Populo Karib
![](http://upload.wikimedia.org/wikipedia/commons/thumb/5/57/School_children_Bigi_Poika.jpg/320px-School_children_Bigi_Poika.jpg)
Le Karib, Kali'na o Kalina esas aborijena populo qua habitas litorala regioni di Sud-Amerika e posible havas relati kun Karibiana Karib ("Kalinago"). La lingui di amba populi havas similesi.
Le Karib dil kontinento habitas la litori di Venezuela, Guyana, Surinam, Franca Guyana e Brazilia. Li videsis unesmafoye da Cristoforo Colombo. Un ek la posibla signifiki di ca vorto esas "brava militero". L'unesma koloniigiti Hispana uzis la termini Arawak e Karib por distingar grupi amikala a li (Arawak) e hostila a li (Karib).
Le Karib ne havis skribita kulturo ante l'arivo di Europani, do lia tradicioni transmisesis parole. Dum longa tempo, studiisti Europana ne distingis la diversa tribui Karibiana. Pos ke l'exploro-epoko cesis en la regiono, l'intereso pri ca tribui diminutis, ed erste dum la fino dil 20ma yarcento, kelka Franca historiisti komencis studiar li, e le Kali'na decidis naracar lia historii. Nun on kalkulas existar plu kam 30 mil Karib en Venezuela, 3 mil en Surinam, 3,1 mil en Guyana, 3 mil en Franca Guyana, e 1817 en Brazilia.