih chu! Chutianga finfiah dan khermei tak hmanga an
enchhinna atang chuan Genesis bu hian chung Juda mifing ber ber 66 te hming leh an pianni emaw,
an thih ni emaw theuh nen a lo tarlang reng mai tih finfiahtu a lo ni ta hlauh mai a ni . Chung mifing
leh rabbite lah chu AD 900 leh AD 1900 inkara mi an ni vek si a ; Genesis ziaktu Mosia lah chu heng
mite awm hma kum sanghnih vel (BC 1400) emaw daih a mi a ni si a .
Hetianga Code hi lehkhabu dang mihring finna a ziahah a awm leh awmloh nasa takin mithiam hovin
an zirchiang a . Mahse mihring finnaa ziah eng lehkhabu - ah mah hetianga thuruk(code ) inphum ru
hi hmuh tur a awm ve lo . Bin Ladena chungchang te , World Trade Center chhutchhiat tur
chungchang te , Lady Diana thihna chungchangte pawh Bible Code ah hian a lang vek a ni . Hetianga
lehkhabu mak thuruk inphum tam hi sangha mantu , chhiahkhawntu leh ran enkawltute finna
hmanga ziah chu a nih hmel loh hle a ni . Chubakah tunlai khawvel thiamna in an hmuhchhuah thar
thil tam tak hi Bible ah a awm sa vek a ni .
Bible ah hian a tira ziaktute ngei pawhin tihsual an nei thei tho va , a ziak chhawngtute tan phei
chuan tihsual a awl zual . Thuthlung Thar (Grik ) hmuh chhuah tawh zawng zawngah hian hmun 150 ,
000 velah thu inkalthelh avanga danglam a awm an ti a . Chung zinga hmun 400 velah chuan a thu
awmzia pawh a khawih danglam a . Authorised Version chhut hrang paruk khaikhinnaah chuan hmun
24 , 000 velah inang lo hmuh tur a awm bawk . Tihsual thenkhatte chauh tarlang ila: -
1 . Genesis 6 : 19 ah chuan Nova lawng chhungah thil nung tinreng zinga mi , chi tin pahnih zel lut ve
tura thu pek kan hmu a . Bung 7 : 2 , 3 ah erawh chuan tuak sarih zel lut tura thupek kan hmu thung.
Hetah hian ziak sual palh zawk chu a awm ngei ang le .
2 . Matthaia 27 :10 ah Lal Isua hralhna man 'tangka sawmthum ' hi zawlnei Jeremia sawi anga tarlan
a ni a . Mahse zawlnei Zakaria an ni zawk (Zak . 11 : 13 ).
3 . Marka 1 : 2 ah "Pathian Fapa Isua Krista Chanchin Tha thlen tantirhna chu , Zawlnei Isaia
lehkhabuah " tih kan hmu a ; mahse zawlnei Malakia bu a mi a la chhuak daih a (Mal. 3 : 1 ).
4 . Matthaia 27 : 3 - 10 ah chuan Juda Iskariota thih dan chu a inawk hlum niin a ziak a . A thih hnuah
puithiam lalte chuan Isua hralhna man chuan belvawtu hmun an lei thu kan hmu leh a . Tirhkohte
Thiltih 1 : 18 ah erawh chuan amah Juda ngei khan belvawtu hmun a lei a , chutah chuan
bawkkhupin a tla a , a laiah a puak keh a , a ril a puah keh thu kan hmu a . Ziak dik lo zawk chu an
awm ngei ang le .
5 . Luka ' n Isua pian laia Suria ram Governor chu Kurini - a (P .Sulpius Quirinius ) a tih hi a tidik lo.
Kurini - a hian AD 6 hma lamin Suria ramah Governor hna a thawk lo, sipai officer lian tak erawh chu
a ni hman (Lk . 2 :2 ).
6 . Number 25 :9 - 24 ah chuan thlalera thi zat chu mi 24 , 000 an nih laiin , I Korinth 10 :8 ah chuan
23 , 000 niin kan hmu .
7 . II Samuela 24 :24 ah chuan Arauna hnenah shekel 50 a pe tih kan hmu a , I Chronicles 21 :25 ah
chuan shekel 600 a ti leh si.
8 . Luka 24 :50 , 51 ah chuan Isua chu Bethani khua atanga vana lawn chho angin a sawi a , Tirhkohte
Thiltih 1 :9 - 12 ah erawh chuan Olive tlang (Jerusalem bul ) atanga chhoangin . Heng a chunga kan
tarlante bakah pawh hian a dang sawi tur a la awm nual . Saptawng Bible AV a awm si, kut ziak bu
hlui thenkhat leh RV a awm si lo eng emaw zat a awm a .
Mizo tawng Bible hi RV atanga lehlin a nih deuh ber avangin AV a awm , keini Bible a awm ve lo a
awm nual a ni . Mahse , heng thu inkawkalhte hian a ziaktu mihringte famkim lohzia a tarlan bak chu
thawkkhum hlutna a tidal chuang reng reng lova , ziak chhawngtute tihsual palh mai a ni .
Kum 1710 - ah mi harsaten awlsam zawka Bible an neih theih nana Society dinduhna chu German
ramah a lo intan a .Tichuan kum 1804 March ni 7 ni khan London, Tavern ah mi 300 rual vel
khalkhawmin British and Foreign Bible Society hi lungrual takin an din ta a ni . Chu chu Bible Society
lo intanna bul a ni a , chu Bible Society lo dinchhuahna bul ber chu Mary Jones naupangtein Bible a
lei theih nana nasa taka thawhrimna rah a ni . Bible lei tur hian mel 20 chuang hmeichhe naupang
kein a kal a ni . British and Foreign Bible Society a din hnu kum rei lo teah, khawvel ram tam tak
pawhin Bible Society chu an din ve zel a . Tichuan 1946 - ah ram hrang hrang atanga Bible Society
aiawhte chuan England ram Haywards khawpuiah intawhkhawmna neiin United Bible Societies chu
an din ta a ni . Tunah chuan khawvel ram 200 chuang tana thawk turin ram 146 - te chu United Bible
Society - ah hian an insuihkhawm a . Chu chuan Bible lehlinte, siam belh hna te leh sem chhuahhnate
a thawk mek a ni . Tuna UBS Secretary thawk mek chu Mr . Michael Perreay a ni a , 2011 - ah he hna
hi a vuan tan a ni . Tin President chu India mi Rev .Dr.Robert Coville a ni . British and Foreign Bible
Society kaihhruaina hnuaiah kum 1889 khan he rawngbawlna hi Kawlramah neih tan a ni a . Kum
1946 - ah The Bible Society of Myanmar tiin din a ni a . Tichuan 1969 kumah United Bible Society
(UBS ) hnuaiah Society pakhat a lo ni ve ta a ni . Tuna Bible Society Sunday kan hman thin hi 1915 vel
atang khan official takin an lo hmang tan tawh a , mahse an hman tan tirh chuan November thlaah
(Thanksgiving Day Nov. 22 hma sunday) an hmang thin a ni. Hei hi vawiin thleng hian kohhran tam
tak chuan la chhawm nung zelin November thlaah Bible Sunday hi an hmang thin a ni . Tin ,
American Bible Society chuan Bible Emphasis Week (Bible Sunday ) chu January 17 kha an puang a ,
an ni chuan January 17 khan Bible Sunday an hmang tawh a ni.
6 . Daai Revd . Hrang Khup & Revd . Bawi Thiang Ting 2005
Ka thuziak dang chhiar duh tan hei hi i click dawn nia aw .. ... .http : / /ruatdika . weebly . com
Email Blog Entry