1

Kasa Pawlu A Ningbaw Ningla Kasi

Ningbaw ningla hte seng ai ga baw hku laika buk ni, laika ngau ni n ka da tim, shi a
shagun laika ni hta mahta nna Kasa Pawlu a ningbaw ningla lai kasi ni hpe lawu de na lam ni hku
sharin la lu ga ai.
1. N bung ai wenyi shaman chyeju ni hpe manu shadan let woi awn ai (Appreciate the
diversity of giftness)
Kasa pawlu a myit hta, n bung ai atsam ningja gaw lak lai ai lam rai nna, lak lai ai lam lama mi
hku Yesu baw tai ai nawku hpung a daw shan tai let, nawku hpung hpe tsawm htap shangun ai, n
-gun kaba wa shashun ai, rawt jat galu kaba wa shangun ai ngu nna hkam la wu ai. N bung ai
wenyi shaman chyeju atsam ningja ni hpe masat masa galaw let, Karai a nawku hpug hpe gaw
gap ai lam hta jawm gun hpai ap nawng daw jau ai lam gaw n gun kaba re ai lam atsawm hkawn
hkrang ai hte nawku hpung hpe woi awn ningshawng ai re.
“Hkristu a hkum hpe shagrin jat wa u ga, gun hpai ang ai bungli a matu, chyoi ra ai ni hpe
shakup shatsup na,, shi gaw n kau mi hpe myihtoi, nkau mi hpe kabu gara shi ga hkaw
tsun hkawm ai ni, nkau mi hpe hpung up hte sara di nna, jaw da shajang mu ai….Tsaw ra
ai myit hte tengman ai ga hpe tsun nga yang, Hkristu ngu ai baw hte lam shagu hta kaba
rawt wa na ga ai. Shi kaw nna, dai hkum ting gaw, hkrihkraw lamyi ni yawng lanawn ya
ai a marang e, matut manoi htuk nna shachyaw nga let, daw shan ni langai hte langai
shachyen lu ai hte maren, tsaw ra ai hta de shatup hkra, tinang kung kaba wa ai lam, dai
hkum hkrang gaw shabyin wu ai.( Ephesu 4: 11-12; 15-16).”

2. N bung ai lam ni a lapran myit hkrum lam shakut gaw gap let woi awn ai (Seeks unity in
the context of diversity)
Marai langai hkrai gaw Karai Kasang a hkrang bung sum la rai nga ai hte maren, Karai
Kasang tsaw ra ai manu shadan la hkrum ai ni, sasana bungli a matu akyu rawng ai ni hkrai re.
Yawng gaw hkum shan a daw shan ni rai nga ai hte maren, nawku hpung hta myit hkrum lam
gaw gap let sasana hkum ni tai na matu shadut jahkat let woi awn wu ai.
“Hpu nau ni e, nanhte nlang hte gaw ga langai tsun nga nna, nanhte hta e hka wa bra wa
na lan n nga ai sha, myit mang langai sha hte mung sumtu langai sha hta e nanhte hkum
tsup lu myit ga, anhte a Madu Yesu Hkristu a amying ningsang a marang e, ngai nanhte
hpe shadut jahkat dat made ai (I Kor 1:10).”

(3) Madang tsaw ai myit masa laikyang ningja gaw gap let woi awn ai (Seeks high level of
moral maturity).
Kasa Pawlu gaw, tinang mung myit masa kyang lai len chyoi pra san seng hkra shakut
let, hpung masha ni hpe mung karai Kasang shanu ai nawku htingnu ni re ai hte maren myit masa
lai kyang shingni chyoi pra san seng na matu shadum sharin let woi awn ai wu ai.
“Nanhte gaw Karai Kasang a nawku htingnu rai nga nna, Karai kasang a Wenyi gaw
nanhte hta e rawng nga malit dai hpe, nanhte n chye nga myit ni. Marai langai ngai Karai
Kasang a naw ku htingnu hpe sharun shabya nga yang gaw, Karai kasang dai wa hpe
sharun shabya kau na ru ai; kaning rai nme law, Karai kasang a nawku htingnu gaw chyoi
pra nga ai; nanhte mung dai zawn rai nga myit dai (I Kor 3:16-17).”
 2

(4) Karai kaw na ahkang aya hte hpaji byen-ya hpe tam let woi awn ai (Seeks the Wisdom
and Empowerment of God).
Hpaji byeng-ya a n pawt gw karai kasang rai nga ai sha n-ga (Ga shagawp 1:7), Yehowa
gaw hpaji byeng-ya jaw nga ai (Ga Shagawp 2:6) hte maren, Hkristan asak hkrung lam gaw
Karai jaw ya nga ai hpaji byeng-ya hpe hkan tam let, Karai a hpung shingkang npu hta asak
hkrung ra ai asak hkrung lam re. Kam sham ai hpung masha malawng maga a mang hkang gaw
shaman chyeju n hkam la lu ai lam n re. Karai Kasang jaw ai shaman chyeju ni hpe chye
mu/chyena ni hpaji byeng-ya n rwng ai lam the, hkam la lu ai shaman chyeju ni hpe Karai
sharawng awng ai hku n chye asung jashawn, n chye jai lang, kunhting kaja n chye tai ai lam re.
Dai rai nna, tinang nang mung Karai kaw na ahkang aya hte hpaji byen-ya hpe tam let asak
hkrung ai zawn, hpung masha ni hpe mung dai hku shadum sharin let woi awn wu ai.
“Anhte a Madu Yesu Hkristu Karai Kasang ngu ai, hpung shingkang a Kawa gaw, shi
hkum nan hpe chye chyang lu u ga, hpaji byeng-ya hte shingran shapraw ai Wenyi nanhte
hpe jaw ya u ga hte; shi shaga la ai a jaw e myit mada shara gaw gade wa kaba nga ai
mung; n taw n tsang ai hpung shingkang rawng ai shi a sali wunli gaw chyoi pra ai ni hta
e gade wa kaba nga ai mung; kam sham nga ai anhte hta e, shi a nachying galu kaba htum
ai atsam gaw, gade wa galu kaba, nga ai mung, nanhte chye na lu myit ga, ngai hpyi nga
nngai ( Ehpesu 1:17-19).”

(5) Ahkik ahkawk ahti ahtawk lam hku n re ai sha htingrai htingrat lam tam let woi awn ai
(Seeks Conciliation instead of Conflict).
Nawku hpung hta rai rai, shinggyim wuhpawng hta rai rai, n bung ai atsam ningja ni,
sharawng awng ai lam ni, aga htunghking ningli ni etc., nga ai majaw, kalang lang ahktik ahtawk
mang hkang ni nga chye ai lam gaw shingra tara re. Kasa Pawlu gaw, nawku hpung hta mang
hkang pru chye ai lam gaw ahkyak n re ai sha, mang hkang ni yawng hpe htingrai htingrat ai lam
ni hte, mara raw dat hkat ai lam ni hte hparan la chye ra ai lam shadum sharin let woi awn wu ai.
“Myit kadun ai, sindawng katawt ai, masin pawt ai, ga law ga la ai, shatan nhkan ai amyu
myu hte, n hkru n hkra ai yawng hte nawng, nanhte hte tsan gang nga u ga. Nanhte shada
da mai kaja ai, matsan dum ai myit madun hkat nna, karai Kasang gaw Hkristu hta e
nanhte a mara raw dat kau ya manit dai hte maren, nanhte mung shada da a mara raw dat
kau nga mu (Ehpesu 4: 31-32).”
(6) Htaphtuk ai hku hkungga lara masat masa galaw ai hte woi awn ai (Seeks Fair and
Respectable Compensation and Recognition).
Kasa Pawlu gaw, nawku hpung kata hta hpung masha ni shada mung, woi awn
ningshawng ai ni hte hpung masha ni a lapran hta mung, shada hkungga hkat let shagrau sha a
chye ra ai lam shadum sharin let woi awn wu ai.
“Atsawm sha up nga ai Hpung salang ni hpe hkungga la ra shagup na ging nga ai hta, dai
mungga hte sharin shaga ai lam hta amu bungli gun hpai ai salang ni hpe, grau nna
hkungga la ra gying nga ai, dum nga mu. Kaning rai nme law, mam kabye ai nga n-gup
hpe ka dagraw ya lu na n rai; bai, amu bungli galaw ai wa gaw, shi a shabrai hkam gying
nga ai, nga nna chyum laika tsun nga ai (I Tim 5: 17-18).

(7) Karai a up hkang ai npu e dawjau ma myit masin hpe gaw gap let woi awn ai (Seeks a
servant’s heart and subjection to God).
Yesu Hkristu madun ai kasi ningli hta Kawa Karai kasang a npu e hkungga la ra ap
nawng let, kaji thum ai wa zawn, dawjau ma n sam hpe dagraw let asak hkrung ai re. Nawku
 3

hpung hta woi awn ai ningbaw ningla ni hte kam sham ai hpung masha ni yawng gaw, Yesu
Hkristu madun ai kasi ningli hta Kawa Karai Kasang a npu e hkungga la ra ap nawng let kaji
thum ai wa zawn, dawjau ma n sam hpe dagraw let asak hkrung dan lai wa sai re.
“Ngai gaw shingrai gade a ahkang npu e n nga ti mung, malaw maga hpe lum la lu hkra,
yawng mayawng a mayam ngai tai nga nngai. Yuda ni hpe lum la lu hkra, Yuda ni hta e
Yuda masha zawn, ngai tai nga nngai; ngai hkum tara npu e n nga ti mung, tara npu na ni
hpe lum la lu hkra, tara npu na ni hta e tara npu e nga ai wa zawn, ngai tai nga nngai ( I
Kor 9:19-20)”.

(8) Hpang na ban ni hpe sharin shakat lam woi let woi awn ai (Seeks to mentor and train
the next generation).
Nawku hpung ni gaw ban hte ban galai nna ningbaw ningla ni lata san let grin nga ra ai,
Yesu Hkristu baw tai ai hkum hkrang re. Dai re ai majaw, hpang na ban ni hta ningbaw ningla
kaja law law paw pru wa hkra, dai ni ningbaw ningla tai nga ai ni gaw shakut shaja nga ra ga ai.
Kasa Pawlu gaw dai hpe atsawm myit hkawn ai hte woi awn ningshawng wu ai.
“Sakse law law a man e ngai kaw na nang na la sai lam hte hpe, masha kaga hpe sharin
achyin chye ai kangka re ai masha hte kaw htawt ap ya u (II Tim 2:2)”.

(9) Myit galu kaba ai hte si mani ai hku sharai shading lam woi ai ladat hpe tam let woi
awn ai (Seeks to guide and correct with patience and gentleness).
Sumnung shingdi ai, si mani ai ngu ai gaw gawng kya ai lam n re. N-gun lapin power
nga ai lam re. Kasa pawlu gaw, Hkristan ningbaw ningla ni gaw, hkum hkrang n-gun lagaw, lak
nak, ahkang aya hte adip arip rai woi awn ningbaw ai baw n re. Wenyi hte hpring tsup ai si mani
ai hku, sumnung shingdi hte woi awn ai baw re ai lam shadum sharin nna woi awn wu ai.
“Dai Madu a shangun ma chyawm gaw, ga law ga la n mai nga ai sha, yawng mayawng a
man e shingdi ai, sharin shaga chye ai hte myit galu kaba rawng nna, nhtan shai ai ni hpe
sumnung ai myit hte sharin achyin ya lu na, mai nga ai: shing di yang, tengman ai ga hpe
chye chyang lu mu ga, Karai Kasang gaw shanhte hpe gaja wa myit malai lu na chyeju
jaw nna, nat a myit hku hkan na, shi a dawng gawng hta rim la hkrum ai ni, bai dum
hprang wa dam ma nhten law (II Tim 2:24-26).

Ga Hpungdim: - Kasa Pawlu gaw shi a lai wa tai aten na laikyang shingni yawng, tsep kawp
galai shai nna, Yesu a shangun ma ningbaw ningla tai wa ai wa re. Dai rai nna, dai ni na hkristan
wuhpung wuhpawng ni a ningbaw ningla ni, nawku hpung a ningbaw ningla ni hpe mung,
laikyang shingni kaja ni hte woi awn ningshawng na hpe ra sharawng wu ai. Hpung shawa hpe
mung Yesu a gawng shingyan lanan hkap lu ai ni hku galai shai ai, jet ai sape kaja ni tai wa
shangun mayu wu ai. Dai rai nna, shi a shagun laika ni hkan, ningbaw ningla ni ngu ai gaw, Yesu
Hkristu hta ningnan tai ai lai kyang shingni hte asak hkrung lam ting galai shai ai ni tai let, hpung
shawa hpe mung dai zawn re ai ni tai wa na matu woi awn ra ai lam aja awa shadum sharin wu
ai.

Ginlen shalai ai,

Lahphai Awng Li (Ph.D)