ერიხ ჰონეკერი
.jpg)
ერიხ ერნსტ პაულ ჰონეკერი (გერმ. Erich Ernst Paul Honecker; დ. 25 მარაშინათუთა, 1912 — ღ. 29 მესი, 1994) — გერმანალი კომუნისტი პოლიტიკოსი, გერმანიაშ დემოკრატიული რესპუბლიკაშ (გდრ) მადუდე 1971-1989 წანეფს. პოლიტიკური კარიერაშ გოძვენას უკინებუდჷ შხვადოშხვა პოსტეფი. რდჷ სოციალისტური ართოიანობაშ პარტიაშ (გსაპ) გენერალური მელამოსე, ერუანული დუდთხილუაშ სხუნუშ დუდმახვენჯი, 1976 წანას ჰონეკერქ დოთირუ ვილი შტოფი დო გინირთჷ სახენწჷფო სხუნუშ დუდმახვენჯო (ოფიციალური სახენწჷფო მადუდე). ჰონეკერს ფშხირას მიშინუანდეს მუჭოთ ავტორიტარი მამართალს დო დიქტატორს.
ჰონეკერქ პოლიტიკური კარიერა დიჭყჷ 1930-იან წანეფს. რდჷ გერმანიაშ კომუნისტური პარტიაშ მაკათური. ჸათეშ გეშათ თინა ნაცისტეფქ ოჭოფეს დო ჯიხას ქუდახუნეს. მაჟირა მოსოფელიშ ლჷმაშ ბორჯის, მუჟამსჷთ სხუნუეთიშ ჯარეფქ გერმანიაშა გემშეჭკირესინჷ, ჰონეკერი ჯიხაშე გადუდიშულეს. უკულ მალას, ჰონეკერქ გაგინძორჷ პოლიტიკური აქტივობა დო 1946 წანას ქუდარსხუ ორგანიზაცია დუდიშული გერმანალი ახალნორდობა. ჸათე ორგანიზაციაშ მადუდეთ ჰონეკერი მოღალენდჷ 1955 წანაშახ. მუჭოთ გსაპ-იშ უშქურანჯობაშ მელამოსე, ჰონეკერი რდჷ ართ-ართი შანულამი ორგანიზატორი ბერლინიშ კიდაშ ეგაფაშ, 1961 წანას.
1970 წანას ჰონეკერი აქტიურო მონაწილენდჷ ხეშულობაშო ლჷმას. ლეონიდ ბრეჟნევიშ ალარინათ, ჰონეკერქ გემორძგუ დო თიქ დოთირუ ვალტერ ულბრიხტი დო გინირთჷ გსაპ-იშ გენერალური მელამოსეთ დო ერუანული დუდთხილუაშ სხუნუშ დუდმახვენჯო. ჰონეკერიშ მართუალაშ ბორჯის, გდრ-ქ გაუჯგუშჷ ურთიართალა გფრწკჷმა დო გინირთჷ გოეროშ რსული მაკათურო, ნამუთ სერიოზული პოლიტიკური მეჭირინაფა რდჷ. 1980-იან წანეფს, მუჟამსჷთ სხუნუეთიშ ლიდერქ, მიხეილ გორბაჩოვქ აკიმუშუ ლიბერალური რეფორმეფი, პერესტროიკა დო გლასნოსტინჷ, ჰონეკერქ ჸათე რეფორმეფი ვემიღუ, ხვალე კოსმეტიკური თირუეფი ჩუტარჷ გდრ-შ პოლიტიკური სისტემას დო სერიოზულო მუთუნი ვაუთირუ. 1989 წანაშ გჷმათუთას, გსაპ-იშ პოლიტბიუროქ ჰონეკერი გეგნარინუ. ჸათე გინოჭყვიდირიშ ღანკი რდჷ თარობაშ პოზიციეფიშ გაუჯგუშება. მარა გეჸვენჯი თუთას, გდრ-შ კომუნისტური რეჟიმქ აკოცუ დო მალას, გერმანიაქ აკიართიანჷ.
გერმანიაშ გოართოიანაფაშ უკულ, ჰონეკერს ოჸურჩე ქიმეჩჷ ჩილეშ საელჩოქ მოსკოვს, მარა 1992 წანას რუსეთიშ თარობაქ ჰონეკერი გეგნოჩჷ გერმანიას, სოდეთ აპირენდეს თიში გასამართებას. მარა სასამართლო პროცესიქ მეჭყორდჷ დო დათებუშა ვემუჸონაფუნა, მუშენდა პროცესეფიშ მიმალობას ჰონეკერიშ სინთელექ გეუფრაშჷ. თინა გადუდიშულეს დო ჩილეშა ულაშ ნება ქიმეჩეს. ჰონეკერქ ღურუ ჩილეშ ნანანოღა სანტიაგოს, 1994 წანაშ მესის.