واڈھی
![](http://upload.wikimedia.org/wikipedia/commons/thumb/f/f5/Wheat_cutting_season.jpg/250px-Wheat_cutting_season.jpg)
![](http://upload.wikimedia.org/wikipedia/commons/thumb/4/40/A_wheat_field_in_Punjab%2C_Pakistan.jpg/250px-A_wheat_field_in_Punjab%2C_Pakistan.jpg)
واڈھی (انگریزی:Harvesting)، فصل دی کٹائی دا عمل اے، پودےآں نوں کَٹ کے گہائی یا ہور مراحل واسطے جمع کیتا جاندا اے۔ ایہ خاص طور تے پکّیاں فصلاں نوں وڈھݨ دا عمل اے۔ ایہناں وچ کݨک دی واڈھی سَبھ توں اہم اے۔ فصل دے پودےآں نوں زمین توں کٹیا جاندا اے تاکہ فیر ایہدی گہائی کرکے اناج حاصل کیتا جاسکے۔ واڈھی واسطے عام طور تے داتری، داتر، ریپر یا ہارویسٹر استعمال کیا جاندا اے۔
گَھٹ توں گَھٹ میکانائزیشن دے ناݪ چھوٹے کھیتاں وچ فصل دی کٹائی وَدھدے ہوئے موسم دی سَبھ توں زیادہ محنت والی سرگرمی اے۔ وڈے مشینی فارماں اُتے واڈھیاں واسطے زرعی مشینری دا استعمال کیتا جاندا اے جِداں کمبائن ہارویسٹر۔ آٹومیشن نے بجائی تے واڈھی دے عمل، دوناں دی کارکردگی وچ اضافہ کیتا اے۔ واڈھی دے مخصوص آلات، نرم گرفت تے وڈے پیمانے اُتے نقل و حمل لئی کنویئر بیلٹ دا استعمال کردے ہوئے ہر اک پودے نوں ہَتھ ناݪ ہٹاوݨ دے دستی کَم دی جگہ لے لیندے نیں۔ عام طور تے "واڈھی" دی اصطلاح وچ فصل نوں کٹائی دے ناݪ فوری طور تے سن٘بھالݨا شامل ہو سکدا اے، بشمول صفائی، چھٹائی تے پیکِن٘گ۔
واڈھی دا عمل مکمّل ہوݨا وَدھدے ہوئے موسم دے اختتام یا کِسے خاص فصل دے پکّݨ دے دور دی نشاندہی کردا اے تے اس تقریب دی سماجی اہمیّت ایہنوں فصلاں دے تہواراں ورگی موسمی تقریبات دا مرکز بݨاؤن٘دی اے، جو بہت ساریاں ثقافتاں وچ پائے جاندے نیں۔
کݨکاں دی واڈھی
[سودھو]فصلاں دی واڈھی وچ سَبھ توں اہم کݨکاں دی واڈھی اے۔ موسم بہار وچ پنجابی رہتل دی ایہ اک وڈی زرعی ثقافتی سرگرمی اے۔ پنجابی رہتل دا تاریخی تہوار وساکھی کݨکاں دی واڈھی نوں پنجاب وچ خُشحالی تے ثقافتی تقریب دے طور تے اجاگر کردا اے۔ پنجاب نوں دنیا بھر وچ کݨک دی پیداوار واسطے اہم مقام حاصل اے۔
وساکھ وچ کݨکاں پَک جاندیاں اے تے واڈھی دا آغاز ہو جاندا اے۔ واڈھیاں داتری ناݪ تے زرعی مشینری ناݪ کیتی جاندی اے فیر کݨک نوں اکٹّھا کیتا جاندا اے، اس توں بَعد گہائی کیتی جاندی اے۔
واڈھی دا آغاز ڈھول بجا کے کیتا جاندا سی۔ واڈھیاں وچ ون٘گار دی رسم وی ہُندی سی، جیہدے وچ پنڈ دے لوک مِݪ کے واڈھی کردے سن۔