Corpo menor do sistema solar
![](http://upload.wikimedia.org/wikipedia/commons/f/fe/4_Vesta_1_Ceres_Moon_at_20_km_per_px.png)
![](http://upload.wikimedia.org/wikipedia/commons/thumb/7/7a/NASA-JPL-Caltech_-_Double_the_Rubble_%28PIA11375%29_%28pd%29.jpg/220px-NASA-JPL-Caltech_-_Double_the_Rubble_%28PIA11375%29_%28pd%29.jpg)
Un corpo menor do Sistema Solar (CMSS ou do inglés SSSB, small Solar System body) é, segundo a resolución da UAI (Unión Astronómica Internacional) do 22 de agosto de 2006, un corpo celeste que orbita en torno ao Sol e que non é planeta, nin planeta anano, nin satélite:
Todos os outros obxectos [referido aos que non sexan nin planetas nin planetas ananos nin satélites], e que orbitan arredor do Sol, débense denominar colectivamente "corpos menores do sistema solar" (Small Solar-System Bodies).
Estes actualmente inclúen a maioría dos asteroides do sistema solar, a maioría dos obxectos transneptunianos (OTN), cometas, e outros pequenos corpos.[1]
Por conseguinte, segundo a definición da UAI, son corpos menores do sistema solar, independentemente da súa órbita e composición:
- Os asteroides.
- Os OTN (obxectos transneptunianos).
- Os cometas.
- Os meteoroides.
Segundo as definicións de planeta e de planeta anano, que atenden á esfericidade do obxecto debido á súa gran masa, pódese definir como corpo menor do sistema solar, por exclusión, a todo corpo celeste que, sen ser un satélite, non acadase suficiente tamaño ou masa como para adoptar unha forma esencialmente esférica.
Segundo algunhas estimacións, a masa requirida para acadar a condición de esfericidade situaríase en torno aos 5 × 1020 kg, resultando o diámetro mínimo en torno aos 800 km. Porén, características como a composición química, a temperatura, a densidade ou a rotación dos obxectos poden variar notabelmente os tamaños mínimos requiridos, polo que se rexeitou asignar valores apriorísticos á definición, deixando a resolución individual de cada caso á observación directa.[2]
Segundo a UAI, algúns dos corpos menores do sistema solar máis grandes poderían reclasificarse no futuro como planetas ananos, tras un exame para determinar se están en equilibrio hidrostático, é dicir: se son suficientemente grandes para que a súa gravidade venza as forzas do sólido ríxido ata ter adoptado unha forma esencialmente esférica.[3]
Exceptuando os obxectos transneptunianos, os corpos menores do sistema solar de maior tamaño son Vesta e Pallas, con algo máis de 500 km de diámetro.
Notas
[editar | editar a fonte]- ↑ Resolucións da Asemblea Xeral do 2006 da UAI
- ↑ "The IAU draft definition of "planet" and "plutons"". Consultado o 5 de agosto de 2011.
- ↑ Unión Astronómica Internacional. "Definition of a Planet in the Solar System" (PDF). Consultado o 5 de agosto de 2011.