لوتسو
اللوتسو (بالمالطية: [lutt͡su], الجمع: luzzijiet) هوا باطو ديال الصيد التّقليدي من الدزيرات د مالطا.[1] هاد الباطوات ملونين ومشهورين بالعينين اللي مرسومة فالقدام ديالهم.
الـلوتسو تطور فالبدية ديال القرن العشرين. كان مقادة للباطوات القديمة بحال الـ"فيريلا" (ferilla) والـ"فريڭاتينا" (fregatina).[2] هاد التبديلات و الروتوشات جاو باش الباطو مايتزعزش وسط الماج ويكون و يكون ساهل فالتحراك وميبرزطش الصيادة والسياح.
- الطول: بين 5 و7 ميترو على حساب المعلم
- عرض: علاين جوج ميترو شي مرات كثر شويا
- قاع مسطح باش يسهال يتجبد للپلاج[3]
- لوان عاطية للعين: الزرڭ، الصفر، الحمر، والخضر هوما اللي كايتخدمو بزاف.
- العينين: مرسومين فالجناب د القدام على شكل عين حورس المصرية القديمة.[4]
اللوتسو خدموه فاللول باش يصيدو فالميمان القراب من لاپلاج ، والموطور خلاهم يمشيو بعيد فالبحر وبدا شوية بشوية تاياخذ بلاصة الكاجيك kadjjik. تخدم تاني الترونسپور د المونة بينات المراسي ديال دزاير مالطا.[5]
لامارين النڭليزية خدمات اللوتسو باش تمون البابّورات ديالها سوا الحربية ولا التجارية. و فوقيتة د الحرب العالمية الجاوجة ، كان اللوتسو مكلف بالعتيق فالمرسى الكبير.
اللوتسو ولى رمز للتراث البحري المالطي وكايبان بزاف فالتصاور السياحية و فالطابلوات الفنية. بالنسبة للعينين كيعتاقدو الصيادة باللي راه كاتحميهم من الخطر اللي فالبحر، وهاد التقليد يمكن يكون جاي من الوقيتة الفينيقية القديمة.[1]
الباطوات الجداد اللي مطورين كثر كتنافس اللوتسو فالضومين د الصيد. و كاين تا تحديات فالخدمة اللي كاتدار باش ياضاپتيو اللوتسو مع العبارات البيئية الجديدة والقوانين لي كيتعلقو بالصيد و باقي الأمور التنظيمية.[6]
- ^ a b Borg, A. (2020). "The Luzzu: Malta's Iconic Fishing Boat". Malta Culture Guide.
- ^ Muscat, J. (2018). "The Maltese Fishing Boat: History and Evolution". Maritime Malta Press.
- ^ Vella, G. (2019). "Traditional Craftsmanship in Maltese Boat Building". Journal of Mediterranean Studies, 28(2), 232-249.
- ^ Zammit, T. (2021). "The Luzzu as Cultural Heritage: Preservation Efforts and Challenges". Malta Archaeological Review, 12, 45-60.
- ^ Joseph Muscat (1999) p. 93 et 98
- ^ Caruana, M. (2022). "The Role of Traditional Fishing Boats in Malta's Modern Economy". Mediterranean Quarterly, 33(1), 78-95.